އެވެނި މީހަކު، މީހަކާ އިންނަނީ ކޮން އިރަކުންތޯ އަހާލުމަކީ އަހަރުމެންގެ ތެރޭގައި ޢާއްމު ކަމެކެވެ. ޚާއްސަކޮށް ނޫކަށިފުރައިގެ ޒުވާނުންނަށް އަމާޒުކޮށް މިފަދަ ސުވާލު ކުރެވެއެވެ. ކައިވެންޏެއް ކުރަނީ ކޮންއިރަކުންތޯއާއި ޒަވާޖީ ޙަޔާތެއް ފެށުމަށް ވިސްނުންހުރީ ކިހިނެއްތޯ ބަލައިލާށެވެ. 'ސީރިއަސް' މާނައެއްގައި ނޫނަސް މިފަދައިން ސުވާލު ކުރެއެވެ. ނަމަވެސް ތަކުރާރުކޮށް މިފަދަ ސުވާލުތައް އަޑުއަހަން ޖެހުމުން، އެކަން ރައްދުވާ ފަރާތަށް ނޭދެވޭ އަސަރުތަކެއް ކުރުމަކީ އެކަށީގެންވާ ކަމެކެވެ.
ކައިވެންޏެއް ނުކޮށް މީހަކު ހުންނަނީ ކީއްވެކަމެއް އަހަރުމެންނަކަށް ނޭނގޭނެއެވެ. ފަހަރެއްގައި، އެފަދަ ގުޅުމަކުން ލިބުނު ވޭނަކާއި ހިތްދަތިކަމެއްގެ ސަބަބުން ކައިވެންޏެއް ކުރުމަށް ފަސްޖެހިދާނެއެވެ. ތިމާ މީހާ ބޭނުންވާ ކަހަލަ، ނުވަތަ ލޯބިވާ ބައިވެރިއަކާ ބައްދަލު ނުވާތީވެސް ކައިވެންޏަކާ މެދު ނުވިސްނަފާނެއެވެ. ކިޔެވުމަށް، ވަޒީފާގެ މައިދާނުގައި ހަރުދަނާވުމަށް، ނުވަތަ އަމިއްލައަށް ހާސިލް ކުރަން ބޭނުންވާ ލަނޑުދަނޑިއެއް އޮތަތީވެސް ކައިވެނިކުރުން ލަސްކޮށްފައި އޮވެދާނެއެވެ. ހަމައެހެންމެ، ކިތަށްމެ ބޭނުންވިޔަސް، ކައިވެނިކުރަން އެކަށޭނެ މީހެއް، އެމީހެއްގެ ނަޒަރުގައި އަދި ނެތުމަކީވެސް ކައިވެނި ނުކޮށް ހުރެދާނެ ސަބަބެކެވެ.
ބައެއް މީހުނަށް މިއީ އެއްވެސް ސުވާލަކަށް ނުވެދާނެއެވެ. މީހަކާ އިންނަނީ ކޮން އިރަކުންތޯ، އެހެން މީހަކު އަހާލިޔަސް މާބޮޑު ކަމަކަށް ނުވެދާނެއެވެ. ނަމަވެސް ހުރިހާ އެންމެން އެއްގޮތެއްވެސް ނުވާނެއެވެ. މި ސުވާލު ތަކުރާރުކޮށް އަޑުއަހަން ޖެހުމުން އުނދަގޫވާ މީހުން އުޅެދާނެކަމީ ޤަބޫލުކުރަން ޖެހޭ ހަޤީޤަތެކެވެ. ނޭދެވޭ އަސަރުތަކެއް މީހަކަށް ކޮށްފާނެކަމީ ދަންނަންޖެހޭ ކަމެކެވެ. ވަރަށް 'ސީރިއަސް' ނަޒަރަކުން މި ސުވާލު އަމާޒުވާނަމަ، ކައިވެންޏެއް ކުރުމަށް ޕްރެޝަރ އުފެދެން ފަށާފާނެއެވެ. އެ ސުވާލުތަކުން ސަލާމަތްވުމަށް، މާބޮޑު ވިސްނުންތެރިކަމެއް ނެތި، ކައިވެންޏަކާ ހިސާބަށް ހިނގައިދާނެއެވެ. މީގެއިތުރުން، "ތިޔަހެން ހުއްޓާ އުމުރު ހުސްވާނި" "އުމުރުން ދުވަސްވީމަ އިންނާނެ މީހަކުވެސް ނުވާނެ" މިފަދަ ޖުމުލަތައް ކުރިމަތިވާން ފެށުމުން ހިތުގައި ބިރެއް އުފެދިދާނެއެވެ. އުމުރުން ދޮށީވާއިރުވެސް، އިންނާނެ މީހެއް ނުލިބުނުކަމުގެ އިޙްސާސް ކުރުވަން ފަށާފާނެއެވެ. ކައިވެނި ކުރަންވީ އުމުރު ފަހަނައަޅާ ދިޔައީކަމަށް ޤަބޫލުކުރެވެން ފަށާފާނެއެވެ. ނަތީޖާއެއްގެ ގޮތުން، އެ ޙިޔާލުތަކުގައި މީހާ ބޯހާސްވެ، އެކަމާ މާބޮޑަށް ވިސްނެން ފެށުމަކީ ވެދާނެކަމެކެވެ.
ކައިވެނު ކުރަން ބޭނުންނަމަވެސް، އެކަށޭނެ ބައިވެރިއެއް ފެނިފައިނުވާތީ ނުވަތަ އަދި ބައްދަލުވެފައި ނުވާތީ ކައިވެނި ނުކޮށް ހުންނަ މީހަކަށް، މިފަދަ ސުވާލުތައް ރައްދުވާނަމަ ކުރެވޭނީ ކޮން ކަހަލަ އިޙްސާސެއް ހެއްޔެވެ؟ ކައިވެނި ނުކޮށް ހުރުމަކީ އެމީހެއްގެ އަމިއްލަ އިޙްތިޔާރުގައި އޮތްކަމަކަށް ނުވެދާނެއެވެ. އެއް އުމުރެއްގެ ކުދިން ކައިވެނިކުރާތަން ފެނި، އެކަމާ ވިސްނަން ހުއްޓާ، މީހަކާ އިންނާކަށް ނުވޭހޭ އެހުމުން އިތުރަށް ވިސްނޭނެއެވެ. މާފުންކޮށް ވިސްނޭނެއެވެ. އެންމެން ކައިވެނި ކުރިއިރުވެސް، ތިމަންނަ ހުރިގޮތަށް މިހުރިއްޔޭ ހިތައް އަރާނެއެވެ. އެހެންމީހުންނާ އަމިއްލަ ނަފުސު އަޅާކިޔޭނެއެވެ. ދިރިއުޅުމުގެ ރޭހުގައި އެހެންމީހުންނަށްވުރެ މާފަހަތުގައި އުޅެވޭ ކަހަލަ އިޙްސާސްއެއް ކުރެވޭނެއެވެ. އެހެންމީހުންނާ އަޅާބަލާފައި، ތިމަންނައަކީ ނާކާމިޔާބު މީހެއްކަމަށް ސިފަވާން ފަށާފާނެއެވެ.
ޒަވާޖީ ޙަޔާތަކާއި ގުޅޭގޮތުން ތަކުރާރުކޮށް ކުރެވޭ ސުވާލުތަކުން މިފަދަ ނޭދެވޭ އަސަރުތަކެއް ކޮށްފާނެއެވެ. ކައިވެނި ނުކުރުމުގެ ފަހަތުގައި އޮންނަ ސަބަބާއި، ކައިވެންޏެއް ކުރާނެ ވަގުތު އެނގޭނީ ހަމަ އެމީހަކަށެވެ. ވަގުތު ޖެހުމުން އެކަންވެސް ކުރާނެއެވެ. ދުވަސްތަކެއް ކޮށްފައި ދިމާވާ ރައްޓެއްސަކާ، ނުވަތަ ގާތްމީހަކާ އެފަދައިން ސުވާލެއް ނުކުރާށެކޭ ނޫނެވެ. ނަމަވެސް މީހަކު ބޯހާސްވާ މިންވަރަށް، ހާސްވާނެ އުސްލޫބަކުން ވާހަކަ ބައްޓަންކޮށްގެން، ޕްރެޝަރައިޒް ވާވަރަށް އެ ސުވާލު ކުރުން ރަނގަޅެއް ނޫނެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން