ﷲ ސުބުޙާނަހޫ ވަތަޢާލާއާ އަޅާއާއި ދެމެދުގައި އޮންނަ ގުޅުން ވަރުގަދަކުރުމަށްޓަކައި، އެކަލާނގެއާ ދޭތެރޭ އަހަރުމެން ދެކޭގޮތަކީ މުހިންމު ރޯލެއް އަދާކުރާ އެއްޗެކެވެ. އެކަލާނގެއާއި ދޭތެރޭ ދެކޭގޮތް ރަނގަޅުނަމަ، ކޮންމެ ޙާލަތެއްގައިވެސް ފެންނާނީ އެކަލާނގެ ރަޙުމަތާއި އޯގާވަންތަކެމެވެ. ބަހާރު މޫސުމާއި ނިޢުމަތްތަކެވެ. މިއަކީވެސް އެފަދަ ނަމޫނާ އުޚުތެއްގެ ވާހަކައެވެ. އެ އުޚްތާ ކިޔައިދިނެވެ.
"އަހަރެންނަކީ ކިއަރީ މަލްފޮމޭޝަން ހުންނަ މީހެކެވެ. އަހަރެންނަކީ ކިއަރީ 'ވޮރިއަރ' އެކެވެ. ބޮލުގައި ނުރިއްސާ ހަމަ އެންމެ ދުވަހެއްވެސް އަހަރެން ހަނދާނެއް ނުހުރެއެވެ. އެކަމަކުވެސް އަލްޙަމްދުލިﷲއެވެ. ﷲއަށް ޙަމްދު ހުއްޓެވެ. ކިއަރީއަކީ ޢާއްމު ބައްޔެއް ނޫނެވެ. އެ ބަލި ތަޙައްމަލުކުރަނީ 1000އަކުން އެންމެ މީހެކެވެ. ނިކަން ބަލާބަލާށެވެ. ﷲ ސުބުޙާނަހޫ ވަތަޢާލާ އިޙްތިޔާރުކުރައްވާ ހޮއްވެވީ އަހަރެންނެވެ. މިކަންކަން އަހަރެން މި ތަޙައްމަލުކުރަނީ ނުވަތަ ތަޙައްމަލުކުރަން ޖެހެނީ އަހަރެން ދެކެ އެކަލާނގެ ލޯބިވެވޮޑިގަންނަވާތީކަމަށް އަހަރެން ޔަޤީންކުރަމެވެ."
ސުބްޙާނަﷲއެވެ. މިއީ ޚުދު އެ އުޚްތާގެ ބަސްމަގެވެ. އިޙްސާސްތަކެވެ. ﷲ ތަޢާލާއާ ދޭތެރޭ އެ އުޚުތާ ދެކޭ ގޮތެވެ. މިކަމުން ފަހުމުވެގެން ދިޔައީ އަހަރުމެން، އަހަރުމެންގެ ވެރި ރައްބާއި ދޭތެރޭ ދެކޭގޮތް ކިހާ މުހިންމުކަމެވެ. އެ އުޚްތާގެ ވާހަކައިން ހަނދާންވަނީ، ކޮންމެ ޙާލަތެއްގެ ފަހަތުގައިވެސް ފޮރުވިފައިވާ ނިޢުމަތާއި ޙިކުމަތް ލިބިގަތުމަށްޓަކައި، ﷲ ސުބުޙާނަނޫ ވަތަޢާލާއާ ދޭތެރޭ ރަނގަޅަށް، އަދި އެންމެ ޙެޔޮކޮށް ދެކުމުގެ މުހިންމުކަމެވެ.
ކިއަރީއަކީ އާދައިގެ ބޮލުގެ ރިހުމެއް ނޫނެވެ. އެއީ ނާރުގެ ނުރައްކާތެރި ބައްޔެކެވެ. ގިނަ މީހުންނަށް އަރާމާއި ހިތްހަމަޖެހުން ލިއްބައިދޭ ވާރޭވެހޭ އަޑާއި އެ މަންޒަރަކީވެސް ކިއަރީ ތަޙައްމަލުކުރާ ފަރާތްތަކަށް ބޮޑު ވޭނެކެވެ. އެފަރާތްތަކުން ސިފަކުރާގޮތުގައި، އެޙާލަތުގައި އެނދުންތެދުވެ ހިނގާބިނގާވެ އުޅުމަކީވެސް ބުރަ މަސައްކަތެއްފަދަ ކަމެކެވެ.
މާތް ﷲއާއި ދޭތެރޭ އަހަރުމެން ދެކޭގޮތް ރަނގަޅުވެ، ކޮންމެ ޙާލަތެއްގައިވެސް ކެތްތެރިކަމާއި، އެކަލާނގެއަށް އިތުބާރުކުރުން އިސްކޮށްފިނަމަ، ދިރިއުޅުމުގައި ކުރިޔަށް ދިއުމަށް ފަސޭހަވާނެއެވެ. އެމަގުގައި ހިނގަން އުނދަގޫވާނެ ކިތަށްމެ ކަމެއް ހުރިކަމުގައިވިޔަސް، ކުރިޔަށްދާނެ މަގެއް އޮތަތީ ޝުކުރުވެރިވާނެއެވެ. ޤަބޫލުކުރަންވީ، ﷲ ތަޢާލާ އަހަރުމެންނަށް ދެރަގޮތެއް މެދުވެރި ނުކުރައްވާނެކަމެވެ. އަހަރުމެން ހިތްނޭދޭ ގޮތައް ކަމެއް ވިޔަސް، އެކަމެއްގެ ފަހަތުގައި ކޮންމެވެސް ޙިކުމަތެއް ފޮރުވިފައިވާނެކެމެވެ. ނުއުފުލޭނެވަރުގެ ބުރައެއް ނުޖައްސަވާނެކަމެވެ. އެ ޙާލަތްތަަކުގައިވެސް 'ޕޮޒިޓިވް' ވިސްނުމެއް ގެންގުޅޭނަމަ، ﷲ ތަޢާލާއާ ދޭތެރޭ ދެކޭގޮތްވެސް 'ޕޮޒިޓިވް'ވާނެއެވެ. އެކަލާނގެއާ ދޭތެރޭ ރަނގަޅަށް ދެކެވޭނެއެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން