ރަމަޟާން މަހުގެ ފަހު ދިހައިގެ ދުވަސްތަކަކީ މުސްލިމުންނަށް ވަރަށް މުހިންމު ދުވަސްތަކެކެވެ. މި ދުވަސްތަކުގައި އަޅުކަންކުރުން އިތުރުކޮށް، ހެޔޮ ޢަމަލުތައް ގިނަކުރުމަށް އިސްލާމްދީނުގައި ބާރުއަޅުއްވާފައިވެއެވެ. އަހަރެމެން މި މުހިންމު ދުވަސްތައް ހެޔޮގޮތުގައި ހޭދަކުރުމަކީ ވަރަށްވެސް މުހިންމު ކަމެކެވެ.
ފަހު ދިހައިގެ ރޭތަކުގައި އަޅުކަންކުރުން އިތުރުކުރުމަކީ ކޮންމެ މުސްލިމެއްގެވެސް ވާޖިބެކެވެ. ނަމާދު ކުރުމާއި، ޤުރުއާން ކިޔެވުމާއި، ޛިކުރު ކުރުމާއި، ޞަދަޤާތް ދިނުން ފަދަ ކަންކަމުގައި އިތުރަށް ވަގުތު ހޭދަކުރަން ޖެހެއެވެ. މީގެ އިތުރުން، ލައިލަތުލް ޤަދުރު ހޯދުމަށްޓަކައި ރޭއަޅުކަން ކުރުމަކީވެސް މުހިންމު ކަމެކެވެ. ރަމަޟާން މަހުގެ ފަހު ދިހައެއް ހާއްސަވާ ރެއަކީ މިރެއެވެ. ސީދާ ކޮން ރެއެއްކަން ބަޔާންވުމަކާއި ނުލާ އެރޭ ހޯދުމަށް އަހަރެމެންގެ މައްޗަށް ވަނީ އަމުރު ކުރެވިފައެވެ. މި މާތް ރެއަކީ އެއްހާސް މައްސަރުގެ ސަވާބާއި ދަރުމައާއި އެއްވަރުގެ ރެއެކެވެ. އަދި މިއީ ފަޖުރުލުމަށް ދާންދެން އަމާންކަން ލިބިގެންވާ ރެއެކެވެ. ލައިލަތުލްޤަދްރި ވަނީ ރަމަޟާންމަހުގެ ފަހުދިހައިގެ ރޭތަކުން ކުރެ ރެއެއްގައެވެ.
މި ދުވަސްތަކުގައި އިޢުތިކާފަށް މިސްކިތުގައި އިނުމަކީވެސް ވަރަށް މާތް ޢަމަލެކެވެ. އިޢުތިކާފުގައި ހުރެވެން ނެތް ނަމަވެސް، ވީހާވެސް ގިނަ ވަގުތު މިސްކިތުގައި ހޭދަކުރުމަށް މަސައްކަތް ކުރަންވާނެއެވެ. މިގޮތުން، ޖަމާޢަތުގައި ނަމާދުކުރުމާއި، ތަރާވީޙު ނަމާދު އަދާކުރުމާއި، ދަމުނަމާދަށް ދިޔުންފަދަ ކަންކަން ފާހަގަ ކުރެވެއެވެ.
އަދި މީގެ އިތުރުން، މުޖުތަމަޢުގެ ފަޤީރުންނާއި މިސްކީނުންނަށް އެހީތެރިވުމަކީވެސް މި ދުވަސްތަކުގައި ކުރަން ޖެހޭނެ ކަމެކެވެ. ޞަދަޤާތް ދިނުމާއި، ކާބޯތަކެތި ހަދިޔާކުރުމާއި، ފިޠުރު ޒަކާތް ދިނުން ފަދަ ކަންކަމުގައި ބައިވެރިވާން ޖެހެއެވެ. މިއީ އަޅުގަނޑުމެންގެ އަޚުންނާއި އުޚުތުންނަށް އެހީތެރިވެ، އެމީހުންގެ ދަތިކަން ފިލުވައިދިނުމުގެ ފުރުޞަތެކެވެ.
ފަހު ދިހައިގެ ރޭތަކުގައި ނޭދެވޭ ކަންކަމުން ދުރުހެލިވުމަކީވެސް މުހިންމު ކަމެކެވެ. ޓީވީ ބެލުމާއި، ސޯޝަލް މީޑިއާގައި ވަގުތު ހޭދަކުރުން ފަދަ ކަންކަން މަދުކޮށް، އެ ވަގުތު އަޅުކަމަށް ހޭދަކުރަން ޖެހެއެވެ. އަދި ހަމައެހެންމެ، އެހެން މީހުންނާ ޖަދަލުކުރުމާއި، ނުބައި ވާހަކަ ދެއްކުން ފަދަ ކަންކަމުން ދުރުހެލިވާން ޖެހެއެވެ. ދޮގު ހެދުމާއި ފިތުނަ އުފެއްދުމާއި ފަސާދަވެރި ވާހަކަތަކުން ދޫ ބަންދު ކުރަން ޖެހެއެވެ.
ރަމަޟާން މަހުގެ ފަހު ދިހަައިގެ ރޭތަކަކީ އަޅުގަނޑުމެން އަޅުކަންކުރުން އިތުރުކޮށް، ރޫޙާނީ ގޮތުން ކުރިއެރުން ހޯދުމަށް ލިބޭ އަގުހުރި ފުރުޞަތެކެވެ. މި ދުވަސްތައް ހެޔޮގޮތުގައި ހޭދަކޮށް، އަޅުގަނޑުމެންގެ އަޅުކަންތައް އިތުރުކޮށް، އެހެން މީހުންނަށް އެހީތެރިވެ، އަޅުގަނޑުމެންގެ ނަފްސު އިޞްލާޙު ކުރުމަށް މަސައްކަތް ކުރަމާ ހިންގަވާށެވެ. ލައިލަތުލްޤަދްރީގެ ނަސީބު އަޅަމެން އެއްމެންނަށް މިންވަރު ކުރައްވާށިއެވެ!
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން