ބަލައިލި ކޮންމެ ދިމާލަކުން މިހާރު ފެންނަނީ 'ގިބްލީ ސްޓައިލް' ގެ ތަސްވީރުތަކެވެ. އިންސްޓަރގްރާމެއް އެހެން ގުރާމެއް ކިޔާނެ ކަމެއް ނެތެވެ. އެމީހެއްގެ އަމިއްލަ ސެލްފީއިން ފެށިގެން، ރައްޓެހިންނާއި އާއިލާއާއެކީ ނަގާފައިވާ ފޮޓޯތަކާއި، ކައިވެނި ހަފްލާގެ އެތަކެއް ފޮޓޯތަކެވެ. އެކަމަކު ގިބްލީއަކީ ކޯއްޗެއް ހެއްޔެވެ؟ ޖަޕާނުގައި މި ލަފްޒު ކިޔަނީ 'ޖިބްލީ'، މިފަދައިންނެވެ.

ގިބްލީ ސްޓޫޑިއޯއަކީ 1985 ގައި އުފެއްދި ޖަޕާނުގެ އެނިމޭޝަން ފިލްމު ސްޓޫޑިއޯއެކެވެ. މީގެ ބާނިންނަކީ، އެނިމޭޓަރސް އަދި ޑިރެކްޓަރސްކަމަށްވާ މިޔަޒަކީ ހަޔާއޯ އާއި، ޓާކަހަޓާ އިސާއޮ އަދި ޕްރޮޑިއުސަރ ސުޒުކީ ޓޮޝިއޯއެވެ. ގިބްލީއަކީ އެނިމޭޝަންގެ ވައްތަރެކެވެ. ކާޓޫނުތައް ފަދައިން ފަރުމާކޮށްފައިވާ މި ގިބްލީ ސްޓޫޑިއޯއަކީ، ތަފާތު އުސްލޫބެއް ނުވަތަ ސްޓައިލެއް ދައްކުވައިދޭ ވައްތަރެކެވެ. ގިބްލީ ސްޓޫޑިއޯ ބޮޑަށް މަޝްހޫރުވެފައިވަނީ، ފިލްމު އުފެއްދުމުގައި ހުންނަ މޮޅު ކުއަލިޓީއާއި ފަންނުވެރިކަމުގެ ސަބަބުންނެވެ. ގިބްލީ ސްޓޫޑިއޯގައި އުފައްދާފައިވާ ގިނަ ފިލްމުތައް ލިޔެ، ޑައިރެކްޓުކޮށްފައިވަނީ މިޔަޒަކީ ހަޔާއޯއެވެ. 

ގިބްލީ ސްޓައިލް ހަމަ ތަފާތެވެ. ބަލައިލަން ނުހަނު ހިތްގައިމުވެފައި، ޗާލެވެ. ކުލަތައް އަލިވެފައި ކުރެހުންގަނޑު ވަރަށް ޖާދުވީއެވެ. ހަމަ ބަލާ ފޫހިނުވާ ކަހަލަ ގޮތްގަނޑެއް ހުރެއެވެ. ހާމަވަނީ އެ ސްޓައިލް އުފެއްދި ފަރާތްތަކުގެ ޙިޔާލާއި ވިސްނުން ތަނަވަސްކަމާއި، އުފެއްދުންތެރިކަމުން ސިކުނޑި ބަރާވެފައިވާ މިންވަރެވެ.

ނަމަވެސް މި 2025 ވަނަ އަހަރުގެ މާރޗް މަހުން ފެށިގެން މުޅި ސޯޝަލް މީޑިއާގައި ބަންޑުންވަމުން މިދަނީ 'އޭ.އައި' އިން ނަކަލު ކުރަމުންދާ ގިބްލީ ސްޓައިލްގެ ފޮޓޯތަކެވެ. އެމެރިކާގެ އޭއައި ރިސާރޗް އޮގަނައިޒޭޝަންއެއް ކަމަށްވާ 'އޯޕެން އޭއައި' އިން ރިލީޒްކުރީ، މީހުންގެ ފޮޓޯތައް ކުޑަ ވަގުތުކޮޅެއްގެ ތެރޭގައި ގިބްލީ ސްޓައިލްއަށް ބަދަލުކުރާ އުކުޅެކެވެ. މިކަން ވައިގައިހިފާކަށް މާކަގިނަ ވަގުތެއް ނުނެގިއެވެ. އިންސްޓަގްރާމްގެ އެކްސްޕްލޯ ބައި ބަލައިލިޔަސް އެނޫން އެއްޗެއް ނުފެނެއެވެ. ފޭސްބުކަށް ވަނަސް ހަމަ މުޅިން ގިބްލީއެވެ. 

މީގެ ބޭނުން ގިނަބަޔަކު ހިފަމުން ދިޔަސް، ބައެއް ފަރާތްތަކުން މިކަމާ ކަންބޮޑުވުން ފާޅުކުރެއެވެ. އެގޮތުން، އެތައް އަހަރުތަކަކުން، އެތައްް ދަލެއް އޮހޮރުވާ، ކަރުދާހުގައި ފަންސުރުން ކުރަހައިން، ނުހަނު ބުރަ މަސައްކަތަކުން އުފެއްދި މި ސްޓައިލް، މީހުން އެންމެ ޖުމުލައެއް ލިޔެލީމާ، 'އޭ.އައި' އިން ނަކަލު ކުރުމަކީ، ބަލައިގަނެވޭނެ ކަމެއް ނޫންކަމަށް އެފަރާތްތަކުން ދަނީ ހާމަކުރަމުންނެވެ. ހަޤީޤީ ބާނީގެ މަސައްކަތް، އޭ.އައިގެ އަމިއްލަ މަސައްކަތެއްގޮތަށް ދައްކައިން 'ކޮޕީ' ކުރުމަކީ އޭގެ ހައްޤުވެރި ފަރާތަށް ވެވޭ ނާއިންސާފެއްކަމަށް މީހުން ބުނަމުންދެއެވެ. އޭ.އައި އަށް ނިސްބަތްކޮށް، މީގެކުރިންވެސް މިޔަޒަކީ ބުނެފައިވަނީ، އޭ.އައި އަކީ ދިރިއުޅުމަށްވެސް ހުރި މަލާމާތެއް ނުވަތަ ފުރައްސާރައެއް (އިންސަލްޓެއް) ކަމަށެވެ.