އިންޑިޔާގެ އުއްތަރަ ޕްރަދޭޝްގައި އުމުރުން 22 އަހަރުގެ ފިރިހެނެއް، ވަޅަކަށް ވެއްޓި މަރުވި ހާދިސާއަށް ގިނަބައެއްގެ ސަމާލުކަން ވަނީ ލިބިފައެވެ. އުމުރުން 22 އަހަރުގެ ރާހުލް ކުމާރަކީ ބިޒްނަސް އެޑްމިނިސްޓްރޭޝަންގެ ދާއިރާއިން ޑިގްރީ ހާސިލްކުރަމުން ދިޔަ ދަރިވަރެކެވެ.

އިންޑިޔާގެ ރިޕޯޓުތައް ބުނާގޮތުގައި ރާހުލް ވެއްޓިފައި ވަނީ 160 ފޫޓު ފުން ވަޅަކަށެވެ. އޭނާ ވެއްޓުނު ސަރަހައްދުގައި ހުރި ސީސީޓީވީ ކެމެރާއަކުން ފެންނަ ގޮތުގައި އޭނާ އައީ ފޯނާ ކުޅެމުންނެވެ. މާ ދުރުންސުރެ އޭނާ ފޯނާ ކުޅެމުން އަންނަ މަންޒަރު ފެނެއެވެ. އަދި ފައިދަށަށް ބަލާވެސް ނުލާ، އިސްވެސް އުފުލާ ނުލާ، ފޯނުގެ ތެރެއަށް ގެއްލިފައި ކަހަލަ ގޮތަކަށް ހިނގަމުން އައިސް، އެ ވަޅަށް ވެއްޓޭތަން ފެނެއެވެ. އަދި ވަޅުގެ ކުރިއަށް ފެންގަނޑަކަށްވެސް އޭނާއަށް އެރެވެއެވެ. ނަމަވެސް އޭނާއަށް ފެންގަނޑަކަށް އެރުނުކަންވެސް އިހުސާސް ނުކުރެވި ހުރިކަން ސީސީޓީވީ ފުޓޭޖުން ހާމަ ވެއެވެ.

އޭނާގެ ބައެއް އެކުވެރިންނާ ހަވާލާދީ ރިޕޯޓުކޮށްފައިވާ ގޮތުގައި ރާހުލް އަކީ ފޯނު ކުޅުމަށް ދެވި ހިފާފައިވާ ޒުވާނެކެވެ. އާއްމުކޮށް އޭނާ ފޯނުން ކުޅެނީ ސީ.އޯ.ސީ (ކްލޭޝް އޮފް ކްލޭންސް) ނަމަކަށް ކިޔާ ގޭމެއް ކަމަށް ވެއެވެ. އަދި އޭނާ ވަޅަށް ވެއްޓުނު އިރުވެސް އައީ އެ ގޭމު ކުޅެމުންކަމަށް އޭނާގެ ބައެއް އެކުވެރިން ވަނީ ކިޔައިދީފައެވެ. ރާހުލް އަކީ ކޮލެޖުގައިވެސް، ކިޔަވައިދޭ ގަޑީގައިވެސް، އަދި ބްރޭކު ގަޑިތަކުގައި އަބަދުހެން ފޯނު ހިފައިގެން އިންނަ ކުއްޖެކެވެ.

ރާހުލްގެ އާއިލާއިން ބުނާ ގޮތުގައި އޭނާ އަކީ ވަރަށް ބަސްމަދު މަޑުމައިތިރި މީހެކެވެ. މިކަމުގެ ސިއްރަކީ އޭނާ ފޯނަށް ދޭ ސަމާލުކަން ބޮޑުވުން ކަމުގައިވެސް ވަނީ ފާހަގަ ކޮށްފައެވެ. "މަޑުން އިންނާތީ އެއްމެ ކުޑައިރުއްސުރެ ފޯނު ދީފަ އޮންނާނީ، ބަސްއަހާތީ! ޝަކުވާއެއް ނުކުރާނެ، ކުދިންނާ އެކު ބޭރަކަށް ނުދާނެ، ސަކަރާތްޖަހާ ހިފިނުހުރެވިގެން ނޫޅޭނެ! އެއީ އެސޮރު އަބަދުވެސް ފޯނު ހިފައިގެން އޭގެ ތެރެއަށް ވަދެގެން އިންނާތީ!" ރާހުލް ގެ ބައްޕަ ކިޔައި ދިނެވެ.

"އެހެން އަބަދުވެސް މަޑުން އިންނާތީ ފޯނު ދެނީ، ހީކުރިން އެއީ ވަރަށް ރަނގަޅުކަމެކޭ، މަޑުން ހުންނާތީ! އެކަމަކު އެއީ މުޅިން ރަނގަޅު ގޮތެއް ނޫންކަން މިއަދު އަހަރެމެންނަށް އެނގިއްޖެ!" ރާހުލް ގެ މަންމަ މީޑިއާތަކަށް ކިޔައިދީފައި ވެއެވެ.

ކޮންމެއަކަސް މި ހާދިސާއިންވެސް އަހަރެމެންނަށް ލިބެނީ އިބުރަތްތެރި ފިލާވަޅެކެވެ. އުމުރުން 22 އަހަރުގެ ފިރިހެނަކު، ފޯނަށް ގެއްލި، އޭގެ ތެރެއަށް ވަދެ އިނުމުގެ ސަބަބުން ފުރާނަ ދިޔުމަކީ އާދައިގެ ކަމެއް ނޫނެވެ. އިންސާނާގެ ސަމާލުކަމާއި ކުޑަވެ، ހޭވެރިކަންވެސް ފިލާ ދާވަރަށް ފޯނުގެ ތެރެއަށް ގަރަގުވިޔަ ނުދޭށެވެ. މިއަދުވެސް ބައެއް ކުޑަކުދިން ފޯނު ކުޅެން އިންނަ އިރު، އެހެން މީހަކު ގޮވައޭވެސް ހީނުވެއެވެ. ކައިރީގައި ވާނުވާއެއްވެސް ނޭނގެއެވެ. މިއީ ނުރައްކާތެރި ސިގުނަލެކެވެ. މާދަމާ އެދަރިންގެ ސަމާލުކަމާއި ހޭވެރިކަން އެފަދައިން ކުޑަވުމުވެ ބިރުވެރިކަން އެބަ އޮތެވެ! އާދޭހެވެ! ފޯނު ދިނުމުން، ބަސް އަހައިގެން މަޑުން ތިބެ ދާނެއެވެ. ނަމަވެސް އެއީ އެއްމެ ރަނގަޅު ގޮތް ނޫންކަން އިހުސާސް ކުރެވޭ ބަޔަކުވެސް އުޅެއެވެ. ނަމަވެސް އެއީ ހާދިސާއެއް ހިނގުމުންނެވެ. ކަމެއް ދިމައިވުމުންނެވެ. އެހެންކަމުން ކަމެއް ވަންދެއް މަޑުނުކޮށް ތިބާގެ ދަރިންގެ ސަލާމަތާއި ރައްކާތެރިކަން ތިބާ އިސްކުރާށެވެ. ފޯނުވެސް ދޭންވީއެވެ. ނަމަވެސް ހައްދެއް އޮންނަން ވާނެއެވެ. އެއަށް މައިމީހާގެ ކޮންޓްރޯލު އޮންނަން ވާނެއެވެ. އެއީ ދުވަހުގެ ވަރަށް ކުޑަ ވަގުތުކޮޅެއް ކަމުގައި ހަދާށެވެ. އަދި އެއީ އާދައެއް ކަމުގައި ނުހަދާށެވެ! މިއަދު އެދަރިން މަޑުން ތިބެފާނެއެވެ! މާދަމާ އޭގެ ސަބަބުން ތިބާގެ ދަރިއެއްގެ ފުރާނަ ދާން ތިބާ ރުހޭނަން ހެއްޔެވެ؟