ރޯދަމަހު ތިބާގެ ކެއުންތަކުގައި މޭވާގެ ބާވަތްތައް ހިމެނުމަކީ ހަށިގަނޑު ރަނގަޅު ސިއްޙަތެއްގައި ބެހެއްޓުމަށާއި، ހަކަތަ ދެމެހެއްޓުމަށާއި، އަދި މުހިންމު ނިއުޓްރިއަންޓްސް ލިބިގަތުމަށް ކޮންމެހެން ބޭނުންތެރި ކަމެކެވެ. ރޯދައަށް ހުންނައިރު، ހަށިގަނޑަށް ބޭނުންވާ މުޙިއްމު މާއްދާތަށް ހިމެނޭ ، ހަށިގަނޑުގައި ވަރުޖައްސައިދޭ ކާބޯތަކެތި ބޭނުންކުރުމަކީ ވަރަށް މުޙިއްމު ކަމެކެވެ. އެގޮތުން، ތިރީގައިވާ މޭވާއާއި ތަރުކާރީތަކަކީ ރޯދަމަހާއި އެނޫން މަސްމަހުގައި ވެސް ކެޔުން ރަނގަޅު ތަރުކާރީތަކެކެވެ.

ކަދުރު

ކަދުރަކީ ހަކުރުގެ ބާވަތްތައް (ގްލޫކޯސް، ފްރުކްޓޯސް، ސުކްރޯސް) ވަރަށް ގިނަ އަދަދަކަށް ހިމެނޭ އެއްޗެކެވެ. މީގެ ސަބަބުން ރޯދަވީއްލާއިރު ކަދުރު ކެއުމުން ހަށިގަނޑަށް ރަނގަޅަށް ހަކަތަ ލިއްބައިދެއެވެ. މީގެ އިތުރުން ޕޮޓޭސިއަމް، މެގްނީސިއަމް އަދި އަޔަން ވެސް ރަނގަޅު އަދަދަކަށް ލިއްބައިދެއެވެ. އަދި ފައިބަރގެ ސަބަބުން ކާނާ ހަޖަމުކުރުމަށްވެސް އެހީވެދެއެވެ.

ކަރާ

ކަރަލަކީ %90 ފެން ހިމެނޭ މޭވާއެކެވެ. މީގެ ސަބަބުން ކަރަލަކީ ރޯދަވީއްލުމަށާއި ހާރުކެއުމަށް ވަރަށް ރަނގަޅު އެއްޗެކެވެ. މީގެ އިތުރުން، ވިޓަމިން އޭ، ސީ، އަދި ލައިކޮޕީން ކިޔާ، ހިތުގެ ސިއްޙަތަށް ރަނގަޅު މާއްދާއެއް ހިމެނެއެވެ. އަދި ކަރަލަކީ، ކެލޮރީސް މަދު، ރަނގަޅަށް ބަނޑުފުރުަވައިލާ އެއްޗެކެވެ.

ދޮންކެޔޮ

ދޮންކޭލަކީ ޕޮޓޭސިއަމް ވަރަށް ގިނަ އަދަދަކަށް ހިމެނޭ މޭވާއެކެވެ. މީގެ ސަބަބުން ރޯދައަށް ހުންނައިރު ހަށިގަނޑުގައި ފެނުގެ މިންވަރު ހަމައަކަށް ބެހެއްޓުމަށް އެހީވެދެއެވެ. އަދި ހަކުރުގެ ބާވަތްތަކުން ހަކަތަ ލިއްބައިިދިނުމުގެ އިތުރުން ފައިބަރ ލިއްބައިދޭތީ، ބަނޑުހައިވުން ލަސްކޮށްދެއެވެ.

އާފަލު

އާފަލަކީ ފައިބަރގެ ބާވަތަކަށްވާ ޕެކްޓިން، ވަރަށް ގިނަ އަދަދަކަށް ލިއްބައިދޭ އެއްޗެކެވެ. މީގެ ސަބަބުން ކާނާ ހަޖަމުކުރުމަށް ފަސޭހަކޮށްދީ، ގިނަވަގުތަކަށް ބަނޑުހައިކަން ނައްތާލުމަށް އެހީވެދެއެވެ. މީގެ އިތުރުން ވިޓަމިން ސީ އާއި އެންޓިއޮކްސިޑެންޓްސްވެސް ލިއްބައިދެއެވެ.

މިފަދަ މޭވާތައް ކެއުމުގައި ހިމެނުމުން، ރޯދަ މަހުތެރޭގައި ހަށިގަނޑަށް ބޭނުންވާ ފެނާއި، ހަކަތައާއި އަދި އެހެނިހެން މާއްދާތައް ލިބިގަނެވޭނެއެވެ. ރޯދަމަހުގައި ތަފާތު ފަންޏާއި ފޮނިކާތަކެތި ތައްޔާރުކުރުމުގައި މި މޭވާތައް އެކި ގޮތްގޮތަށް ތައްޔާރުކުރެވިދާނެއެވެ.

ކިއުކަންބާ

ކިއުކަންބާގައި %95 ފެންހިމެނޭއިރު، ހަށިގަނޑަށް ބޭނުންވާ ވިޓަމިން ކޭ އަދި ޕޮޓޭސިއަމް ވެސް ކިއުކަންބާ މެދުވެރިކޮށް ލިބޭނެއެވެ. އެގޮތުން، ރޯދަ ވީއްލުމަށް ނުވަތަ ހާރު ކެޔުމަށް ތައްޔާރު ކުރާ ސެލެޑު އަދި ސޭންޑްވިސްގައި ކިޔުކަންބާ ހިމެނިދާނެއެވެ.

ފެހި ތަރުކާރީ

ސްޕިނަޗް، ކޭލް އަދި ލެޓިއުސް ފަދަ ފެހި ތަރުކާރީގައި ހަށިގަނޑަށް ބޭނުންވާ އަޔަން، ފައިބާ، ވިޓަމިން އޭ، ވިޓަމިން ސީ އަދި ކެލްޝިއަމް ހިމެއެވެ. މިއީ، އިންސާނާގެ ހަޖަމީ ނިޒާމާއި ވަރުބަލިކަން ކުޑަކުރުމަށް ބޭނުންވާ މުޙިއްމު މާއްދާތަކެކެވެ. މިފަދަ ފެހި ތަރުކާރީގެ ބާވަތްތަކަކީ ރޯދަ ވީއްލުމަށް ތައްޔާރުކުރާ ބޯކިބާ، ސޭންޑްވިޗް ފަދަ ތަކެތި ހެދުމުގައި ބޭނުންކުތެވިދާނެ ތަރުކާރިތަކެކެވެ.

ކެރެޓު

ކެރެޓަކީ ވިޓަމިން އޭ، ފައިބާ އަދި ހަށިގަނޑުގައި ދައުރުވާ ސެލްތަށް ހިމާއަށް ކުރުމަށް ބޭނުންވާ އެންޓިއޮކްސިޑަންޓްސް ހިމެނޭ ތަރުކާރިއެކެވެ. ރޯދަ ވީއްލުމަށް ތައްޔާރު ކުރާ އެކި ކަހަލަ ކާބޯތަކެތީގައި ކެރެޓު ބޭނުންކުރެވިދާނެއެވެ. އެގޮތުން، ޖޫސް ހެދުމާއި ސެލެޑުގައި ބޭނުންކުރުމުގެ އިތުރުން އާންމުކޮށް ކެޔުމަށް ގެންގުޅޭތަކެއްޗަށް ކެރެޓުކޮޅެއް ގާނާލުމަށްފަހު އަޅާލެވިދާނެއެވެ.

ޓޮމާޓޯ

ޓޮމާޓޯ ނުވަތަ ވިލާތު ބައްޓަކީ ވިޓަމިން ސީ، ޕޮޓޭސިއަމް އަދި ހިތުގެ ބަލިތަކުގެ ހިމާޔަތްކޮއްދިނުމަށް ބޭނުންވާ މުޙިއްމު އެންޓިއޮކްސިޑަންޓްސްއެއް ހިމެނޭ ތަރުކާރިއެކެވެ. އެގޮތުން، ރޯދަ ވީއްލުމަށް ނުވަތަ ހާރުކެޔުމަށް ތަފާތު ވައްތަރުގެ ރިހަ އަދި ސޯސްތަށް ތައްޔާރުކުރަމުންދާއިރު، ޓޮމާޓޯ ބޭނުންކުރެވިދާނެއެވެ.

ކައްޓަލަ

ކައްޓަލައަކީ ހަށގަނޑަށް ބޭނުންވާ ކޮންޕްލެކްސް ކާބޯހައިޑްރޭޓްސް، ފައިބާ އަދި ވިޓަމިން އޭ ހިމެނޭ ތަރުކާރީއެކެވެ. މި ތަރުކާރީ އަކީ ރޯދައަށް ހުންނައިރު ވަރުބަލިކަން ކުޑަކޮއްދިނުމުގައި އެހީތެރިވެދޭ ކާނާއެކެވެ. އެގޮތުން، ރޯދަ ވީއްލުމަށް އަދި ހާރު ކެޔުމަށް ކައްޓަލަ ފެނުކައްކައިގެން ނުވަތަ ފިހެގެން ތައްޔާރުކޮއްލެވިދާނެއެވެ.