ނޯޓު: މިއީ ހަގީގީ ހާދިސާއެއްގެ މައްޗަށް ބިނާކޮށް ލިޔެފައިވާ ހިޔާލީ ވާހަކައެކެވެ!

 

"3 ފެބުރުއަރީ 2019 ވީ އާދިއްދަ ދުވަހުގެ ރޭ، 21:30 ހާއިރު، ގަލޮޅު ސަހަރާ ކައިރިން ތޫނު ހަތިޔާރު ބޭނުންކޮށް، މީހަކަށް ބިރުދެއްކުމާއި، ވައްކަމާއި ފޭރުމުގެ މައްލައެއް، އަމިއްލަ އިއުތިރާފުން ސާބިތުވެ، ބ.ފުނަދޫ ކަށިކެޔޮމާގޭ ހުޒާމުގެ މައްޗަށް، 7 އަހަރާއި 5 މަސްދުވަހުގެ ޖަލުހުކުމަކުން ހުކުމްކޮށްފީމެވެ!" ފަނޑިޔާރުގެ މަރުތޭލުން ޖަހާލަމުން ފަނޑިޔާރުގެ ޝަރީއަތް ނިންމާލިއެވެ. އަހަރެންގެ ލޮލުން ހިފެހެއްޓުމެއް ނެތް ކަރުނަތައް އޮހޮރިގެން ދިޔައީ ބޭއިހްތިޔާރުގައެވެ. 

 

****3 އަހަރު ކުރި*****

ރަށު ސުކޫލުގައި އޯލެވެލް ނިންމީ ސުކޫލުގައި އާދައިގެ ނަތީޖާއެއް ނެރޭ ކުއްޖެއްގެ ގޮތުގައެވެ. އަހަރެންނަކީ މޮޅުކުދިންގެ ލިސްޓުގައި ވެސް އަދި ދަށްކުދިންގެ ލިސްޓުގައިވެސް ހިމެނޭ ކުއްކެއް ނޫނެވެ. އެވްރެޖު ނަތީޖާއެއް ހޯދަމުންގޮސް އޯލެވެލް ނިންމާލީވެސް އެ ނަތީޖާގައެވެ. ނަތީޖާގެ ގޮތުން އޭ ލެވެލް ހެދުމުގެ ފުރުސަތު އަހަންނަކަށް ނުގެއްލެއެވެ. އެހެންކަމުން އަހަރެން ނިންމީ އޭ ލެވެލް ހެދުމަށް މާލެ ބަދަލުވާށެވެ. ނަމަވެސް އަހަރެންގެ މަންމައާއި ބައްޕައާއި އާއިލާ މީހުންގެ އެދުމަކަށްވީ އަތޮޅު މަދަރުސާއިން އޭލެވެލް ކިޔަވާށެވެ. އަހަރެން މާލެ ފޮނުވައިގެން ކިޔަވައިދިނުމުގެ ތަނަވަސްކަން ނެތިގެންނެއް ނޫނެވެ. ނަމަވެސް އެމީހުންނާ މާ ދުރު ހިސާބަކަށް އަހަރެން ފޮނުވާ ނުލާންވެގެންނެވެ.

ކުޑަކުއްޖެއްގެ ކުސްތެޅުމާއި ބަހަނާދެއްކުން އަހަރެންވެސް ދެއްކީމެވެ. އަހަރެންގެ ކުސްތެޅުމާ ޝަކުވާތަކުގެ ކުރިމަތީގައި އަހަރެންގެ މައިންބަފައިން މިފަހަރު ދޫދިނެވެ. އޭލެވެލް ހެދުމަށް މާލެ ފޮނުވަން އެއްބަސްވިއެވެ. އަހަރެންނާއި އެކު އޯލެވެލް ހެދި ދެކުއްޖަކުވެސް މާލެ ބަދަލުވިއެވެ. މާލޭގައި އަހަރެން ހުންނާނޭތަނެއް ހޯދުމުގެ މަސައްކަތް އަހަރެންގެ މައިންބަފައިން ފެށި ހިސާބުން އަހަރެންގެ ހިތުގައި އަމުދަކުން މާ އުފާވެރިކަމެއް އުފެދުނެވެ. ބައްޕަ ފަރާތު ބޮޑު ބެއެއް، މާލޭގައި ކުއްޔަށް އުޅޭ ގެއެއްގައި ހުރި ކޮޓަރިއެއްގައި އަހަރެން ބަހައްޓައިދޭން އެއްބަސް ވިއެވެ. އެ ކޮޓަރީގައި އަދި އިތުރު ދެކުދިން އުޅޭކަމަށް ބުންޏެވެ. އެއީ ބޮޑުބެގެ އަންހެނުން ރަށު ެދެކުދިންކަމަށްވެސް ބުންޏެވެ. އަހަރެން އެކަމަކަށް ފަރުވާލެއް ނުބަހައްޓަމެވެ. މާލެ ދެވެނިކޮށް ނިމުނީއެވެ. 

ވަންނާނީ ކޮން ސުކޫލަކަށްތޯ އެހުމުންވެސަ އަހަރެން އަޅައެއް ނުލަމެވެ. ފަސޭހައިން ވެއްދުނު ތަނައްކަށްވިއްޔާ ވައްދައިދޭށޭ ބުނީމެވެ. ހަމަ މާލެ ދިޔުމުގެ ބޭނުމުގައެވެ. އަހަރެން މިހާވަރަކުން މާލެދާން ބޭނުންވަނީ ކީއްވެތޯ އަހަރެން ކުރެން އަހާލީ ހަމަ އެއްމެ މީހެކެވެ. އެއީ އަހަރެންދެހެ އެހާމެ ލޯބިވާ އަދި އަހަރެންނަށް އަބަދުވެސް ހިތްވަރުދޭ އަހަރެންގެ ބައްޕައެވެ. މީހެއްގެ މަސްދޯންޏެއްގައި ފަޅުވެރިއެއްގެ ގޮތަށް މަހަށްގޮސް އާމްދަނީ ހޯދަމުން އަންނަ އަހަރެންގެ މުސްކުޅި ބައްޕައަށް އަހަރެން ޖަވާބުދިނީ ވަރަށް އާދައިގެ ގޮތަކަށެވެ. ހުރިހާކަމެއް ފަހިވެފައި އޮތީ މާލޭގައި ކަމަށް އަހަރެން ބުނީމެވެ. އަދި ކިޔަވާނިމިގެން ބައްޕަމެން ކައިރިއަށް އަންނާނެ ވާހަކަވެސް ބުނީމެވެ. ބަންދެއް ވިއްޔާ އެއްމެ ދުވަހަކުވެސް މާލޭގައި ނުހުންނާނެކަމަށްވެސް ބުނީމެވެ. އެެއްމެ އަވަހަށް ފުރާ ބޯޓަކަށް އަރައިގެން ރަށަށް އަންނާނެކަމަށްވެސް ބުނީމެވެ.

ކޮންމެ އަކަސް ދުވަސްތައް ފާއިތުވެ، އަހަރެން މާލެ ދާންޖެހޭ ދުވަސް އައިސް ޖެހިއްޖެއެވެ. މަންމަ އާއި ބައްޕަ އެއްމެ ފަހުގެ ނަސޭހަތްތައް އަހަރެންނަށް ދެމުން ދިޔައެވެ. އަހަރެން ބޯ ޖަހާލަ ޖަހާލަ ހުރީމެވެ. އެއްމެ ފަހުގެ ވަދާއީ ސަލާންކުރުމަށްފަހު އަހަރެން ބޯޓަށް އެރީމެވެ. ބޯޓު އައިސް މާލޭ ބަނދަރަށް ލެފުނުއިރު، ބޮޑުބެ ހުރީ އަހަރެން ބަލާ އައިހެވެ. ބޮޑުބެއާއި އެކު ކާރެއްގައި ބޮޑުބެގެ ގެއަށް ދިޔައީމެވެ.

ހެންވޭރޭ މާފަންނޭ ކިޔާތީ އަޑުއަހަމެވެ. އެކަމަކު އެއީ އަހަރެންނަށް އެއިރަކު މާ ފަރިތަ ނަންނަމެއް ނޫނެވެ. ޗުއްޓީތަކުގައި މާލެ ގޮސް އުޅޭކަމުން ދަންނަނީ ހަމައެކަނި ބައެއް ތަންތަނެެވެ. ބޮޑުބެ އުޅޭ ގޭ ހުރީ ހެންވެއިރުގައެވެ. މިހާރު ދެން އެއީ އަހަރެންވެސް އުޅޭ ގެއެވެ.

ބޮޑުބެއާއި އެކު ސުކޫލުގެ ކަންކަން ހަމަޖައްސާން ނުކުމެ، ސުކޫލަށް ބޭނުންވާ ސާމާނުތައް ހަމަކޮށް، ޔުނީފޯމުވެސް ފަހައިފީމެވެ. މާ ގިނަ ދުވަހެއް ނުވެ ސުކޫލަށްވެސް ނުކުންނަން ފަށައިފީމެވެ. މާލެ އައިސް ދެދުވަހެއް ތެރޭ ފޯނެއްވެސް ގަނެފީމެވެ. މަންމަ އާއި ބައްޕަ ދެފަހަރަށް ނުގުޅާ ދުވަހަކަށް އިރުއަރާ އިރު އޮށްސިގެންނެއް ނުދެއެވެ. އެ ދެ މީހުން އަހަރެންގެ ހާލު އެހާ ގާތުން ބަލައެވެ.

ސުކޫލަން ނުކުންނަތާ ދުވަސްކޮޅެއް ވެއްޖެއެވެ. ފުރަތަމަ ދެތިން ޗުއްޓީގައި ރަށަށް ދިޔައީމެވެ. އެކަމަކު ދެނެއް ރަށަށް ދާހިތެއް ނުވެއެވެ. ޗުއްޓީގައި މާލޭގައި މާ ކަންތައް އޮވެއެވެ. ކުލާހު ކުދިން މާލޭގައި މާ ސަކަރާތް ޖަހައެވެ. އަހަރެންގެ އެކުވެރިން އެ އުޅޭ "ސަޅި ލައިފް" އަހަރެންވެސް އުޅެން ބޭނުންވިއެވެ. އަބަދު މަންމަ ބައްޕަ ހެދިގެން އުޅެން ދެން އަހަރެން މީ ކުޑަކުޖެއްވެސް ނޫންތާއެވެ!

ފަހުން ފަހުން އައިސް ޗުއްޓީތަކުގައި އަހަރެން ރަށަކަށް ނުދަމެވެ. ބަހަނާއަކަށް ދައްކަނީ ސުކޫލު ފިލާވަޅުތަކުގެ ވާހަކައެވެ. އެކަމަކު އަހަރެން ރަށަށް ނުގޮސް ހުންނަނީ ފިލާވަޅުތަކެއް އޮވެގެނެއް ނޫނެވެ. ރައްޓެހި ކުދިންނާއި އެކު ސަކަރާތް ޖަހާލާ މަޖާކޮށްލުމަށެވެ. މިގޮތުން ވިލިނގިއްޔަށާއި ހުޅުމާލެއަށްވެސް ގޮސް އުޅެމެވެ. މާފުއްޓަށްވެސް ބައެއްފަހަރު ގޮސް އުޅެމެވެ. އެއީ ވާ މަޖާ ދަތުރުތަކެކެވެ. ސިނގިރެޓު ބުއިމާއި އަދިވެސް އެނޫން އެއްޗެހި ބުއިމަކީ އެދަތުރުތަކުގައި އާއްމު ކަމެކެވެ. އަންހެންކުދިންނާއި އެކު ޕާޓީ ކުރުމާ ނެށުމަކީވެސް އާއްމު ކަންކަމެވެ. ނަމަވެސް މިއީ އަހަރެން ދުވަހަކުވެސް ކޮށް އުޅުނު ޒާތުގެ ކަންކަމެއް ނޫނެވެ. ފުރަތަމަ އަހަރެން ހުންނަނީ ކުޅި ބަލާށެވެ. މިގޮތަށް ދެތިން ދަތުރަކު ދެވުމަށްފަހު، އެ މަޖަލުގައި އަހަރެންވެސް މަޑު މަޑުން ބައިވެރިވާން ފެށީމެވެ. ފިލްމުތަކުގައި އެހެން އުޅޭ ކުދިން އެ އުޅެނީ ހާދަ "ސަޅި" ދިރިއުޅުމެއްތާއެވެ. މަޑުމަޑުން އެ މަސްތުގެ ތެރެއަށް އަހަރެން ގަރަގުވަމުން ދިޔައެވެ. އަންހެންކުދިންނާއި އެކު ޕާޓީކުރުން ވެސް އާއްމުކަމަކަށް ވެއްޖެއެވެ. ސުކޫލުގެ ކިޔެވުމަކީ އަހަރެންނަށް މިހާރު މަ މުހިއްމު އެއްޗަކަށް ނުވިއެވެ. ނަމަވެސް ގްރޭޑު 11 ނިމެންދެން ސުކޫލަށް ދިޔައީމެވެ. ނަތީޖާތަކަށް ފަރުވާލެއް ނުބަހައްޓަމެވެ. ޔުނިޓު ޓެސްޓެއް ނެގިޔަސް ފާހެއް ނުވެއެވެ. އަމުދުން ކިޔަވާހިތެއްވެސް ނުވެއެވެ. ބޮޑުބެއަކަށް މިއިން އެއްވެސް ކަމެއް ނޭނގޭނެއެވެ. އެއީ މަސައްކަތަކުން އަވައްޖެއްވާ އާދަމުގެ ދަރިއެއް ނޫނެވެ. 

އޭ ލެވެލްގެ އެއްމެ ފަހު އިމްތިހާނުތައް ހަދައިފީމެވެ. މަންމަ އާއި ބައްޕަ ހުރީ އަހަރެން ރަށަށް ދާނޭ ދުވަހެއްގެ އިންތިޒާރުގައި ކެތްމަދުވެފައެވެ. ނަމަވެސް އަހަރެން އެނބުރި ރަށަކަށް ދާކަށް ނެތީމެވެ. ކޮންމެ ދުވަހަކު ގުޅާ މަންމަ އާއި ބައްޕަ ކުރެން މިއިން ވާހަކައެއް ނުދައްކަމެވެ. އޭ ލެވެލްގެ ފަހު އިމްތިހާނު އޮތް ދުވަސް ނޫން އަނެއް ދުވަހު އަހަރެން "ވަޒީފާއަކަށް" ނުކުތީމެވެ. އެއީ އަހަރެންގެ އެކުވެރިއަކު އަހަންނަށް ހޯދައިދިން ވަޒީފާއެކެވެ. ޑެލިވަރީ ކުރުމުގެ ވަޒީފާއެކެވެ. އަހަރެން ކުރަން ޖެހޭކަމަކީ ކުދި ކުދި ކަރުދާސްފޮށިތަކެއް، އެބުނާ އެޑްރެސް ތަކަކަށް ގެންގޮސްދިނުމެވެ. ކޮންމެ ފޮއްޓަކަށް ސަތޭކަ ރުފިޔާ ލިބެއެވެ. ދުވާލެއްގެ މައްޗަށް ހާހަކަށްވުރެ ގިނައިންވެސް ރުފިޔާ ހޯދަމެވެ. އުފުލަނީ ކޮންކަހަލަ ފޮށިތަކެއްކަންވެސް އަހަރެންނަށް އެނގެއެވެ. އެހެންވިޔަސް ކީއްހެއްޔެވެ؟ ރުފިޔާ ލިބެއެވެ. އަނެއްކާ މަދެއް ނޫނެވެ!

ރަށުން ގުޅާ ކޮންމެ ފަހަރަކު އަހަރެން ދައްކަނީ މި ވަޒީފާގެ ވާހަކައެވެ. މަހަކު ތިރީސް ހާހަށްވުރެ ގިނައިން ރުފިޔާ ލިބޭ ވަޒީފާއެއްގެ ވާހަކައެވެ. މިއީ އަހަރެންގެ އާއިލާއަށް ބޮޑު އަދަދެކެވެ. އެހެންކަމުން މަންމަވެސް އަދި ބައްޕަވެސް ހުރީ ހިތްހަމަ ޖެހިގެންނެވެ. އަދާކުރާ ވަޒީފާ އަކީ ކޮބައިކަން އެމީހުންނަކަށް ކޮންމެހެން އެނގޭކަށް ނުޖެހޭނެތާއެވެ.

ޑެލިވަރީ ބޯއީއެއްގެ ގޮތުގައި ދުވަސްތައް ހޭދަކުރަމުން ދިޔައީ އެ ސަކަރާތުގައި ސަކަރާތްވެސް ޖަހަމުންނެވެ. މިހެން އުޅުމުގެ ތެރޭގައި އޭ ލެވެލްގެ ނަތީޖާވެސް އައިސްފިއެވެ. ހަރާމުން ފާހެއްވި އެއްވެސް މާއްދާއެއް ނެތެވެ. އަމުދަކުން އެއީ އަޅާލަންޖެހޭ ކަމެއްވެސް ނޫންތާއެވެ. ކޮންމެ މަހަކު މަންމައާއި ބައްޕައަށް ފަސް ހާސް ރުފިޔާ ފޮނުވަމެވެ. ހޯދާގޮތެއް އަހައެއް ނުލައެވެ. އޭ ލެވެލް މަތިން ހަނދާންވެސް ނެތް ކަހަލައެވެ. 

ދުވަސްތައް ފާއިތުވެ އަހަރެންގެ ދާދާކަންވެސް އިތުރުވަމުން ދިޔައެވެ. މަސްތުވާތަކެތީގެ ބޮޑެތި ޑީލްތަކުގައި އުޅެމެވެ. ވައްކަމާއި ފޭރުމާއި މާރާމާރީ އަކީ އާދައިގެ ކަންކަން ކަމުގައި ވެއްޖެއެވެ. އެކަމަކު އަދި ދުވަހަކުވެސް ފުލުހަކު އަތްދަށުވެފައެއް ނޯންނާނެއެވެ. ނަމަވެސް އެއް ރެއަކު ފުލުހަކު އަތުޖެހުނެވެ. އަހަރެންގެ ހުރިހާކަމެއް ހަމަވީ އެހިސާބުންނެވެ. މައުސޫމުކަން ދައްކައިގެން ބޮޑުބެގެ ގޭގައި އުޅުނު އުޅުންވެސް ނިމުނީއެވެ. މަންމަ އާއި ބައްޕަވެސް، އަހަރެންގެ އަމަލުތަކުގެ ސަބަބުން އަހަރެންނާ އޮންނަ ގުޅުން ކުޑަކޮށްފިއެވެ. އާއިލާ މީހުން އަހަރެން ބާކީކޮށްފިއެވެ. މަސްތުގެ ހާލުގައި ހުއްޓާ ހައްޔަރު ކުރުމުން ޖަލުގައި ދުވަސްކޮޅަކު ތެޅުވުމަށްފަހު އަހަރެން ދޫކޮށްލިއެވެ. އަނެއްކާވެސް މާލޭގެ ހަލަބޮލިކަމަށް ނުކުތީ ވަންނާނެ ގެއެއް ނެތް ހާލުގައެވެ. ރަށަށް ދިއުމަކީ އޮޕްޝަނެއް ނޫނެވެ. އަހަރެންގެ މި "ސަޅި" ދިރިއުޅުން އެއިރުން ގެއްލުނީތާއެވެ. މި ރުފިޔާތައްވެސް ނުލިބުނީތާއެވެ. އެހެންނޫނަސް މަންމަ އާއި ބައްޕަ އަކީ މިއަދު އަހަންނަ މާ މުހިއްމު ބައެއްވެސް ނޫންތާއެވެ. މަ އުޅޭނޭ ގޮތް އިނގޭނީ މަށަށްތާއެވެ.

އެކުވެރިންނާއި އެކު ޕާޓީކުރާ ކޮޓަރިގަނޑެއްގައި އުޅެން ފެށީމެވެ.

ދުވަސަތައް ފާއިތުވަމުން ދިޔައެވެ. އެއީވެސް އެފަދަ ރެއެކެވެ. ކްލިނަކަކުން ނުކުމެގެން އަންނަ މުސްކުޅި ފުރައިގެ ފިރިހެނެކެވެ. ކައިރީގައި ހުރި އޭޓީއެމް އަކަށް ވަދެ ރުފިޔާކޮޅެއްގެންވެސް ނަގައިގެން އަންނަ ކަހަލައެވެ. އަހަރެންނާ އަހަރެންގެ ގުރޫޕުގެ އަމާޒަކިން ވީ އެ މުސްކުޅި މީހާ ފޭރިގަންނާށެވެ. އެއީ އަހަރެމެންނަށް އައުކަމެއް ނޫނެވެ. ދާދި ފަސޭހަވެސް ކަމެކެވެ. ނަމަވެސް މުސްކުޅިއޭ ކިޔަސް އެއީ ގަދަ މީހެކެވެ. އަހަރެމެންނަށް ފުކެއްވެސް ދުލެއް ނުދިނެވެ. ދެން ޖެހުނީ ބާރުގެ ބޭނުން ކުރާށެވެ. އެ މުސްކުޅި މީހާގެ މޫނަކަށް ކަނދުރާއަކަށް ނުބަލަމެވެ. އެންމެންހެން އޭނާގެ ގައިމައްޗަށް އަރާގަނެ އެފަކީރަށް ހެދުނު ގޮތެއް ހަދާފައި ފޭރިގަނެގެން ދިޔައީމެވެ. ލޭވެސް އޮހޮރިފައި ހުރިކަން އިނގުނީ ކޮޓަރިއަށްގޮސް އުޅުނު އިރު، އަހަރެމެންގެ ހެދުމުގައި ލޭ ޖެހިފައި ހުރުމުންނެވެ. އަޅައެއް ނުލަމެވެ. ރުފިޔާކޮޅު ލިބިއްޖެއެވެ.

ޖެހިގެން އައި ދުވަހެވެ. ރަށުކޮޅުން ހުއްޓާނުލާ އެބަ ގުޅައެވެ. މަންމަވެސް އެހާވަރަށް އެބަ ގުޅައެވެ. ބޮޑުބެވެސް ގުޅާފާ އޮތީ އެވަރަކަށް ނޫނެވެ. އަހަރެން އަޅައެއް ނުލަމެވެ. އެއީ އަހަރެން ބާކީކޮށްފައި ތިބި ބައެކެވެ. އެކަމަކު އެދުވަހުގެ އަސުރު ވީ އިރުވެސް އެ ފޯނުތަކަށް މަޑު ޖެހުމެއް ނާދެއެވެ. ކޮންމެވެސް ވަރެއްގެ ނުތަނަވަސްކަމެއް ހިތުގައި އުފެދުނެވެ. އެއީ އެއިން އެއްވެސް ފަހަރަކު ބައްޕައެއް އަހަންނަށް ގުޅާފައެއް ނެތެވެ. 

ނަމްނަގެ ފޯނަށް ޖަވާބު ނުދީ އަހަރެން ޖަވާބުދިނީ އަހަރެންގެ ބޮޑުބެގެ ފޯނަށެވެ. ފޯނު ނެގިގޮތަށް އަހަންނާއި ދިމާލަށް އެއްޗެހިކިޔަން ފެށިއެވެ. އެއީ ދެން އާދައެއްތާއެވެ. އަހަރެންނަށް އެއީ އައުކަމެއް ނޫނެވެ. ނަމަވެސް ހައިރާންވީ އެ އަޑުގައި ވާ ހިތްދަތިކަމުގެ އަސަރެވެ. އަހަންނާ ދިމާލަށް ކިޔަން ހުރި އެއްޗެހި ކިޔާ ނިމުމުން ބޮޑުބެ ދޭން ބޭނުންވި ހަބަރު ދިނެވެ. އެއީ ރޭގައި މޫނު އަޅައިގެން ތިބި ބަޔަކު، އަހަރެންގެ ބައްޕައަށް ހަމަލާދީ އަނިޔާކޮށްފައި އޮތުމުން، ހޮސްޕިޓަލުގައި ފަރުވާދެމުން ދަނިކޮށް ނިޔާވި ވާހަކައެވެ. ބައްޕަ މާލެ އައިސް އުޅޭކަމެއް އަހަރެންނަކަށް ނޭނގެއެވެ. އެކަމަކު އެބުނި އެއްޗަކުން ކޮންމެވެސް ވަރަކަށް އަހަރެންގެ ހިތަށް އުނދަގޫވިއެވެ.

އަހަރެން އަވަސްވެގަތީ ހޮސްޕިޓަލާއި ދިމާލަށް ދާށެވެ. އެއިރު ނަސީބަކުން އަދި ބައްޕަގެ ފުރާނަ ނެތް މަސްގަނޑު ހޮސްޕިޓަލަކުން ނުނެރެއެވެ. ލައިގެން އޮތް ގަމީސްވެސް އޮތީ އޮތް ގޮތަށެވެ. އެކަމަކު އެ ގަމީހުން އަހަރެންގެ ހިތް ކުދިކުދިވެގެން ދިޔައެވެ. އެއީ ރޭގައި އަހަރެމެން "ހޭއަރުވާލި" މުސްކުޅި މީހާ ލައިގެން ހުރި ގަމީހެވެ. އާނއެކެވެ! އެއީ އަހަރެންގެ ބައްޕައެވެ. ހިސާބަކަށް ހަމައިގައި ނެތުމުން، އަހަރެންނަށް އައިރަކު އެއީ ކާކުކަމެއް ވަކި ކުރާކަށް ނޭނގުނެވެ. ނަމަވެސް އެއީ ހަމަ އޭނައެވެ! 

ގޮތެއް ފޮތެއް ނެތިގެން، އެގޮތް މިގޮތަށް އުޅެމުން، އެތައް ބަޔަކަށް އެތައް ގެއްލުމެއް ދެމުން އަހަރެން އުޅުނެއްކަމަކު އެއީ އަހަންނަށް މާ ބޮޑުކަމެއް ކަމުގައެއް ނުވިއެވެ. ނަމަވެސް އަހަރެންގެ އަމަލެއްގެ ޝިކާރައަކަށް އަހަރެންގެ ބައްޕަ ވެގެން ގޮސްދާނެކަމަށް ދުވަހަކުވެސް ހިޔެއް ނުކުރަމެވެ. އެފަކީރު އެވީ ހަމަ ރަނގަޅަށްވެސް ޝިކާރައަކަށެވެ. އެފަކީރުގެ ފުރާނަވެސް އެ ދިޔައީ އަހަރެންގެ ސަބަބުންނެވެ. ހިފެހެއްޓުމެއް ނެތް ކަރުނަ އަހަރެންގެ ލޮލުން އޮހޮރިގަތީ އަސަރާއި ޖަޒުބާތާއި އެކުގައެވެ. އެއީ އަހަރެންގެ ހަޔާތް ބަދަލުކޮށްލި ދުވަހެކެވެ. އެންމެންގެ ކުރިމަތީގައި އަހަރެން އިއުތިރާފުވީމެވެ. އަމިއްލައަށް ފުލުހަށް ހާޒިރުވެ އަދަބު ލިބިގަތީމެވެ. އުލުން އިސްލާހުކުރުމަށް އަޒުމް ކަނޑައެޅީމެވެ.