ރޯދަ ވީއްލާނޭ ތަކެތި ތައްޔާރުކޮށްް ބަދިގެއިން އަވަދިވެގެން އައިސް ފޯނު ބަލައިލީމެވެ. ރައްޓެހިންގެ ވައިބަރ ގުރޫޕަށް ލައްކަ މެސެޖު އައިސް ހުރީމާ ފައްޓައިގެން ނިމެންދެން ކިޔައިފީމެވެ. އޭގައި އޮތީ އެންމެން އެއްކޮށް ތަރާވީޙަށް ދާން ބޭނުންވާ ވާހަކައެވެ. 5 އަންހެން ރަޙުމަތްތެރިން ހަދާފައިވާ އެ ވައިބަރ ގުރޫޕުގައި ރާވާފައިއޮތީ މިރޭ ތަރާވީޙަށް ދިއުމަށެވެ. އަހަރެންނަކީ ގޭގައި ތަރާވީޙްކުރާ މީހެކެވެ. އަންހެނުން ނަމާދުކުރުން ރަނގަޅީ ގޭގައިކަމަށް އަހަރެންނަށް އަޑުއިވިފައި އޮތީމައެވެ. ނަމަވެސް ރައްޓެހިން ވަރަށް ޖޯޝާއި ފޯރީގައި އެކަމާ ގުޅޭ ވާހަކަތައް ދެއްކުމުން އަހަރެންނަށް އެއްޗެއް ބުނާކަށް ނުކެރުނެވެ. ޕްލޭން ފަނިކޮށްލީ ކަމަށް ބުނެ، އަހަރެންގެ ބޮލަށް އެކަން ޖަހާފައި ރުޅިއައިސް ތިބެދާނެތީ އަހަރެންވެސް އެކަމަށް އެއްބަސްކަމަށް ގްރޫޕުގައި ބުނީމެވެ.

ކުއްލިއަކަށް އަހަރުމެންގެ އެކުވެރި ސާރާގެ މެސެޖެއް އަނެއްކާވެސް އަތުވެއްޖެއެވެ. ތަރާވީޙް ކުރިޔަށްދާނީ ސާރާގެ ގޭގައި ކަމަށާއި، އޭނާގެ މައިންބަފައިން ފަރާތުން އެކަމަށް ހުއްދަ ލިބިއްޖެކަމަށް ބުނެފައިވެއެވެ. އަހަރެންވީ އުފަލެއްގެ ވާހަކަ ރަނގަޅުވާނީ ނުދެއްކިއްޔާއެވެ. އަހަރެންްނަށް ރަނގަޅީވެސް ގެއަކަށް ދިއައްޔާކަމަށް ބުނެ ގުރޫޕަށް މެސެޖެއް ފޮނުވާލީމެވެ. ގިނަ މީހުންގެ ތެރެއަށް ގޮސް އުޅުމަކީ އަހަރެންނަށް އެހާ ފަސޭހަކަމެއްވެސް ނޫންވީމައެވެ. "ކޮންމެ މީހަކުވެސް އެމީހަކު އެންމެ ބޭނުން އެއްޗެއް ހިފައިން އަންނައިރު އާދޭ. 9 ޖަހާކަށް ހާއިރަށް އޯކޭ އެއްނު؟" އިރުކޮޅަކުން ނުޙާގެ މެސެޖެއްވެސް ގުރޫޕަށް އައެވެ. މީހުން ތަރާވީޙަށް ދަނީ 9 ޖަހާއިރަކު ނޫނެވެ. އިޝާ ނަމާދު ކޮށްގެން ހަމަ ފަށަންވީ ނޫންހެއްޔެވެ؟ އަތްމުނިމުނި ކަވައިގަނެގެން އަހަރެން އެހެން އަހާލަން މެސެޖެއް ލިޔަނިކޮށް ފާތުމަގެ މެސެޖެއް އައެވެ. އޭނައަށްވެސް އަވަދިވާނީ އެހާއިރަށްކަމަށް ބުންޏެވެ. އެމީހުން ކުޑަކޮށް ބިޒީކަމަށް ބަލާފައި، އަހަރެން އިތުރަށް އެއްޗެއް ނުބުނަމެވެ. 9 ޖަހާއިރަށް ސާރާމެން ގެއަށް ތަރާވީޙަށް ދިއުމަށް އަހަރެން ތައްޔާރުވާން ފެށީއެވެ.

މި ރަމަޟާން މަހަށް ޚާއްސަކޮށް އޯޑަރ ކޮށްގެން ގެނަ މުޞައްލައަށް އިސްޓާކީނާއި ދޮޅި ލާފައި ތައްޔާރުކޮށްލީމެވެ. އެމީހަކު އެންމެ ބޭނުން އެއްޗެކޭ ބުނާއިރު، ނަމާދުކުރަން އެންމެ ބޭނުންވާނީ މުޞައްލަ ނޫން ދެން ކޯއްޗެއް ހެއްޔެވެ؟ އެފަދައިން ބުނެފައި އިނީތީވެސް އަހަރެންގެ ގާތަށް ހިނިއައެވެ. އެހެން ނުބުންޏަސް ނަމާދުކުރާ ސާމާނު ދެން ގެންދާނެތާއެވެ. ކޮންމެއަކަސް އިޝާ ނަމާދުކޮށްގެން އަހަރެން އިނީ ޤުރުޢާން ކިޔަވާށެވެ. ސުންނަތް ކޮށްފައި، 9 ޖަހަން ކައިރިވީމާ ސާރާގެއަށް ދާން ހިނގައިގަތީ ވަރަށް ހިތްހަމަޖެހިގެން ހުރެއެވެ. 

ސާރާގެ ގެއަށް ވަދެވުނުއިރު، އަހަރެން ނުލާ ހުރިހާ އެކުވެރިން ތިބީ ސިޓިން ރޫމުގައެވެ. އަހަރެން ވަނުމުން ހަމަ އެއޮތްގެން ބަލަނީއެވެ. ރަނގަޅަށް ވަދެ ބަލައިލިއިރު، ކުޑަ މޭޒެއް މަތީގައި ހުދު ފޮތިގަނޑެއް އަޅާފައި، އޭގެ މަތީ އެހުރީ ހުސް ކާތަކެއްޗެވެ. ހަވާދުލީ ބިހާއި ބިސްކޯދު ޕުޑިންނެވެ. ހަނޑުލު ގުޅައާއި ރޯސްޕާނެވެ. އަހަރެން ހިފައިން އައީ ކޮން އެއްޗެއްތޯ އެހެމުން އަހަރެންނަށް ދައްކާލެވުނީ މުޞައްލައެވެ. މިމީހުން ގުރޫޕުގައި ދެއްކީ މި ތަރާވީޙުގެ ވާހަކައެވެ. މިކަމަށް ތަރާވިސް ކިޔާކަމެއް އަހަރެން ކުރިން ނުދެނަހުރީމެވެ. ވީގޮތް ކިޔައިދިނުމުން އެންމެން ތިބެގެން އެބަ ހެޔެވެ. އަހަރެންވާ ބެދުނީ ބޮޑު ލަދެއްގައެވެ. އެހެންވީމާ އޭރު ބުނެފައި އެވަނީ ކޮންމެ މީހަކުވެސް އެމީހަކު ބޭނުންވާ ކާއެއްޗެއް ގެންނަވާހަކަތާއެވެ. އަހަަރެންވާ މިއައީ މުޞައްލަ ހިފައިންނެވެ. ހެވެއް ނޫން ހެއްޔެވެ. އަހަރެން އައީ ތަރާވީޙް ކުރަން ވިއްޔާއެވެ.