ރަމަޟާންމަހަކީ ހެޔޮ ޢަމަލުތަކުގެ މައްސަރެވެ. ދީލަތިކަމާއި ހީވާގިކަމުގެ މައްސަރެވެ. ކުރާ ޙެޔޮ ޢަމަލުތަކުގެ ޘަވާބާއި ދަރުމަ އުފުލިގެންދާ މައްސަރެވެ. 1000 މައްސަރަށްވުރެ ޙެޔޮކަން ބޮޑުވެގެންވާ ލައިލަތުލް ޤަދްރިވިލޭރޭ އަންނަނީވެސް ރަމަޟާންމަހުގައެވެ.

ކީރިތި ޤުރުޢާނުގެ އަލް-ޤަދްރް ސޫރަތުގެ 2 އަދި 3ވަނަ އާޔަތުގެ މާނާގައިވެއެވެ.

"އަދި ليلةالقدر ވިލޭރެޔަކީ، ކޮންރެޔެއްކަން ކަލޭގެފާނަށް އަންގައިދިނީ ކޮންއެއްޗެއްތޯއެވެ؟ ليلةالقدر ވިލޭރޭ، އެއްހާސް މައްސަރަށްވުރެ ހެޔޮކަން ބޮޑެވެ." 

މިރޭގެ ހެޔޮކަމާއި މާތްކަން ލިބިގަތުމަށްޓަކައި ޙެޔޮ ޢަމަލުތައް ގިނަކުރުން ވަރަށް މުހިންމެވެ. އެއީ ފަހު ދިހައިގެ ރޭތައް ތެރެއިން ރެއެކެވެ. އެހެންކަމުން ފަހު ދިހައިގައި ޙެޔޮ ޢަމަލުތައް ކުރުމުގައި އިތުރަށް ފަރުވާތެރިވާންޖެހެއެވެ. އެގޮތުން ކުރެވިދާނެ އެއްކަމަކީ ކިތަށްމެ ކުޑަ މިންވަރަކުން ވިޔަސް ޞަދަޤާތްކުރުމެވެ.

މާތް ﷲގެ މަގުގައި ހޭދަކޮށް ސަދަޤާތްކުރުމަކީ އެކަލާނގެ ހަޟްރަތުގައި މާތްވެގެންވާ އަޅުކަމެކެވެ. އެކަމަށްޓަކައި ޘަވާބާއި ދަރުމަ ގިނަގުނަވެގެންވާ އަޅުކަމެކެވެ. ތަނަވަސްކަން އެކިމީހުންނަށް ލިބިގެންވަނީ އެކި މިންވަރަށެވެ. ފަހަރެއްގައި ބޮޑު އަދަދަކުން ސަދަޤާތެއް ކޮށްލުމުގެ ތަނަވަސްކަން ނެތިވެސް ހިނގައިދާނެއެވެ. ނަމަވެސް ވީވަރަކުން، ކިތަށްމެ ކުޑަ މިންވަރެއްވެސް މި ފަހުދިހައިގެ ކޮންމެ ރެއެއްގައި ހޭދަކުރުމަކީ ކުރެވިދާނެ ކަމެކެވެ. އެ ސަދަޤާތްކުރެވޭ ރެޔާ، ލައިލަތުލް ޤަދްރި ވިލޭރެޔާއި ދިމާވެއްޖެނަމަ ލިބިގެންދާނީ ކިހާ އަޖުރެއް ހެއްޔެވެ؟ ކިހާ ޘަވާބެއް ހެއްޔެވެ؟ އެއީ 1000 މައްސަރަށްވުރެވެސް ޙެޔޮކަން ބޮޑުވެގެންވާ ރެއެވެ.

ކީރިތި ޤުރުޢާނުގައި ބަޔާންވެގެންވެއެވެ؛

"اللَّه ގެ މަގުގައި، އެއުރެންގެ މުދާ ހޭދަކުރާ މީހުން ހޭދަކުރާ ތަކެތީގެ مثال އީ، ކޮންމެ ކުރާގަނޑެއްގައި ސަތޭކަ އޮށް ހުންނަ ހަތް ކުރާގަނޑު އުފައްދާ އޮށެއްގެ مثال އެވެ. اللَّه އިރާދަކުރައްވާ މީހަކަށް (ثواب) ގިނަގުނަ ކުރައްވައެވެ. އަދި، اللَّه އީ، ތަނަވަސްވަންތަަ، މޮޅަށް ދެނެވޮޑިގެންވާ ރަސްކަލާނގެއެވެ." (2:261)

އަދިވެސް ވަޙީކުރައްވާފައިވެއެވެ.

"އެއުރެންގެ މުދާ، اللَّه ގެ މަގުގައި ހޭދަކޮށް، ދެން އެއަށްފަހު، އެއުރެން ހޭދަކުރި އެއްޗަކާ ގުޅިގެން ކަލަގޮވުމެއްނުވާ، އަދި (ބަހުން ނުވަތަ عمل ން ވިޔަސް) އުނދަގުލެއް ނުދޭ މީހުންނަށް އެއުރެންގެ އުޖޫރަ (އެބަހީ: ثواب) އެއުރެންގެ ވެރިރަސްކަލާނގެ حضرة ގައި އެއުރެންނަށް ވެއެވެ. އަދި، އެއުރެންގެ މައްޗަކަށް އެއްވެސް ބިރެއް ނެތެވެ. އަދި އެއުރެންނީ ހިތާމަކުރާނޭ ބަޔަކު ކަމުގައިވެސް ނުމެވޭމެއެވެ." (2:262)

ޓެކްނޮލޮޖީ ކުރިއަރާފައިވާ މި ޒަމާނުގައި ސަދަޤާތްކުރާނެ މަގުވެސް މިވަނީ ފަސޭހަވެފައެވެ. ގޭގައި ހުރެގެންވެސް ކިތަށްމެ ދުރުގައިވާ މީހަކަށް ސަދަޤާތެއް ކުރެވިދާނެއެވެ. މޮބައިލް ބޭންކިން މެދުވެރިކޮށް، ސޯޝަލް މީޑިއާގެ މަންސަތަކުގައި ސަދަޤާތްކުރުމަށް ހުޅުވާލާފައިވާ ފުރުސަތުތަކުގެ ބޭނުން ހިފިދާނެއެވެ. ޔަތީމުކުދިންނަށް ރޯދަވީއްލުމެއް ހަދިޔާކުރުމާއި، މިސްކިތެއް ބިނާކުރުމަށް އެހީތެރިވުމުގެ އިތުރުން ޢިލްމު އުނގަންނައިދިނުންފަދަ ކަންކަމަށް ސަދަޤާތްކުރުމުގެ މަގުވަނީ ފަހިވެފައެވެ. އެފަދަ ޕޯސްޓުތަކުގައި ބަޔާންވެފައިވާ ބޭންކް އެކައުންޓުތަކަށް، އަމިއްލަ ފޯނުން، މޮބައިލް ބޭންކިންގ މެދުވެރިކޮށް ފައިސާ ޖަމާކުރެވެއެވެ.

ހެޔޮ ނިޔަތާއި ﷲ ތަޢާލާގެ ހަޟްރަތުން ޘަވާބާއި ދަރުމައަށް އެދި، ލައިލަތުލް ޤަދްރިވިލޭރޭ ލިބިގަތުމަށް އެދިގެން، ކުޑަ މިންވަރެއް ވިޔަސް ސަދަޤާތުގެ ގޮތުގައި ހޭދަކުރަމާ ހިނގާށެވެ. އެއީ މި މާތްވެގެންވާ މައްސަރުގެ ފަހު ދިހައިގައި ކުރުން އެއްވަނައިގެ ކަމެކެވެ. އާޙިރަތަށްތަކައި ކުރެވޭ އިންވެސްޓްމެންޓެކެވެ.