މުޖުތަމަޢުގައި އެހީތެރިކަމަށް ބޭނުން ޖެހިފައި ތިބި އާއިލާތަކަށް އެއްބާރުލުން ދިނުމުގެ ގޮތުން މަމްސް އެއިޑްގެ 'ބެކް ޓު ސްކޫލް 2025' ޕްރޮގްރާމަށް ދިރާގުން އެހީތެރިކަން ފޯރުކޮށްދީފިއެވެ.

މި އެހީތެރިކަން ފޯރުކޮށްދިނީ ދިރާގުގެ ސީއެސްއާރްގެ ދަށުންނެވެ.

ދިރާސީ އައު އަހަރު ފެށޭއިރު މުޖުތަމައުގައި އެހީތެރިކަމަށް ބޭނުންވެފައި ތިބި އާއިލާތަކުގެ ތެރެއިން ޚާއްސަކޮށް އެކަނިވެރި މައިންނަށް އެއްބާރުލުން ދިނުމަށް ކުރިއަށްގެންދާ މި ޕްރޮގްރާމަށް ދިރާގުން އެހީތެރިކަން ފޯރުކޮށްދީފައި ވާއިރު އެ ކުންފުނިން ވަނީ ރޯދަމަހަށް ޚާއްސަކޮށްގެން މަމްސް އެއިޑުން ކުރިއަށްގެންދިޔަ ޕްރޮގްރާމަށް ވެސް އެހީތެރިކަން ފޯރުކޮށްދީފައެވެ.

އެގޮތުން ރަމަޟާން އެއިޑް އާއި ބެކް ޓު ސްކޫލްގެ ދަށުން އެ ކުންފުނިން ވަނީ ޖުމްލަ 140 އާއިލާއަށް އެހީތެރިކަން ފޯރުކޮށްދީފައެވެ.

ދިރާގުން މަމްސް އެއިޑާއެކު ކުރިއަށްގެންދާ ޕާޓްނަރޝިޕްގެ މަގުސަދުތަކުގެ ތެރޭގައި އާއިލާތަކަށް އެހީތެރިވެ އެއްބާރުލުން ދިނުމާއި އެއްބައިވަންތަ މުޖުތަމަޢުއެއް ބިނާކުރުން ހިމެނެއެވެ.