އިސްރާޢީލުގެ ލާއިންސާނީ ޙަމަލާތަކާއި އެބައިމީހުންގެ އަނިޔާވެރިކަން ދުނިޔޭގެ ލޯމައްޗަށް ގެނައުމުގައި އެންމެ އިސްދައުރެއް އަދާކުރަމުންދަނީ ޢާޒާގެ ހިތްވަރުގަދަ ނޫސްވެރިންނެވެ. އަނިޔާވެރިންނަކީ ހަމާސްކަމުގައި ދައްކާ، އަނިޔާ ލިބެމުންދަނީ އިސްރާޢީލުގެ މީހުންނަށް ކަމަށް ބުނެ، މުޅި ދުނިޔޭގެ ލޮލުގައި އަނދުން އަޅުވައިގެން އިސްރާޢިލުން އުޅޭތާ ޒަމާންތަކެއް ވެއްޖެއެވެ. އެކަމަށް ނިމުމެއް ގެނައީ، ހައްޤު ފާޅުކުރުމަކީ ފަރުދީ ޒިންމާކަމުގައި ދެކިގެން ނުކުތް އެ ނޫސްވެރިންނެވެ. ޖާނަލިސްޓުންނެވެ. އެހެންކަމުން، އިސްރާޢީލުގެ އަމާޒަކަށް އެ ނޫސްވެރިން ހުށަހެޅިފައިވެއެވެ. އެ ޤަތުލުޢާއްމުގައި، 7 އޮކްޓޫބަރު 2023އިން ފެށިގެން، ފަލަޞްޠީނުގައި ޝަހީދުކޮށްލި ނޫސްވެރިންގެ އަދަދު 208 އަށްވަނީ އަރާފައެވެ.
މިފަހުން ޝަހީދުކޮށްލުވުނު ނޫސްވެރިންގެ ތެރޭގައި ޙުއްސާމް ޝަބާތް ނަމަކަށް ކިޔާ ޒުވާން ނޫސްވެރިއެއް ހިމެނެއެވެ. މީގެއިތުރުން، ނޫސްވެރިޔާ މުޙައްމަދު މަންސޫރުވެސް ޝަހީދުކޮށްލާފައިވަނީ ދާދިފަހުންނެވެ. ޚާން ޔޫނުސްއަށް އިސްރާޢީލުން ދިން ޙަމަލާއެއްގައި އެ ނޫސްވެރިޔާއާއި، އޭނާގެ އަނބިމީހާގެ އިތުރުން އަންހެން ދަރިފުޅުވަނީ ޝަހީދުވެފައެވެ. މުޙައްމަދު މަންސޫރުގެ ބައްޕަ، އެ ފުރާނަ ނެތް ހަށިގަނޑާ މުޙާތަބުކުރަމުން، އަތުގައި އޮތް މައިކުވެސް މަންސޫރުގެ އަނގަޔާ ދިމާއަށް ދިއްކުރަމުން، ބުނަމުން ދިޔައެވެ. "ތެދުވާށެވެ. ތެދުވެފައި ދުނިޔެއަށް ކިޔައިދޭށެވެ. ތެދުވާށެވެ." އެ ބައްޕަގެ ލޮލުން ކަރުނަ ނުހިކެއެވެ.
އެތައް ފަހަރެެއްގެ މަތިން، އެތައް ނޫސްވެރިންނެއްވަނީ، އެފަރާތްތަކަށް އޮތް ނުރައްކާ ހާމަކޮށް، ކަންބޮޑުވުން ފާޅުކޮށްފައެވެ. ޕްރެސް ވެސްޓާއި ހެލްމެޓް އަޅައިން އުޅުނަސް އެ ޙަމަލާތަކުން ރައްކާތެރިކަމެއް ނޯންނަކަމަށް ބުނެ އެކަން ހިއްސާކޮށްފައެވެ. ކޮންމެ ނޫސްވެރިއަކީ ރަސްމީ މީޑިއާއަކަށް ނިސްބަތްވާ ނޫސްވެރިއެއް ނޫނެވެ. އަމިއްލަގޮތުން މައިދާނަށް ނުކުމެ އުޅޭ ނޫސްވެރިންވެސް އެ ފަލަޞްޠީނުގެ ފަސްގަނޑުގައި މަދެއް ނުވާނެއެވެ.
އެއް މައިދާނުގައި، އެކީ އުޅުނު ނޫސްވެރިންނަށް ޙަމަލާތައް އަމާޒުކުރުމުގެ ސަބަބުން، ފަލަޞްޠީނުގެ ނޫސްވެރިންވަނީ އިޖުތިޙާދުކޮށްފައެވެ. ޤާޒާގެ ޚާން ޔޫނުސްގައިވާ އަލް-ނަޞެރް ހޮސްޕިޓަލް ކުރިމަތީ އެ ނޫސްވެރިން އެތުރިލައިގެން ތިބީ، ޝަހީދުވެފައިވާ ބައެއް ނޫސްވެރިންގެ ޕޮޓޯއާއި ޕޯސްޓަރުތައް ހިފައިންނެވެ. އެތަނުން ނޫސްވެރިއެއް ހިއްސާކޮށްފައިވެއެވެ. "ތަނުގައި ހިންގާ ޢަމަލުތައް ފާޅުކުރިޔަ ނުދިނުމަށާއި، ނޫސްވެރިންގެ އަނގަ ބަންދުކުރުމަށްޓަކައި އެތައް ޙަމަލާތަކެއް އަހަރުމެންގެ ޢާއިލާތަކަށް އަމާޒުކުރެއެވެ. އެއްތަނުން އަނެއްތަނަށް އަހަރުމެން ބަދަލުކޮށް، ތަކުރާރުކޮށް އިންޒާރުތައްވަނީ ދީފައެވެ. އެއީ ކަމުގެ ހަޤީޤަތް ދުނިޔެއަށް ފޯރުކޮށްދިނުމަށް އަހަރުމެންނަށް ހުރަސްއެޅުމަށެވެ."
އިންސާނަކަށްވީތީ ލިބިދޭން ޖެހޭ ހައްޤު މިހާރު ކޮބާ ހެއްޔެވެ؟ ޙިޔާލުފާޅުކުރުމުގެ މިނިވަންކަން އެންމެނަށް ލިބިގެންވާކަމަށް ހުޅަނގުންކުރާ ދަޢުވާ ކޮބާ ހެއްޔެވެ؟ ޙިޔާލުފާޅުކުރުމާއި، ހަޤީޤަތް ހާމަކުރުމުގެ ހައްޤު ފަލަޞްޠީނުގެ އެ ނޫސްވެރިންނަށް ލިބިގެން ނުވޭ ހެއްޔެވެ؟ 208 ނޫސްވެރިން ޝަހީދުކޮށްލުމުން އެނގި ހާމަވަނީ، ހަޤީޤަތް އޮށްބާލަން އެ ނުބައި ޖާހިލުން މަސައްކަތްކުރާ މިންވަރެވެ. އެމީހުންގެ އަނިޔާވެރިކަން ފޮރުވުމަށް އިޙްތިޔާރުކުރާ ލާއިންސާނީ އުކުޅުތަކެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން