ސްޓެލްކޯގެ މެރިޓް ބޭސްޑް އިންޖިނިއަރިންގ ސްކޮލަރޝިޕަށް ކުރިމަތިލުމުގެ ފުރުސަތު ހުޅުވާލައިފިއެވެ.
ސްޓެލްކޯ އިން ވަނީ އިނގިރޭސިވިލާތުގައި ބެޗްލަރސް ޑިގްރީ ހާސިލް ކުރުމަށް ތިން ފުރުސަތު ހުޅުވާލާފައެވެ. އެއީ އިލެކްޓްރިކަލް އެންޑް އިލެކްޓްރޯނިކް އިންޖިނިއަރިންގ ދާއިރާއިން އެއް ޖާގައާއި މެކޭނިކަލް އިންޖިނިއަރިންގ ދާއިރާއިން ދެ ޖާގައެވެ.
މި ޖާގަތަކަށް އެދި 24 އަހަރުން ދަށުގެ ދިވެހި ދަރިވަރުންނަށް ކުރިމަތިލެވޭނެކަމަށާއި މި ޖާގަތަކަށް އެދެވޭނީ ހިސާބާއި ފިޒިކްސް ނުވަތަ ކެމިސްޓްރީ އާއި ކޮމްޕިއުޓަރ ސައިންސް ހިމެނޭހެން އޭލެވެލްގައި ދެ އޭސްޓަރ އަދި އޭއެއް ހޯދާފައިވާ ދަރިވަރުންނަށް ނުވަތަ އެއާ އެއްވަރުގެ އައިބީ ސެޓްފިކޭޝަނެއް އޮތް ފަރާތްތަކަށް ކަމަށް ސްޓެލްކޯ އިން ބުނެއެވެ.
މި ކޯސްތައް ފުރިހަމަކުރާ ދަރިވަރުން ކޯސް ނިންމުމަށްފަހު ޚިދުމަތް ކުރަންޖެހޭނީ ސްޓެލްކޯއަށެވެ. އަދި ކޯސް ފެށުމުގެ ކުރިން އެ ކުންފުނީގައި އިންޓަރންޝިޕް ހަދަން ޖެހޭނެ ކަމަށް ވެސް ބުނެއެވެ.
ސްޓެލްކޯއިން ހުޅުވާލާފައިވާ މި ފުރުސަތުގެ ދަށުން ސްކޮލަރޝިޕަށް ހޮވޭ ދަރިވަރުންނަށް ކޯސްފީ އާއި ސްޓައިޕަންޑާއި ވިސާ ފީ އާއި ދެކޮޅު ޓިކެޓާއި ބުކް އެލަވެންސް އަދި އެސްޓަބްލިޝްމަންޓް އެލަވެންސް ލިބޭނެއެވެ.
ސްޓެލްކޯގެ މެރިޓް ބޭސްޑް އިންޖިނިއަރިންގ ސްކޮލަރޝިޕަށް ކުރިމަތިލުމުގެ ފުރުސަތު ހުޅުވާލާފައިވަނީ އަންނަ އޭޕްރިލް މަހުގެ ނިޔަލަށެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން