'އެމްއެސް ކްރިސްޓަލް ސިންފޮނީ' ނަމަކަށް ކިޔާ ކްރޫޒް ޝިޕުން 300 އަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފިއެވެ.

މޯލްޑިވްސް އިމިގްރޭޝަނުން ހާމަކޮށްފައިވާ ގޮތުގައި އިއްޔެ ރާއްޖެއަށް އައި މި ކްރޫޒު ޝިޕުން 307 ފަތުރުވެރިންނާއި 477 ކްރޫ މެމްބަރުން ވަނީ ޒިޔާރަތްކޮށްފައެވެ. 

ސްރީލަންކާގެ ކޮލޮމްބޯއިން އައި މި ކްރޫޒު ޝިޕް ވަނީ މިިދިޔަ ޖެނުއަރީމަހުގައި ވެސް ރާއްޖެ އައިސްފައެވެ. އެ ދަތުރުގައި 200 އަށްވުރެ ގިނަ ފަތުރުވެރިން ރާއްޖެއަށް ޒިޔާރަތް ކުރިއެވެ.

ފަތުރުވެރިކަމާ ބެހޭ ވުޒާރާގެ ތަފާސްހިސާބުތައް ދައްކާގޮތުގައި މި ހިނގާ މާޗު މަހުގައި ރާއްޖެއަށް ލައްކައަކަށްވުރެ ގިނަ ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ. މިއީ މިިދިޔަ އަހަރުގެ މި މުއްދަތާ އަޅާބަލާއިރު 6.9 އިންސައްތަ އިތުރު އަދަދެކެވެ.

އެންމެ ފަހުގެ ތަފާސްހިސާބުތައް ދައްކާގޮތުގައި، މިއަހަރުގެ މިހާތަނަށް ރާއްޖެއަށް ވަނީ 531000 އަށްވުރެ ގިނަ ފަތުރުވެރިން ޒިޔާރަތްކޮށްފައެވެ. މި އަހަރު މިހާތަނަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ ޗައިނާ އިންނެވެ.