ފަލަޞްޠީނުގެ ރައްޔިތުންނާއި ދެކޮޅަށް އިސްރާއީލުން ކުރިޔަށް ގެންދާ ލާއިންސާނީ އަނިޔާތަކާއި ޙަމަލާތަކަކީ މިހާރު ދުނިޔެއަށް ވަންހަނާ ކަމެއް ނޫނެވެ. އެ އަޚުންނާއި އުޚުތުންގެ ޙައްޤުގައި އަހަރުމެންނަށް ކުރެވޭނެ އެއްކަމަކީ، އިސްރާއީލާއި އެވެރިންނަށް ވާގިވެރިވެ، އެހީތެރިވާ ކުންފުނިތަކުގެ އުފެއްދުންތައް ބޭނުން ނުކުރުމެވެ. ބޮއިކޮޓްކުރުމެވެ. އެގޮތުން، އެފަދަ އުފެއްދުންތައް ދެނެގަންނާނެ އެޕްލިކޭޝަންއެއް އަހަރުމެންނާ ހަމައަށް ގެނެސްދީފައިވެއެވެ. އެއީ ގަންނަންވީ އުފެއްދުންތަކާއި، ނުގަނެ ބޮއިކޮޓް ކުރަންވީ އުފެއްދުންތައް ފަސޭހައިން ދެނެގަނެވޭނެ އެޕްލިކޭޝަންއެކެވެ.

އެ އެޕްލިކޭޝަންއަށް ކިޔަނީ 'ނޯ ތޭންކްސް އެޕް' [No Thanks app] އެވެ. މިއީ ފަލަޞްޠީނުގެ އަޙްމަދު ބަޝްބާޝް އުފައްދާފައިވާ އެޕްލިކޭޝަންއެކެވެ. މި ޙިޔާލަކީ، ބޮއިކޮޓް ކުރުމަށް އެހީތެރިވުމަށްޓަކައި އެޕެއް ހަދައި، ބޮއިކޮޓް ލިސްޓުގައި ހުރި އުފެއްދުންތަކަކީ ކޮބައިކަން، އެ އެޕްގެ ޒަރީޢާއިން މީހުންނަށް ބުނެދިނުމެވެ. ގަންނަން ބޭނުންވާ އުފެއްދުމެއްގެ ބާ-ކޯޑް ސްކޭންކޮށްލުމުން، ނުވަތަ ބްރޭންޑުގެ ނަން ޖަހާލުމުން، އެ އުފެއްދުމަކީ ބޮއިކޮޓްކުރަންޖެހޭ އުފެއްދުމެއްތޯ ނުވަތަ ނޫންތޯ، އެ އެޕުން ބުނެދޭނެއެވެ. މި އެޕްގައި، ބޮއިކޮޓް ކުރަންޖެހޭ އުފެއްދުންތަކުގެ ލިސްޓެއްވެސް ހިމަނާފައިވެއެވެ. 

ބާ-ކޯޑް ސްކޭންކުރުމުން، އެ އުފެއްދުމަކީ ބޮއިކޮޓްކުރަން ޖެހޭ އުފެއްދުމެއްނަމަ، އެ އުފެއްދުމުގެ ކުރު ތަޢާރަފަކާއި، އެ ބްރޭންޑާއި އިސްރާއީލާއި ދެމެދުގައި އޮންނަނީ ކޮން ގުޅުމެއްކަންވެސް ވަރަށް ސާފުކޮށް ބުނެދެއެވެ. އަދި މި އެޕް ފަރުމާކުރެވިފައިވަނީ، އެ ބްރޭންޑާއި އިސްރާއީލާ ދެމެދު އޮންނަ ގުޅުމުގެ ހެކިވެސް ފެންނަ ގޮތަށެވެ. 13ހާސް ރޭޓިން ލިބިފައިވާ މި އެޕްއަށް، 4.9 ގެ ސްޓަރ ރޭޓިންގ އެއް ލިބިފައިވެއެވެ. ގޫގްލް ސްޓޯ އަދި އެޕަލް ސްޓޯގައިވެސް މި އެޕް ފެންނަން އިންނާނެއެވެ. އެހެންކަމުން، އެންޑްރޮއިޑް ގެންގުޅުނަސް، ނުވަތަ އެޕަލް ގެންގުޅޭކަމުގައި ވިޔަސް މި އެޕްލިކޭޝަން ބޭނުންކުރެވޭނެއެވެ.

މި އެޕްލިކޭޝަންގެ ބާނީ، އަޙްމަދު ހާމަކުރާގޮތުގައި، މި އެޕްގެ ޙިޔާލު އައިސް، އެޕް ހަދަން ފެށީ އޭނާއަކީވެސް ޞިޙްޔޫނީންގެ އަނިޔާވެރިކަން ތަޙައްމަލުކުރި ފަރާތަކަށްވީތީއެވެ. އެގޮތުން 2020ވަނަ އަހަރު އަޙްމަދުގެ ދައްތަ މި ދުނިޔެއާ ވަކިވެގެން ދިޔައީ އެންމެ އެދެވޭ ބޭސްފަރުވާ ނުލިބުމުންނެވެ. 31 އޮކްޓޫބަރުގައި އަޙްމަދުގެ ބޭބެ ޝަހީދުވީ މީހުން އުޅޭ 4 ގެއަކަށް ދިން ބޮމުގެ ޙަމަލާއެއްގައެވެ. މީގެ ސަބަބުން އަޙްމަދު ނިންމީ، މި އެޕް ފުރިހަމަކޮށް، އަޙްމަދުގެ ބޭބެއާއި ދައްތަގެ ފަރާތުން، އެންމެނަށްވެސް ހިލޭ ބޭނުންކުރެވޭ އެޕަކަށް މި އެޕް ހަދާށެވެ. މިއީ ޕްރޮޕިޓް ލިބޭ ގޮތަށް އަޙްމަދު ފަރުމާކުރި އެޕެއް ނޫނެވެ. މީގެ ޒަރީޢާއިން އެއްވެސް ފައިސާއެއް ލިބޭނަމަ، އެ ފައިސާތައް އަޙްމަދު ފޮނުވާނީ ފަލަޞްޠީނަށް އެހީވާ ޖަމްޢިއްޔާތަކަށްކަމަށް އަޙްމަދު ހާމަކުރެއެވެ.