ޙަޔާތުގެ ބައިވެރިއެއް އިޙްތިޔާރުކުރާއިރު، އެމީހެއްގެ ކިބައިގައި ހުންނަން އަހަރުމެން އެދޭ ސިފަތަކަކާއި، ދެކެން ބޭނުންވާ ކަންތައްތަކެއް ހުރެއެވެ. މިހާރުގެ ގޮތުންނަމަ ވަކި 'ސްޓޭންޑަރޑް' ތަކެއް ހުރެއެވެ. ނަމަވެސް ވިސްނާލުން މުހިންމު އެއް ސުވާލަކީ، ބައިވެރިޔާގެ ކިބައިގައި ހުރުމަށް އަހަރުމެން ބޭނުންވާ ސިފަތައް، ޚުދު އަހަރުމެންގެ ކިބައިގައި އެބަހުރިތޯއެވެ. އަހަރުމެންގެ ކިބައިގައި ނެތް ސިފައެއް، ޙަޔާތުގެ ބައިވެރިޔާގެ ކިބައިގައި ހުރުމަށް އެދުމަކީ ހަމަޖެހޭ ވިސްނުމެއް ނޫނެވެ. 

ބޭނުންވަނީ އަޚްލާޤު ރަނގަޅު، ޙެޔޮލަފާ ބައިވެރިއެއްނަމަ، އެފަދަ މީހަކަށް އަހަރުމެންވެސް ވާންޖެހެއެވެ. އަނބިމީހާ ނުވަތަ ފިރިމީހާއަކީ ބަރާބަރަށް، ކޮންމެ ނަމާދެއް އޭގެ ވަގުތުގައި އަދާކުރާ މީހަކަށް ވުމަށް އަހަރުމެން އެދޭނަމަ، އެންމެ ފުރަތަމަ 5 ވަގުތުގައި ޤިބުލަޔަށް ކުރިމަތިލާ، ނަމާދު ޤާއިމްކުރާ ބަޔަކަށް ވާންޖެހޭނީ އަހަރުމެންނެވެ. ހަމައެހެންމެ، ޙަޔާތަށް ގެންނަން ބޭނުންވަނީ މީހުންނަށް އިޙްތިރާމްކޮށް، ރިވެތި ބަހުރުވައިން މުޚާތަބުކުރާ ފަރާތެއްނަމަ، މީހުންނަށް ބަދުބަސްބުނެ، ޖަދަލުކޮށް، ހަޑިހުތުރު ލަފުޒުތަކުން ވާހަކަދައްކާ މީހުންނަށް އަހަރުމެން ވެގެން ނުވާނެއެވެ. ހިތުހުރިހާ ހުތުރުބަސްތަކުން އަހަރުމެން މުޚާތަބުކޮށްފައި، މާތް ބަހުރުވައިން ވާހަކަދައްކާ ބައިވެރިއެއް ބޭނުންވީމާ ކަމަކުނުދެއެއް ނޫން ހެއްޔެވެ؟

ހަށިގަނޑު ފޮރުވާ، އައުރަ ނިވާކޮށްފައި ހުންނަ ބައިވެރިއެއް ބޭނުންނަމަ، އައުރަ ކަޝްވުފާފަދަ އަންނައުނަތަކުން ހެދުންއެޅުމުން އަހަރުމެން ދުރުހެލިވާންޖެހެއެވެ. ހިލޭ ފިރިހެނުން ނުވަތަ ހިލޭ އަންހެނުންނާ އަހަރުމެންގެ ބައިވެރިޔާ މާބޮޑަށް ގާތްވެގެން އުޅުމަށް އަހަރުމެން ނުރުހޭނަމަ، އެފަދައިން އަހަރުމެންގެ ޢަމަލުތައްވެސް ބައްޓަންވެގެން ނުވާނެއެވެ. މީގެއިތުރުން، މިސާލަކަށް އަހަރުމެން ބޭނުންވަނީ، މިޔުޒިކާއި ނެށުންފަދަ ކަންކަމުން ބަރީއަވެފައިވާ، ކީރިތި ޤުރުޢާނާއި ރައްޓެހި އަނތްބެއް ނުވަތަ ފިރިއެކެވެ. ނަމަވެސް އަހަރުމެންނަކީ މިޔުޒިކަށް ދެވިހިފައި، ނާޗަރަންގީތަކުގެ ދުނިޔޭގައި އުޅޭ، މުސްޙަފް ނުވެސް ހުޅުވާ މީހުންނަމަ، ދެފުއް ދެގޮތްވީ ނޫން ހެއްޔެވެ؟ އަނބިމީހާ ނުވަތަ ފިރިމީހާ ކުރުމަށް އަހަރުމެން ނޭދޭ ކަންތައް، ޚުދު އަހަރުމެން ކުރަންވީ ކީއްވެ ހެއްޔެވެ؟

ކީރިތި ޤުރުޢާނުގެ ނޫރު ސޫރަތުގައި ވެއެވެ. "ނުބައި އަންހެނުން ނުބައި ފިރިހެނުންނަށެވެ. ނުބައި ފިރިހެނުން ނުބައި އަންހެނުންނަށެވެ. ރަނގަޅު އަންހެނުން ރަނގަޅު ފިރިހެނުންނަށެވެ. ރަނގަޅު ފިރިހެނުން ރަނގަޅު އަންހެނުންނަށެވެ. އެއުރެން (އެބަހީ: ނުބައިމީހުން) ބުނާ ބުނުންތަކުން އެއުރެން (އެބަހީ: ރަނގަޅުމީހުން) ބަރީއަވެގެންވެއެވެ. ފާފަފުއްސެވުމާއި، ދީލަތިވެގެންވާ رزق އެއުރެންނަށް ހުށްޓެވެ." (24:26)

އެހެންކަމުން، އަހަރުމެން ބޭނުންވާ ކަހަލަ ޙަޔާތުގެ ބައިވެރިޔަކަށް ފުރަތަމަ ވާންވީ އަހަރުމެންނެވެ. ބައިވެރިޔާގެ ކިބައިން ފެންނަން ބޭނުންވާ ސިފަތައް ފުރަތަމަ އަށަގަންނުވަންވީ އަހަރުމެންގެ ކިބައިގައެވެ. ބައިވެރިޔާގެ ފަރާތުުން ދެކެން ބޭނުންވާ އަޚްލާޤުވެސް ފުރަތަމަ ހަރުލައްވަންވީ އަހަރުމެންގެ އަމިއްލަ ނަފުސުގައެވެ.