ދުނިޔޭގެ އެންމެ ފަގީރު ބިންތަކުގައި އެންމެ އަގުބޮޑެތި ޖަވާހިރުތައް ހުރިކަމީ އަޖައިބުވެ ހައިރާންވާންޖެހޭ ކަމެއް ނޫނެވެ. މިއީ ގުދުރަތީ ގޮތުން އެކަން ލައްވާފައިވާ ގޮތެވެ. އަދި އެބިންތަކަކީ އުފެދުމުގައި ފަގީރު ބިންތަކެއް ނޫނެވެ. ނަމަވެސް މި ކެހިވެރި ދުނިޔެ، އެ ބިންތަކަކީ ފަގީރު ބިންތަކެއް ކަމުގައި "ލޭބަލްކޮށް" އެ ބިންތައް ފަގީރު ކުރީއެވެ. މި ބިންތަކުގައި އަގުބޮޑެތި ޖަވާހިރުތައް ހުއްޓެއްކަމަކު އުފެދޭ ސުވާލަކީ މި ޖަވާހިރުތަކުގެ ފައިދާ ލިބެނީ ކޮން ބަޔަކަށްތޯއެވެ؟ މި ސުވާލުގެ ޖަވާބު ހޯދުމަށް ބަލާއިރު، އަޅުގަނޑުމެންނަށް ފެންނަނީ ހިތާމަވެރި ޙަޤީޤަތެކެވެ.
އެފްރިކާގެ ގިނަ ޤައުމުތަކަކީ ދުނިޔޭގެ އެންމެ ފަގީރު ޤައުމުތަކުގެ ތެރޭގައި ހިމެނޭ ޤައުމުތަކެވެ. އެހެނަސް މި ޤައުމުތަކުގައި ހުރީ ދުނިޔޭގެ އެންމެ އަގުބޮޑު އަދި ނާދިރު ޖަވާހިރުތަކެވެ. މިސާލަކަށް، ކޮންގޯ، ސިއެރާ ލިއޯން، އަދި ބޮޓްސްވާނާ ފަދަ ޤައުމުތަކުގައި ހުރީ ދުނިޔޭގެ އެންމެ އަގުބޮޑު ގަހަނާތަކުގައި ބޭނުންކުރާ ޑައިމަންޑްގެ ބޮޑެތި މަޢުދަނީ ހަޒާނާތަކެވެ. މި ޤައުމުތަކުގެ ބިމުގެ އަޑިން ނެގޭ ޖަވާހިރުތަކުގެ އަގު އެތައް ބިލިއަން ޑޮލަރަކަށް އަރައެވެ. އެހެނަސް، މި ޤައުމުތަކުގެ ރައްޔިތުން ދިރިއުޅެމުންދަނީ ނިކަމެތިކަމާއި ބަނޑުހައިހޫނުކަމުގައެވެ. ފަގީރު ކަމާއި ދަތިކަމުގައެވެ.
މި ޖަވާހިރުތަކުގެ ސަބަބުން މި ޤައުމުތަކަށް ލިބެންޖެހޭ ހަގީގީ މުއްސަނދިކަން ނުލިބި، އެ ޤައުމުތައް ދަނީ އިތުރަށް ފަގީރުވަމުންނެވެ. މީގެ މައިގަނޑު ސަބަބަކީ ހުޅަނގުގެ މުއްސަނދި ޤައުމުތަކުގެ ބޮޑެތި ކުންފުނިތަކުން މި ވަސީލަތްތައް އިސްތިޢުމާރުކޮށް، އޭގެ ފައިދާ އެ ޤައުމުތަކުގެ ރައްޔިތުންނަށް ނުލިބުމެވެ. މި ކުންފުނިތަކުން ކުރަނީ ކޮލޯނިއަލް ޒަމާނުގައި ކުރި ކަންތައްތަކާ ދާދި އެއްފަދަ ކަންތައްތަކެކެވެ. އެ ޒަމާނުގައި ބަޑިއާއި ކަނޑިން މި ޤައުމުތައް އަޅުވެތިކޮށްގެން އެތަންތަނުގެ މުއްސަނދިކަން ފޭރިގަތް ފަދައިން، މިހާރު އެކަން ކުރަނީ ޤާނޫނީ ލިޔެކިޔުންތަކާއި އެއްބަސްވުންތަކުގެ ތެރެއިންނެވެ. ރީތި ނަންނަމުގައި ހެދިފައި ހުންނަ މުއާހަދާތަކުގެ ތެރެއިންނެވެ.
ހުޅަނގުގެ ކުންފުނިތަކުން މި ޤައުމުތަކާއި ގުޅި، ސިޔާސީ ނުފޫޒުތަކާއި އެނޫންވެސް އެކި އެކި ނުފޫޒުތަކުގެ ސަބަބުން، އެ ޤައުމުތަކުގެ ޤުދުރަތީ ވަސީލަތްތައް އަގުހެޔޮކޮށް ގަނެއެވެ. އަދި އެ ވަސީލަތްތައް ބޭނުންކޮށްގެން އުފައްދާ ތަކެތި ބާޒާރުގައި، ބޮޑު އަގުގައި ވިއްކައިގެން ލިބޭ ފައިދާ އެ ކުންފުނިތަކަށް ނަގައެވެ. މިސާލަކަށް، ކޮންގޯގައި ހުންނަ ކޯބަލްޓް މަޢުދަނުގެ 60 އިންސައްތަ އަށްވުރެ ގިނަ ބައި ގަންނަނީ ޗައިނާގެ ކުންފުނިތަކުންނެވެ. މި ކޯބަލްޓް ބޭނުންކޮށްގެން އުފައްދާ ބެޓެރީތައް ވިއްކައިގެން ލިބޭ ފައިދާ ޗައިނާގެ އިޤްތިޞާދަށް ވަންނައިރު، ކޮންގޯގެ ރައްޔިތުންނަށް ލިބޭ މާބޮޑު މޮޅެއް ނެތެވެ.
ހަމައެހެންމެ، ހުޅަނގުގެ ޖަވާހިރު ވިޔަފާރިވެރިންނާއި ގަހަނާ އުފައްދާ ކުންފުނިތަކުން އެފްރިކާގެ ޑައިމަންޑް މަޢުދަންތަކުން ނަގާ ޑައިމަންޑްތައް ގަނެގެން، އެތަކެތި ބޭނުންކޮށްގެން އުފައްދާ ގަހަނާތައް ވިއްކައެވެ. މިސާލަކަށް ފަރަންސޭސިން ބާޒާރަށް ނެރެފައި ހުންނަ ގިނަ ގަހަނާތަކަކީ އެފްރިކާގެ ބިމުން ނަގާ ޖަވާހިރުން އުފައްދާފައިވާ ގަހަނާތަކެކެވެ. އަދި މިތަކެތި މުޅި ދުނިޔޭގެ ބާޒާރުގައި ވިއްކައިގެން ބިލިއަނުން ފައިދާ ނަގައެވެ. އެކަމަކު އެ ޑައިމަންޑުތައް ނެގުމުގައި މަސައްކަތްކުރާ އެފްރިކާގެ މަސައްކަތްތެރިންނަށް ލިބެނީ އެންމެ ކުޑަމިނުން އިންސާނީ ޙައްޤުތައް ވެސް ނެތް މާޙައުލެއްގައި މަސައްކަތްކުރުމުގެ ނިކަމެތިކަމެވެ. ގިނަ ފަހަރަށް ކުޑަކުދިން ލައްވާ ވެސް މި ނުރައްކާތެރި މަސައްކަތް ކުރުވައެވެ. މިއީ އިންސާނިއްޔަތާ ޚިލާފު ޢަމަލުތަކެކެވެ.
ހުޅަނގުގެ ޤައުމުތަކުން މި ކަންކަން ހުއްޓުވުމަށް ހަގީގީ އެއްވެސް މަސައްކަތެއް ނުކުރެއެވެ. އެ ޤައުމުތަކުގެ ސަރުކާރުތަކުން ވެސް އެ ޤައުމުތަކުގެ ކުންފުނިތަކަށް މި ކަންކަން ކުރުމުގެ ފުރުޞަތު ދެއެވެ. އެއީ އެ ކުންފުނިތަކުން ލިބޭ ޓެކްސްގެ ފައިސާއިން އެ ސަރުކާރުތަކަށް ވެސް ފައިދާ ލިބޭތީއެވެ. މިއީ ސީދާ އިސްތިޢުމާރީ ވިސްނުމެވެ. ހުޅަނގުގެ ބައެއް ގައުމުތަކުން މި ފަގީރު ގައުމުތަކުގެ ހާލަތު ރަނގަޅު ކުރުމުގެ ނަމުގައި ތަފާތު މަސައްކަތްތައް ކުރެއެވެ. ބައިނަލްއަގުވާމީ އެތައް ބޮޑެތި ހަރަކާތްތަކެއްވެސް ހިންގައެވެ. ނަމަވެސް މިއަދާ ޖެހެންދެންވެސް ނަތީޖާއެއް ނުނެރެވެނީ އެ މަސައްކަތްތަކުގައި އިހުލާސްތެރިކަމެއް ނެތުމުން ކަމަށް ގިނަ ބަޔަކު ގަބޫލު ކުރެއެވެ. އަދި އެ މަސައްކަތްތަކަކީ މި އިސްތިއުމާރީ ފިކުރު، ފޮރުވާ ސިއްރުކުރަން ގެންގުޅޭ ނިވައިފަތްގަނޑެއްކަމަށް ސިފަކުރާ މީހުންވެސް މަދެއް ނޫނެވެ.
މީގެ އިތުރުން، ހުޅަނގުގެ ބައެއް ޤައުމުތަކުން އެފްރިކާގެ ޤައުމުތަކުގެ ސިޔާސީ ކަންކަމުގައި ނުފޫޒު ފޯރުވައެވެ. އެ ޤައުމުތަކުގެ ވެރިކަމަށް އަންނަ ފަރާތްތަކަކީ ހުޅަނގުގެ ޤައުމުތަކުގެ ކުންފުނިތަކާ ގުޅުން ބަދަހި ބައެއް ކަމުގައި ހެދުމަށް މަސައްކަތްކުރެއެވެ. މިކަމުގެ ސަބަބުން އެ ޤައުމުތަކުގެ ސަރުކާރުތަކުގެ ކޮރަޕްޝަނާއި ނާޤާބިލުކަން އިތުރުވެ، ރައްޔިތުންނަށް ލިބެންޖެހޭ ޚިދުމަތްތައް ނުލިބި، އިތުރަށް ފަގީރުވަމުންދެއެވެ.
އެހެންކަމުން، މި ޤައުމުތަކުގެ ސަރުކާރުތަކާއި ބައިނަލްއަޤްވާމީ މުޖުތަމަޢުން މިކަމަށް ޙައްލެއް ހޯދަން މަސައްކަތްކުރަން ޖެހެއެވެ. މި ވަސީލަތްތަކުގެ ފައިދާ އިންސާފުވެރި ގޮތެއްގައި އެ ޤައުމުތަކުގެ ރައްޔިތުންނަށް ލިބޭނެ ގޮތް ހަދަންޖެހެއެވެ. އަދި މަސައްކަތްތެރިންގެ ޙައްޤުތައް ރައްކާތެރިކޮށް، އެމީހުންނަށް އެކަށީގެންވާ އުޖޫރައެއް ލިބޭނެ ގޮތް ހަދަންޖެހެއެވެ. ހުޅަނގުގެ ޤައުމުތަކުން އެ ޤައުމުތަކުގެ ކުންފުނިތައް ޤާނޫނީ ގޮތުން ޒިންމާދާރުކުރުވައި، އެފްރިކާގެ ޤައުމުތަކުގެ ވަސީލަތްތައް އިސްތިޢުމާރުކުރުން ހުއްޓުވަންޖެހެއެވެ.
އެހެންކަމުން، ދުނިޔޭގެ އެންމެ ފަގީރު ބިންތަކުގައި އެންމެ އަގުބޮޑެތި ޖަވާހިރުތައް ހުއްޓެއްކަމަކު އެއިން އެބައިމީހުނަށް ކުރާ ފައިދާއެއް ނެތެވެ. އެހެން ބަޔަކު އެ ވަސީލަތްތަކުގެ ނާޖާއިޒު ފައިދާ ނަގައެވެ. އެ ވަސީލަތްތައް އިސްތިއުމާރުކޮށް، އެފްރިކާގެ މި ގައުމުތަކަކީ އަބަދުވެސް ހުޅަނގުގެ މަދަދާއި އެކު އުޅެންޖެހޭ ބަޔަކަށް މިވަނީ ހަދާފައެވެ. މިއީ ބައެއްގެ އަޑި ނޭނގޭ ދުރު ރާސްތާ ޕްރޮޕެގެންޑާއެއްގެ ނަތީޖާއެވެ. މިފަދަ އިސްތިއުމާރެއްގައި ރާއްޖެފަދަ ނާޒުކު ގައުމެއް ޖެހިއްޖެނަމަ ދެން ވާނޭގޮތާއި މެދު ވިސްނާލަބަލާށެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން