ދުނިޔޭގެ އެންމެހައި ކަނޑުތަކާއި ކަނޑުގެ ދިޔަވަރަށް އަންނަ ބަދަލުތަކަކީ ގުދުރަތީ ގޮތުން ހިނގަމުންދާ ފުރިހަމަ ނިޒާމެކެވެ. އަދި މިއިން ކޮންމެ ބަދަލަކީވެސް އިންސާނުންނަށް ވަރަށް މުހިންމު ކަމެކެވެ. މީގެ ތެރެއިން މުހިއްމު އެއް ބަދަލަކީ ކަނޑުތަކުގެ ދިޔަވަރަށް އަންނަ ބަދަލުތަކެވެ. މި ކަމުގައި އެންމެ ބޮޑު ދައުރެއް އަދާކުރަނީ ހަނދެވެ. މިލިޔުމުގައި، ހަނދުގެ ދައުރުވުމާއި ދިޔަވަރާ ހުރި ގުޅުމަކީ ކޮބައިތޯ އާއި މިކަމުގެ ސަބަބުން އަންނަ ބަދަލުތަކަކީ ކޮބައިތޯ ބަލައިލާނަމެވެ.
ހަނދު ދައުރުވުމޭ މި ބުނެވެނީ ދުނިޔޭގެ ބިމުގެ ވަށައިގެން ހަނދު ދައުރުވާ ދައުރުވުމަށެވެ. ނުވަތަ އެނބުރޭ އެނބުރުމެވެ. މި ދައުރުވުމުގެ ސަބަބުން ހަނދުގެ ދަގަތްފާނީ ބާރު ނުވަތަ ގްރެވިޓީ ބާރު، ދުނިޔޭގެ ބިމުގެ މައްޗަށް ވަރަށް ބޮޑަށް ފޯރައެވެ. މި ބާރުގެ ސަބަބުން ކަނޑުގެ ލޮނުގަނޑު އުފުލި ތިރިވާގޮތް ވެއެވެ. މިއީ ދިޔަވަރު ބޮޑުވުމާއި ދިޔަވަރު އަޑިވުމެވެ. މިގޮތަށް ހަނދު ދައުރުވަމުން ދާއިރު، ދުނިޔޭގެ ބިމާއި ހަނދު ކައިރިވާ ވަރަކަށް، ދަގަތްފާނީ ބާރު ގަދަވެ، އެދިމާލަކަށް ކަނޑުގެ ލޮނުގަނޑު ދަމައިގަނެއެވެ. މި ސަބަބާއި ހުރެ، އެ ދިމާލަކުން ކަނޑުގެ ލޮނުގަނޑު އުފުލެއެވެ. ނުވަތަ ދިޔަވަރު ބޮޑުވެއެވެ. އަދި ހަނދު، ދުނިޔޭގެ ބިމާއި ދުރަށް ދާ ވަރަކަށް، މި ބާރު ކުޑަވެ، ކަނޑުގެ ލޮނުގަނޑު ތިރިވާން ނުވަތަ ދިޔަވަރު އަޑިވާން މެދުވެރިވެއެވެ.
ހަނދުގެ ދައުރުވުމާއި ދިޔަވަރަށް އަންނަ ބަދަލުތަކަކީ ދުވާލަކު ދެފަހަރު ހިނގާ ކަމެކެވެ. އާންމު ގޮތެއްގައި ކޮންމެ 12 ގަޑިއިރަކުން އެއްފަހަރު ދިޔަވަރު ބޮޑުވެ، ދެން އަނެއްކާ 12 ގަޑިއިރުން އަޑިވެއެވެ. ނަމަވެސް، މި ވަގުތުތައް ކުޑަކޮށް ތަފާތުވެދާނެއެވެ. މީގެ އިތުރުން، ހަނދުމަހުގެ ތަފާތު ދުވަސްތަކުގައި ދިޔަވަރަށް އަންނަ ބަދަލުތައްވެސް ތަފާތުވެއެވެ.
ހަނދުމަހުގެ ފުރަތަމަ ހަފްތާގައި އާއި ފަހު ހަފްތާގައި ދިޔަވަރު އަންނަ ބޮޑު ދިޔަ އާއި އަޑި ދިޔަ ތަފާތުވާނެއެވެ. މި ދުވަސްވަރު ކޮންމެ ދިޔަވަރެއްގައިވެސް ތަފާތުބޮޑުކޮށް ބަދަލު އަންނާނެއެވެ. ދިޔަވަރު ބޮޑުވާއިރު މާ ބޮޑުކޮށް ބޮޑުވުމުން، ފޮސް ދިޔައޭ ވެސް ކިޔާ އުޅެއެވެ. އަދި އަޑިވާ އިރަކު، އެހާމެ ބޮޑަށް އަޑިވެސް ވާނެއެވެ. މިއީ ހަނދާއި އިރު އެއް ހިސާބެއްގައި ހުންނަ ދުވަސްވަރެވެ. އަދި ހަނދުމަހުގެ ދެވަނަ އަދި ހަތަރުވަނަ ހަފްތާގައި ދިޔަވަރު އެހާ ބޮޑެއް ނުވާނެއެވެ. މިއީ ހަނދާއި އިރު ދިމާ އިދިކޮޅު ދިމާލުގައި ހުންނަ ދުވަސްވަރެވެ.
ދިޔަވަރަށް އަންނަ މި ބަދަލުތަކަކީ އިންސާނުންނަށް ވަރަށް މުހިންމު ކަމެކެވެ. މަސްވެރިކަމާއި، ނިޔަމިކަމާއި، ކަނޑުދަތުރުފަތުރުކުރުން ފަދަ ކަންކަމުގައި ދިޔަވަރަށް އަންނަ ބަދަލުތައް ދެނެގަތުމަކީ ވަރަށް މުހިންމު ކަމެކެވެ. އަދި ރަށްރަށުގެ ގޮނޑުދޮށްތަކަށް ކުރާ އަސަރުތައްވެސް ދެނެގަތުމަށް މިކަން މުހިންމެވެ.
ހަނދު ދައުރުވުމާއި ދިޔަވަރަށް އަންނަ ބަދަލުތަކަކީ ގުދުރަތީ ގޮތުން ހިނގާ، އަދި އިންސާނުންނަށް ވަރަށް މުހިންމު ކަމެކެވެ. މިކަމުގެ ސަބަބުން ދުނިޔޭގެ އެކި ކަންކޮޅުތަކުގައި ދިރިއުޅޭ އިންސާނުންނަށް އެތައް ފައިދާއެއްވެސް ކުރެއެވެ. އަހަރެމެންނަށް އިހުސާސް ނުވިއެއްކަމަކު، މާތް ﷲ މި ނިޒާމު މިމަގުން ތަރުތީބުކުރައްވާފައި މިވަނީ ވަރަށްވެސް ބޮޑެތި ހިކުމަތްތަކަށް ޓަކައެވެ. ވިސްނާ ފިކުރު ކުރާ ބަޔަކަށް ނޫނީ ނުވިސްނޭނެއެވެ. ހިތާމައަކީ ދިޔަވަރަކީ ކޮބައިކަންވެސް ނޭނގޭ މީހުން އަޅުގަނޑުމެންގެ ތެރޭގައިވެސް އުޅޭ ކަމެވެ. ދިވެހިންނަކީ ކަނޑަށް އުފަން ކަނޑުގެ އަހުލުވެރިންވިއްޔާއެވެ. ދިޔަވަރަކީ ކޮބައިކަން ނުއެނގުނީމާ ދެން ވަކި ބުނާނީ ކީކޭ ހެއްޔެވެ؟
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން