ބޮއިކޮޓްކުރުމަކީ، އަހަރުމެން އިޖުތިހާދުކުރުމުގެ ގޮތުން، ވަކި ކުންފުންޏަކުން ނުވަތަ ޤައުމަކުން ވިއްކާ ތަކެތި ގަތުމުން ދުރުހެލިވުމެވެ. އެ އުފެއްދުންތައް ނުގަތުމެވެ. އެގޮތުން އިސްރާއީލުގެ އުފެއްދުންތަކާއި، އެވެރިންނަށް ވާގިވެރިވާ ކުންފުނިތަކުން ވިއްކާ އުފެއްދުންތައް ގަތުމުން ދުރުހެލިވެ، އެތަކެތި ބޮއިކޮޓްކުރުމަކީ ފަލަޞްޠީނުގެ ހައްޤުގައި އަހަރުމެންނަށް ކުރެވިދާނެ ކަމެކެވެ. 

ބައެއް މީހުން ބުނެއެވެ. "ބޮއިކޮޓްކުރީމާ ވަކި ވަނީ ކީއްހެއްޔެވެ؟ ފަލަޞްޠީނަށް ދެމުންދާ އަނިޔާތަކާއި ޙަމަލާތަކަށް ބަދަލެއް ނާދެއެވެ." ނަމަވެސް އެ އުފެއްދުންތައް އަހަރުމެން ނުގަންނަ ނަމަ، އެ އުފެއްދުންތައް ވިއްކާ ފިހާރަތަކުގެ މީހުން އެތަކެތި ރީޓެއިލްއެއް ނުކުރާނެއެވެ. އެމީހުން ރީޓެއިލް ނުކުރާނަމަ، އެ އުފެއްދުންތައް ރާއްޖެ އެތެރެކުރާ ފަރާތްތައް އެކަންވެސް ހުއްޓާނެއެވެ. ނަތީޖާއެއްގެ ގޮތުން، އެންމެ މައި ކުންފުންޏަށް އޭގެ ގެއްލުމާއި ކުރިމަތިލާން ޖެހޭނެއެވެ. އެ އުފެއްދުންތަކުން އެތެރެވާ ފައިސާ އެމީހުންނަށް މަދުވާނެއެވެ. އެ ތަކެތި ވިއްކައިން ލިބޭ ފައިސާގެ ޒަރީޢާއިން އެމީހުން އިސްރާއީލަށް ވާ އެހީތަކަށް ބުރޫއަރާނެއެވެ.

އިސްރާއީލަށް އެހީތެރިވެ ވާގިވެރިވަނީ ނަން މަޝްހޫރު ބޮޑެތި ކުންފުނިތަކެވެ. ޒަމާނުއްސުރެ އެންމެން ދަންނަ، އިންޑަސްޓްރީގައި ވަރުގަދައަށް ފައިވިއްދާފައި ތިބޭ ކުންފުނިތަކެވެ. އެހެންކަމުން ބޮއިކޮޓްގެ އަސަރަކީ ހަމަ ކުއްލިއަކަށް ފެންނާނެ އަސަރެއް ނޫނެވެ. އެކަމަށް ވަގުތު ނަގާނެއެވެ. ނަމަވެސް އޭގެ އަސަރު ފެންނާނެއެވެ. މިހާރުވެސް ދަނީ ފެންނަމުންނެވެ.

އިސްރާއީލަށް ވާގިވެރިވެ އެހީތެރިވާ، އަދި ސަޕޯޓުކުރާ ކުންފުނިތަކަށް ބޮއިކޮޓްގެ ރަހަލާން މިހާރު ފަށައިފިއެވެ. އެގޮތުން، ސްޓަރބަކްސްގެ ފައުންޑަރއިން ހާމަކުރާ ގޮތުގައި، ގިނަ ބަޔަކު އެ ކުންފުނި ބޮއިކޮޓްކުރުމުން ކުންފުނީގެ ސޭލްސްވަނީ (ތަކެތި ވިއްކޭ މިންވަރުވަނީ) ބޮޑުތަނުން ދަށްވެފައެވެ. މީގެއިތުރުން، ގާތްގަނޑަކަށް 100 ކޭ.އެފް.ސީ ބްރާންޗުވަނީ ބަންދުކުރަން ޖެހިފައެވެ. ޚިދުމަތް ހޯދާ މީހުން ނުވަތަ ކަސްޓަމަރުން މަދުވީމައެވެ. މީގެ ސަބަބުން، ވިއްކާ ތަކެތިން ލިބޭ ފައިސާއާއި، ސޭލްސްވަނީ ދަށްވެފައެވެ. ހަމައެހެންމެ، މަޝްހޫރު ފެޝަން ބްރޭންޑް ޒާރާއަށް ގިނަ ބައެއްގެ ފާޑުކިޔުންތަކާއި ކުރިމަތިލާން ޖެހުނެވެ. އެއީ ފަލަޞްޠީނުގައި ޙާލުގައިޖެހިފައިވާ ފަރާތްތަކަށް މަލާމާތްކުރާކަން ދޭހަވާފަދަ މަންޒަރުތަކެއް ޒާރާގެ ޕޯސްޓުތަކުން މީހުންނަށް ފަހުމުވުމުންނެވެ. ނަތީޖާއެއްގެ ގޮތުން، ޒާރާގެ އުފެއްދުންތައް ވިއްކާ މޯލް ކައިރީ ގިނަބަޔަކުވަނީ މުޒާހަރާކޮށް އަޑުއުފުލާފައެވެ.

މެކްޑޮނާލްޑްސްއަށް، އެމީހުން ތަކެތި ވިއްކުމަށް ކަނޑައަޅާފައިވާ މިންވަރަށް (ސޭލްސް ޓާގެޓަށް) ވާސިލްނުވެވުނީވެސް މީހުން ބޮއިކޮޓްކުރުމުގެ ސަބަބުންނެވެ. ހަމަމިއާއެކު، ކޮކާ-ކޯލާގެ ސަޕޯޓުވެސް އިސްރާއީލަށް ލިބެމުންދާތީ، އެ ކުންފުނިވެސް އޮތީ ބޮއިކޮޓް ކުރުމުގެ ރަތް ލިސްޓަށް އަރާފައެވެ. ތުރުކީގެ ޕާލިމެންޓުންވަނީ، އެތަނުގެ ފިހާރަތަކާއި ރެސްޓޯރެންޓުތަކުން ކޮކާ-ކޯލާ ބޭރުކުރުމަށް ވޯޓުލާފައެވެ. އަދި 2023 ވަނަ އަހަރުގެ ފަހު ކްއާޓަރގައި، 22% އަށް ސޭލްސް ވެއްޓިފައިވާކަމަށް ކޯކުގެ ތުރުކީ ޑިސްޓްރިބިޔުޓަރ ރިޕޯޓުކޮށްފައިވާކަމަށް، އަލް-ޖަޒީރާގެ ރިޕޯޓެއްގައި ހާމަކޮށްފައިވެއެވެ. މީގެއިތުރުން، ޔޫއެސްގެ ޕިއްޒާ އުފައްދާ ކުންފުނިކަމުގައިވާ ޑޯމިނޯ'ސްގެ ސޭލްސް 8.9% އަށް އޭޝިއާގައި ދަށްވެފައިވެއެވެ. އެއީ އެކުންފުނިން އިސްރާއީލު ސިފައިންނަށް ހިލޭ ކެއުންތައް ދޭކަމަށް، ސޯޝަލް މީޑިއާގެ ޒަރީޢާއިން ފަޅާއެރުމުގެ ސަބަބުންނެވެ. 

ބޮއިކޮޓްކުރުމުގެ ސަބަބުން ކުންފުނިތަކާއި ބްރޭންޑުތަކުން ދެކެމުން އެދަނީ އެމީހުންގެ ފިހާރަތަކާއި ބްރާންޗުތައް ބަންދުކުރަންޖެހޭތަނެވެ. އުފެއްދުންތައް ވިއްކޭ މިންވަރު (ސޭލްސް) ދަށްވާތަނެވެ. ޤަތުލުޢާއްމަކަށް އެހީތެރިވެ ވާގިވެރިވުމަކީ އެއްވެސް ޙާލަތެއްގައި ބަލައިގަނެވޭނެ ކަމެއް ނޫނެވެ. އިސްރާއީލަށް އެހީތެރިވުމަކީ އެ ކުންފުނިތަކުގެ އަމިއްލަ އިޙްތިޔާރުގައި ކުރާ ކަމެކެވެ. އެކަމުގެ ސަބަބުން ބޮއިކޮޓްއާއި ކުރިމަތިލާން ޖެހުމަކީ އެކަމުގެ ނަތީޖާއެވެ. ބޮއިކޮޓްގެ ޒަރީޢާއިން ތަފާތު ދެއްކޭނެއެވެ. ބޭނުންވަނީ ފަލަޞްޠީނުގެ ހައްޤުގައި އެކަން ކުރާނެ މީހުންނެވެ.