ބަރަކާތްތެރި ރަމަޟާން މަހުގެ ދުވަސްތައް ކުރިޔަށްދާއިރު އަހަރުމެން ހަނދާނުގައި ބަހައްޓަންޖެހޭ ވަރަށް މުހިންމު ކަމެއްވެއެވެ. އެއީ އިސްލާމްދީނުގެ ފަސް ރުކުނުގެ ތެރެއިން އެއް ރުކުން ކަމުގައިވާ ޒަކާތް ދެއްކުމެވެ. ފިޠުރު ޒަކާތް ނުވަތަ زكاة الفطر އަކީ ރަމަޟާންމަހު ރޯދަހިފައި ނިމުމުން ޢީދު ނަމާދަށް މީހުން ނުކުތުމުގެ ކުރިން، އޭނާއާއި އޭނާގެ ބެލުމުގެ ދަށުގައިވާ މީހުންނަށް ޢީދުދުވަހާއި އެދުވަހުގެރޭ ބޭނުންވާ މިންވަރަށްވުރެ އިތުރަށް ހުރި ކޮންމެ މުސްލިމެއްގެ މައްޗަށް އޭނާގެ ފަރާތުންނާއި، އޭނާގެ ބެލުމުގެ ދަށުގައިވާ މީހުންގެ ފަރާތުން ނެރުން ފަރުޟުކުރައްވާފައިވާ އެއްޗެކެވެ.

ފިޠުރު ޒަކާތް ފަރުޟުކުރެއްވީ ދެ ޙިކްމަތަކަށްޓަކައެވެ. ފުރަތަމަ ޙިކްމަތަކީ ރޯދަހިފައިގެން ތިބެ މުސްލިމުންނަށް ދެކެވޭ ބޭކާރު ވާހަކަތަކާ، ހުތުރު ވާހަކަތުން ރޯދައަށް ލިބޭ ކިލަނބުންކަމުން ރޯދަ ޠާހިރު ކުރުމެވެ. އަނެއް ޙިކްމަތަކީ ރަމަޟާންމަސް ނިމުމާވިދިގެން އަންނަ ފިޠުރު ޢީދުގެ އުފަލުގައި މުސްލިމުންގެ ތެރެއިން ފަޤީރުންނާއި މިސްކީނުން ބައިވެރިކުރުމުގެ ގޮތުން އެމީހުންނަށް އެދުވަހު ކާނެ އެއްޗެއް ދިނުމެވެ.

ދިވެހިރާއްޖޭގައި ފިޠުރު ޒަކާތް ނެރެންޖެހޭ މިންވަރަކީ 2.4 ކިލޯގެ މިންވަރެވެ. އަދި ޒަކާތް ނެރެންޖެހެނީ އެބަޔަކު އެ އަހަރު ތެރޭގައި ބަނޑުކެއުމުގެ ގޮތުން އާންމުކޮށް ކައިއުޅުނު ގޮވާމުގެ ބާވަތަށް ބަލައިގެންނެވެ. އެގޮތުން އަގުމަގު ކުރާއިރު، އެ މިންވަރުން އާދައިގެ ހަނޑުލުން ނަމަ 12 ރުފިޔާ، ތައިލެންޑް ހުދު ހަނޑުލުންނަމަ 62 ރުފިޔާ، ރަތް ހަނޑުލުންނަމަ 86 ރުފިޔާ، އާދައިގެ ބާސްމަތީ ހަނޑުލުންނަމަ 74 ރުފިޔާ، މޮޅު ބާސްމަތީ ހަނޑުލުންނަމަ 100 ރުފިޔާ، އެންމެ މޮޅު ބާސްމަތީ ހަނޑުލުންނަމަ 133 ރުފިޔާ، އާދައިގެ ފުށުންނަމަ 10 ރުފިޔާ އަދި އާޓާ ފުށުންނަމަ 75 ރުފިޔާއެވެ.

ރާއްޖޭގައި ޒަކާތު ހައުސްގެ ބެލުމުގެ ދަށުން ކޮންމެ ރަށެއްގެ ރަށު ކައުންސިލުން ޒަކާތް ބަލައިގަތުމުގެ އިންތިޒާމް ހަމަޖައްސާފައިވާއިރު، ގޮވާމުގެ ބާވަތުންވެސް އަދި އެ މިންވަރަށް ޖެހޭ ފައިސާއިންވެސް ޒަކާތް ދެއްކޭނެއެވެ. އަދި ޒަކާތް ދެއްކުމަށް ކައުންސިލަށް ދިޔުމުގެ ބަދަލުގައި ބައެއް ކައުންސިލްތަކުން އެކައުންޓަށް ފައިސާ ޓްރާންސްފަރ ކޮށްގެން ޒަކާތް ދެއްކޭނޭ ގޮތްވެސް ވަނީ ހަދާފައެވެ. މީގެ އިތުރުން އޮންލައިންކޮށް ޒަކާތް ދެއްކޭނޭ ގޮތް ބަނޑޭރި ޕޭ ، ފަހި ޕޭ، އެމް.އައި.ބީ، ބީ.އެމް.އެލް، ދިރާގު އަދި އުރީދޫއިންވަނީ ހަމަޖައްސާފައެވެ.