މި އަހަރުގެ ބަރަކާތްތެރި ރަމަޟާންމަސް އަހަރުމެންނާ ބައްދަލުވެ، ފާއިތުވަމުން އައިސް އެމަހުގެ އެންމެ މާތް ދުވަސްތަކާ ބައްދަލުވާން ދެން މާގިނަ ދުވަހެއްނެތެވެ. މި ދަންނަވަނީ ފަހު ދިހައިގެ ވާހަކައެވެ. ހަތަރުވަރަކަށް ދުވަސްފަހުން ފަހު ދިހައަކާ ބައްދަލުކުރާއިރު، އަމިއްލަ ނަފްސާ ވަރަށް މުހިންމު ސުވާލެއް ކޮއްލަން އެބަ ޖެހެއެވެ. ތިބާ ފަހު ދިހައަކަށް ތައްޔާރު ހެއްޔެވެ؟

ރަމަޟާން މަހުގެ ފަހު ދިހައެއް ޚާއްސަވާ އެންމެ ބޮޑު ސަބަބަކީ ކީރިތި ޤުރުޢާން ބާވައިލެއްވުނު ލައިލަތުލް ޤަދުރް ވިލޭރޭ އެ ދުވަސްތަކުގައިވުމެވެ. އެއީ ރަމަޟާން މަހުގެ ފަހު ދިހައިގެ ތެރެއިން އޮނަހިރި ރޭތަކުން ކުރެ ރެއެއްކަން ކީރިތި ނަބިއްޔާގެ ހަދީޘްތަކުން އެނގެއެވެ. އަދި އެރޭގެ އަޅުކަން 1000 މައްސަރުގެ އަޅުކަމާ އެއްފަދަވެގެންވެއެވެ. 1000 މައްސަރުގެ ހެޔޮކަން އެންމެ ރެޔަކުން ހޯދުމަށް ބޭނުން ނުވާނީ ކާކު ހެއްޔެވެ؟

މި ދެންނެވި ސަބަބުތަކާހުރެ، ރޯދަމަހުގެ ފަހު ދިހަ ދުވަހާ ބައްދަލުކުރަނީ އުފާވެރިކަމާއެކުއެވެ. އެކަމަށް އެދިއެދި ތިބޭ ހާލުގައެވެ. އަޅުކަމުގައި އިހުނަށްވުރެ ހީވާގިވެއެވެ. ގިނަ ވަގުތު ޤުރުޢާން ކިޔެވުމާއި، ތަރާވީޙް ނަމާދު ކުރުމާއި، ރޭއަޅުކަންތައް ކުރުމުގައި ގިނަ ވަގުތު ހޭދަކުރެއެވެ. އަދި ގިނަ ބަޔަކު މިސްކިތުގައި އިޢުތިކާފުގައިވެސް ބައިވެރިވެއެވެ. ވީހާވެސް ބޮޑަށް ދުނިޔެވީ ކަންކަމުން ދުރުވެ، އެ މާތް ދުވަސްތަކުގެ ބޭނުން އެންމެ ފުރިހަމަ ގޮތުގައި ހޭދަކުރުމަށެވެ.

އަޅުކަމުގައި ހީވާގިވުމުގެ އިތުރުން އެ ދުވަސްތަކުގައި ގިނަގިނައިން ފާފަ ފުއްސެވުން އެދި ދުޢާކުރުމާއި، ޒަކާތް ނުދެއްކިވާނަމަ ޒަކާތް ދެއްކުމަށް އަވަސްވެގަތުމާއި، މީހުންނަށް ހެޔޮ ފޯރުކޮށްދިނުމާއި، ސަދަޤާތް ދިނުން ގިނަ ކުރުމަކީ އަހަރުމެންގެ ތެރެއިން ހަމަ ކޮންމެ މީހަކަށްމެ ކުރެވިދާނެ ކަންކަމެވެ. 

މިހާ މާތް މައްސަރެއްގައި ބައްދަލުވާ އެންމެ މާތް ދުވަސްތަކުގެ ބޭނުން އެންމެ ފުރިހަމަ ގޮތުގައި ހިފޭތޯ އަޒުމް ކަނޑައަޅަމާ ހިންގަވާށެވެ. ވޭތުވެދިޔަ ދުވަސްތަކުގައި ކޮންމެ ގޮތަކަށް ކަންކަން ވެފައިވީނަމަވެސް، އައު ހިތްވަރަކާއެކު އައު އަޒުމެއްގައި މިއަދުން ފެށިގެން ފައްޓަމާ ހިނގާށެވެ. މިދިޔަ ރަމަޟާން މަސް ނިމި، މި އަހަރުގެ ރަމަޟާން މަސް ބައްދަލުވުމުގެ ކުރިން މި ދުނިޔެއާ އަލްވަދާޢުކީ ކިތައް މީހުންތޯ ވިސްނާލާށެވެ. މިއީ ތިބާ މި ހަޔާތުގައި ހޭދަކުރާނެ އެންމެ ފަހު ރަމަޟާންމަސް ކަމަށް ބަލައިގެން ފަހު ދިހައެއްގައި ޢަމަލުތައް ސީދާ ކުރެވޭތޯ ބަލަން ހިނގާށެވެ.