އޯރަލް ރީހައިޑްރޭޝަން ސޮލޫޝަން (އޯއާރުއެސް) ނުވަތަ ލޮނު ޕެކެޓަކީ ހަށިގަނޑުން މަދުވާ ފެން އިއާދަކުރުމަށް ބޭނުން ކުރެވޭ ބުއިމެއް. ހުން އައުމާއި ބޭރަށްހިންގުން ފަދަ ބަލި ތަކަކީ އޭގެ ސަބަބުން ގިނަ އަދަދަކަށް ހަށިގަނޑުން ފެން ބޭރުކޮށްލާ ފަދަ ބަލިތަކެއް. އެހެންކަމުން މިފަދަ ބަލިތައް ތަހައްމަލު ކުރައްވާ އެންމެ ބޭފުޅުން ކުރުން އެންމެ މުހިންމު ކަމަކީ ހަށިގަނޑުން ބޭރުވާ ފެން އިއާދަކޮށް ހަށިގަނޑުން ފެންމަދުވިޔަ ނުދީ ހިފެހެއްޓުން. އެގޮތުން ގިނަގިނައިން ދިޔާ ތަކެތި ބުއިން ވަރަށް ވެސް މުހިންމު. މީގެ އިތުރުން ލޮނުޕެކެޓް ބޭނުން ކުރުމަކީ އޭގެ ސަބަބުން ހަށިގަނޑުގައި ފެން ހިފަހައްޓައިދީ ވަރު ޖައްސައިދިނުމަށް އެޅޭ ވަރަށްބޮޑު ބާރެއް. ގޭގައި ލޮނުޕެކެޓު ފެން ތައްޔާރުކޮށްލުމަކީ ވަރަށް ފަސޭހަ ކަމެއް. ކޮންމެ ފަހަރަކު ބޭސް ފިހާރައިން ލޮނުޕެކެޓު ގަންނާކަށް ނުޖެހޭ. އެގޮތުން ގޭގައި ލޮނުޕެކެޓު ފެން ތައްޔާރުކުރަން ބޭނުންވާނީ އެންމެ ތިނެތި. އެއީ ފެނާއި ހަކުރާއި އަދި ލޮނު. 1 ލީޓަރު ފެނަށް 6 ސައިސަމުސައި ހަކުރު އަޅާ. އެއަށްފަހު 1/2 ސައިސަމުސައި ލޮނު އަޅާ. ރަނގަޅަށް އެއްކޮލުމުން ލޮނުޕެކެޓުފެން މިހުރީ ތައްޔާރު ކުރެވިފައި. މިގޮތަށް ގޭގައި ތައްޔާރުކުރާއިރު ކޮންމެ އެއްޗެއްވެސް އޭގެ މިންގަނޑުގައި ހިފަހައްޓަންވާނެ. މިންވަރުގައި ތަފާތު ތަކެއް ވާނަމަ އެއީ ފުރިހަމަ ލޮނުޕެކެޓު ފެނަކަށް ނުވާނެ.