އިންޑިޔާގެ ވެރިރަށް ނިއު ދިއްލީގައި އޮކްސިޖަން ނުލިބުމުގެ ސަބަބުން އެތައް ސަތޭކަ މީހުނެއް މަރުވަމުންދާ މިދަނޑިވަޅުގައި އެ ސިޓީގައި އިތުރު އެހެން ބޮޑު ހާސްކަމެއް އުފެދިއްޖެއެވެ.
ޕަންޖާބުން ދިއްލީއަށް ފެން ފޯރުކޮށްދިނުމުގައި ދަތިތަކެއް ކުރިމަތިވެފައިވާ ކަމަށް އިންޑިޔާގެ ރިޕޯޓުތައް ބުނެއެވެ. މި ދަތިތަކުގެ ސަބަބުން ކުރިއަށް އޮތް ދުވަސްތަކުގައި ދިއްލީއަށް ފެން ލިބުމުގައި ދަތިތަކާއި ކުރިމަތިވާނެ ކަމަށްވެސް ވަނީ ބުނެފައެވެ.
ދިއްލީއަށް ފެން ފޯރުކޮށްދިނުމުގައި ދިމާވެފައިވާ މި ދަތިތައް އަވަހަށް ހައްލު ނުކުރެވިއްޖެ ނަމަ ދިއްލީގެ ރައްޔިތުންނަށް އެތަކެއް އުދަނގުލަކާއި ކުރިމަތިލާން ޖެހޭނެއެވެ. އަދި މީގެއިތުރުން ހޮސްޕިޓަލުތަކަށް ފެން ފޯރުކޮށްދިނުން ވެސް މެދުކަނޑާލަން ޖެހިދާނެ ކަމަށް ވެސް އިންޑިޔާގެ ރިޕޯޓުތައް ބުނެއެވެ.
ޔަމުނާ ކޯރުގެ ފެނުގެ ލެވެލް ދަށްވެ ދިއްލީގެ އެކި ސަރަހައްދުތަކުގައި މިހާރު ވެސް ބޭނުން ކުރަމުންދަނީ ސަޕްލައި ފެނެވެ. އެހެންކަމުން ފެން ސަޕްލައިކޮށްދިނުމުގައި މި ދިމާވި މައްސަލައިގެ ސަބަބުން ދިއްލީއަށް ބޯފެން ލިބޭނެ މަގެއް ނޯންނާނެއެވެ. އެކަމަށް ހައްލު ހޯދުމަށް ޑީޖޭބީއިން ދަނީ މިހާރު ވެސް މަސައްކަތް ކުރަމުންނެވެ.