އިންސާނުންގެ ދިރިއުޅުމުގައި އެންމެ މުހިންމު އެއްކަމަކީ ތެދުވެރިކަމާއެކު މި ދުނިޔޭގައި ދިރިއުޅުމެވެ. ނަމަވެސް، މިއަދުގެ މުޖުތަމަޢުގައި ގިނަ މީހުން އަމިއްލަ މަޤްޞަދު ހާސިލުކުރުމަށްޓަކައި އެހެން މީހުން ދައްކާ ވާހަކަތައް އޮޅުވާލައިގެން، ނުބައި މާނަތަކެއް ދޭހަކޮށްދޭގޮތަށް ދެއްކުމަކީ އާދައިގެ ކަމަކަށް ހަދައިފިއެވެ. މިފަދަ ޢަމަލުތަކަކީ އިސްލާމްދީނުގައި ވަރަށް ބޮޑަށް މަނާކުރެވިފައިވާ ކަންތައްތަކެވެ.

އަޅުގަނޑުމެންގެ މާތްވެގެންވާ ދީނުގައި ދޮގުހެދުމަކީ ބޮޑުވެގެންވާ ފާފައެއްގެ ގޮތުގައި ބަޔާންކުރެވިފައިވެއެވެ. ﷲ ތަޢާލާ ޤުރުއާނުގައި ވަޙީކުރައްވާފައިވާ ބަސްފުޅެއްގެ މާނައިގައި ވެއެވެ. "އޭ އީމާންވެއްޖެ މީސްތަކުންނޭވެ! ތިޔަބައިމީހުން ﷲ އަށް ތަޤްވާވެރިވާށެވެ! އަދި ތެދުވެރިންނާއެކު ވާށެވެ!" (ސޫރަތުއް ތައުބާ: 119) މި އާޔަތުން އަޅުގަނޑުމެންނަށް އެނގިގެންދަނީ ތެދުވެރިކަމުގެ މުހިންމުކަމެވެ.

އެހެން މީހުންގެ ވާހަކަ އޮޅުވާލައިގެން ދެއްކުމުގެ ސަބަބުން ނޭދެވޭ އެތައް ނަތީޖާއެއް ނުކުމެއެވެ. މިސާލަކަށް، މީހުންގެ މެދުގައި އޮންނަ އިތުބާރު ގެއްލި، ގުޅުންތައް ކެނޑިގެން ހިނގައިދާނެއެވެ. އަދި މުޖުތަމަޢުގެ ތެރޭގައި ފިތުނަފަސާދަ އުފެދި، އެކުވެރިކަން ނެތިގެން ހިނގައިދާނެއެވެ. ސުލްހަވެެރިކަން ހަލަބޮލިކަމަށް ބަދަލުވެ ނަފްރަތާއި ރުޅިވެރިކަން އިންތިހާއަށް ބޮޑުވެގެން ދެއެވެ.

އަމިއްލަ މަޤްޞަދު ހާސިލުކުރުމަށްޓަކައި ތެދުވެރިކަމާއެކު މަސައްކަތްކުރުމަކީ އެންމެ ރަނގަޅު ގޮތެވެ. މިގޮތުން، އަމިއްލަ ޤާބިލުކަން އިތުރުކޮށް، ބުރަ މަސައްކަތްކޮށް، އަދި ހުނަރު ތަރައްޤީކުރުމަކީ ވަރަށް މުހިންމު ކަމެކެވެ. މީގެ އިތުރުން، އެހެން މީހުންނާ ރަނގަޅު ގުޅުން ބަދަހިކޮށް، އެހީތެރިކަން ހޯދުމަކީވެސް މުހިންމު ކަމެކެވެ. ތިމާގެ ހިޔާލު ހިއްސާކުރުމުގައި އަނެކުން ފަލީހަތްނުކުރާށެވެ. އަނެކާ ބަދުނާމު ނުކުރާށެވެ.

އަޅުގަނޑުމެން ކޮންމެ މީހަކުވެސް އަމިއްލަ ނަފްސަށް ސުވާލުކުރަންޖެހެއެވެ. އަޅުގަނޑުމެން ބޭނުންވަނީ ކުރުމުއްދަތެއްގެ ކާމިޔާބީތޯ ނުވަތަ ދިގުމުއްދަތަކަށް ދެމިގެންދާނެ ކާމިޔާބީއެއްތޯ؟ ތެދުވެރިކަމާއެކު ދިރިއުޅެ، އެހެން މީހުންގެ ވާހަކަ އޮޅުވާލައިގެން ނުދައްކާ ތިބުމަކީ، ދުނިޔެއާއި އާޚިރަތުގައި ކާމިޔާބު ލިބޭނެ މަގެވެ. އަޅުގަނޑުމެން އެންމެން މިކަމަށް ސަމާލުކަން ދީ، ތެދުވެރި މުޖުތަމަޢެއް ބިނާކުރުމަށް މަސައްކަތްކުރަމާ ހިންގަވާށެވެ. އެހެންމީހުންގެ ވާހަކަތައް މާނަކުރަން ތިބާ ނޫޅޭށެވެ. ނުބައި ދޭހައެއް ދޭހަވާނަމަ، އެމީހަކާ ސުވާލުކުރާށެވެ. އެ ބަހެއް ބުނި މީހާ، އެބަހެއް ބުނި ހަގީގީ ސަބަބާއި އެ ބަހުގެ މާނަ ނޭނގި، އޭނާ އެ ބުނި ބުނުމެއް އޮޅުވާލައިގެން އެވާހަކަ ދެއްކުމަކީ އެއްވެސް ހާލެއްގައި ބުއްދިވެރިއަކު ކުރާނެ ކަމެއް ނޫނެވެ. އެހެނީ މާދަމާ އެހެންމީހަކު އޭނާގެ ވާހަކަތަކަށްވެސް އެފަދައިން ހުކުމްކޮށްފާނެއެވެ.