ޒަމާނުއްސުރެ އަޅުގަނޑުމެންގެ ދިވެހި މުޖްތަމަޢުގައި ބޯދާ ޤަބޫލުކުރުންތަކެއް ގޮތުގައި ދެކެވެމުން އަންނަ ބައެއް ކަންތައްތަކަކީ، ރަނގަޅު އާދަތަކަކާއި ރިވެތި އަޙްލާޤެއް ޤާއިމްކުރުމުގައި އިސް ރޯލެއް އަދާކުރަމުން އަންނަ މޭސްތިރިއެކެވެ. ލޮނާއެކު ކޮޅަށް ހުރެގެން ބަދިގެއަށް ވަދެ ކެއުމުގެ އާދަ ނެތިގޮސް، މަޢްރިބު ނަމާދަށް ތައްޔާރުވުމުގެ އިތުރުން، ގޭތެރެ ފޮޅާ ސާފުކުރުމާއެކު އަމިއްލަ ނަފުސުގެ ސާފުތާހިރުކަމަށް އިސްކަންދެވި، ޚާއްސަ މަޤާމެއް ދެވިފައިވާ އުތީމަށް އެ ޝަރަފާއި ޤަދަރު ލިބިލިބި ހުރުމުގެ ފަހަތުގައިވަނީ ހަމަ ބޯދާ ޤަބޫލުކުރުންތަކެއްކަން ދެނެގަތުން މުހިންމެވެ.

މޫދުން އައިސް ލޮނާ ހުރެ ބަދިގެއަށް ވަނުމާއި ކެއުން

މޫދުން އައިސް ލޮނާ ހުރެ ކެއުމުން 'އަމާ' މަރުވާނޭ ބުނާ ބުނުމަކީ ޒަމާނުއްސުރެ އަޅުގަނޑުމެންގެ ކަންފަތުގައިި ގުގުމަމުންދާ ބޯދާ ޤަބޫލުކުރުމެކެވެ. ނަމަވެސް މި ބުނާ ބުނުމުން ގެނެސްދިން ރީތި އާދައެއް ވާކަމަށް ދެބަސްވާނޭ އެކަކުވެސް ނުހުންނާނެއެވެ. ލޮނާ ހުރެ ކައިފިނަމަ މަންމަ މަރުވެދާނެކަމުގެ ބިރަށްޓަކައި، މޫދުން އަންނަގޮތަށް ތެތާ ހުރެ ބަދިގެއަށް ވަނުމުގެ އާދަ ހުއްޓާލިއެވެ. ކޮޅަށް ހުރެ ކާތަކެތި ކެއުމުގެ އާދަވެސް ދޫކޮށްލިއެވެ. ކުދިންގެ ހިތުގައި އޮތް ބިރުގެ ސަބަބުން އިށީނދެ އިނދެގެން ކެއުމުގެ ރީތި އާދައެއް ކުދިންގެ ކިބައިގައިވަނީ ހަރުލާފައެވެ. ލޮނާ ތެމިގެންހުރެ ބަދިގެއަށް ވަނުމުން، ބަދިގެތެރެ ތެމިގެން ކުރިމަތިލާންޖެހުނު އުނދަގުލަށްވެސް ލުޔެއް ލިބުނީ މި ބޯދާ ޤަބޫލުކުރުމެއްގެ ސަބަބުންނެވެ. 

މަޢްރިބު ނަމާދަށް ފަރުވާތެރިވުން

ޖިންނި މޮޔަވުމާއި ރޫޙާނީ ކަންތައްތަކަކީ އަބަދުވެސް ދިވެހިންގެ ތެރޭގައި ޢާއްމުކޮށް ދެކެވޭ ވާހަކަތަކެވެ. މިފަދަ ކަންތައްތަކާ ގުޅުންހުރި ބޯދާ ޤަބޫލުކުރުންތައްވެސް މަދެއް ނޫނެވެ. ދެނަމާދު ދޭތެރޭ ފެންވެރުމުގެ ސަބަބުން ޖިންނި ޝައިތާނުންގެ އުނދަގުލާ ކުރިމަތިލާން ޖެހިދާނެކަމަށް ދެކެވެމުން އަންނަ ވާހަކައިގެ ނަތީޖާއެއްގެގޮތުން، މަޢްރިބު ނަމާދަށް ބަންގި ގޮވުމުގެ ކުރިން ފެންވަރާ ނަލަހެދިގެން ނަމާދަށް ދިއުމުގެ އާދަވަނީ ހަރުލާފައެވެ. ކުދިން ކުޅެން އުޅުނަސް، ބަޔަކު މީހުން މަސައްކަތެއް ކުރުމަށް އުޅުނަސް ހެވެއެވެ. މަޢްރިބު ނަމާދު ބަންގީގެ ކުރިން އެކަމެއް ހުއްޓާލާފައި ފެންވަރަން އަންނަނީ، ދެނަމާދު ދޭތެރޭ ފެންވެރުމަށް ޖެހިލުންވާތީކަމަށް ގިނަބަޔަކު ޤަބޫލުކުރެއެވެ. އެއީ ހަޤީޤަތުގައިވެސް ކުރުން ރަނގަޅު ކަމެއް ނޫންކަމަށްވެސް ގިނަ ބަޔަކު ދެކެއެވެ.

ކާޅެއް ގޮވުމާއި މެހެމާނެއް އައުން

މެހެމާންދާރީ އަދާކުރުމުގައި ދިވެހިންނަކީ އެއްވަނައިގެ ބައެކެވެ. މެހެމާނެއް ގެއަށް އަންނަނަމަ އެދެން ނިމުނީއެވެ. ގޭތެރެ ސާފުކުރުމާއި، ކޮޓަރިތައް އެއްފުށުން އަނެއް ފުށައްޖަހައިންވެސް ސާފުކުރާނެއެވެ. މިކަމާވެސް ގުޅުން ހުންނަ ބޯދާ ޤަބޫލުކުރުމެއްވެއެވެ. ކާޅެއް އައިސް ގޭގައި އިނދެ ގޮވާނަމަ، އާއިލާ މީހަކު ނުވަތަ ރައްޓެއްސެއް ގެއަށް އަންނަން އުޅެނީކަމަށް ބުނެއެވެ. އާޚިރުގައިތޯއެވެ؟ މުޅި ގޭދޮށް ކުނިކަހާ، ކަންކަނުން ހިރަފުސްފޮޅާ ރީތިކޮށްލާނެއެވެ. މިކަމުގެ ސަބަބުން އުޅޭ މާހައުލު ސާފުތާހިރުކޮށް ބޭއްވިގެންދެއެވެ. މެހެމާނެއް އަންނަން އުޅޭކަން ކާޅަށް އެނގޭނީ ކިހިނެއް ހެއްޔެވެ؟ އެސޮރު ގޮވަގޮވާފައި ދާނެއެވެ. ނަމަވެސް އޭގެ ސަބަބުން ގޭތެރެ ވަރަށް ސާފުތާހިރުކުރެވެއެވެ.

އުތީމަށް ދެވިފައިވާ ޚާއްސަ މަޤާމް

އުތީމު ތިންބެއިންގެ ހަނދާނާއި ޒިކުރާ އައުކޮށް، ރަށަށް ލިބިފައިވާ ލަޤަބު އެގޮތުގައި ދަމަހައްޓާ، ލިބެންޖެހޭ ޝަރަފާއި ޤަދަރު ލިބެމުން ދިއުމުގެ ފަހަތުގައިވެސް ބޯދާ ޤަބޫލުކުރުމެއް ހިމެނެއެވެ. އަލަށް ބަންނަ އޮޑިއެއް ކުރާ ފުރަތަމަ ދަތުރުގައި، އުތީމު ދޮންވެލިގަނޑަށް ބީއްސާލުމުން ބަރަކާތްލައްވާނެކަމަށް ބުނާ ބުނުމުގެ ސަބަބުން، އެތައް ބައެއްގެ އައު ދޯނީގެ ފުރަތަމަ މަންޒިލަށް އެޒަމާނުގައި ހަދާފައިވަނީ އުތީމެވެ. މީގެ ސަބަބުން، އުތީމަށާއި އުތީމު ތިންބެއިންގެ ޝަރަފާއި ޤަދަރަށް އިޙްތިރާމު ކުރަންޖެހޭކަން އަބަދުވެސް ހަނދާނުގައި ހުރެއެވެ. ނަތީޖާއެއްގެ ގޮތުން، ކުޑަކުދިންގެ ހިތުގައިވެސް ދީނަށާއި ޤައުމަށްޓަކައި ޝަހީދުވީ މުޖާހިދުންގެ ޤުރުބާނީ ބިންވަޅު ނެގި، ރަށައް އިޙްތިރާމްކުރުމުގެ ސިފަވަނީ އަށަގަތްފައެވެ.

އުތީމު ގަނޑުވަރުގެ ފެންވަޅުން ފެންވެރުން

އުތީމު ގަނޑުވަރުގައި ހުންނަ ފެންވަޅުން ކުދިން ފެންވެރުވުމުން ބަލިމަޑުކަން ދުރުކޮށްދެޔޭ ކިޔާ އަޑުއަހަމު ހެއްޔެވެ؟ މިއީވެސް ދުވަސްވީ ބޯދާ ޤަބޫލުކުރުމެކެވެ. މީގެ ސަބަބުން ބަލިމަޑުކަން ދުރުކޮށްދޭނެކަމުގެ އުއްމީދުގައި، ގިނަގިނައިން ކުދިން ފެންވެރުވުމުގެ ނަތީޖާއެއްގެގޮތުން، އަމިއްލަ ނަފުސުގެ ސާފުތާހިރުކަން އަށަގަނެގެންދިޔައެވެ. ގައިން ނުބައިވަސް ދުވުމާއި، އެކުއުޅެން އުނދަގޫވުންފަދަ މައްސަލަތައްވަނީ ހައްލުވެފައެވެ. 

ޤަބޫލުކުރުންތައް ކިތަންމެ ބޯދާވިޔަސް، ގެނުވައިފައިވަނީ އެތައް ރަނގަޅު އާދަތަކެކެވެ. މުޖުތަމަޢުގައާއި ދޭދޭ ފަރުދުންގެ ކިބައިގައި ހަރުލެއްވީ ރިވެތި ސިފަތަކެކެވެ.