"ހިތް އޮންނާނީ ދެލިގަނޑެންހެންނެވެ، ކަން އޮންނާނީ ވެލިގަނޑެންހެންނެވެ." މިއީ ދޫތަކަށް ފަރިތަ ބަހެކެވެ. މި ބަހުން މި ބުނެދެނީ ހަދަވެރިންގެ ވާހަކައެވެ. އެކުގައި އުޅޭ ހަސަދަވެރިންގެ ވާހަކައެވެ. އެހެންކަމުން އެކުވެރިންގެ ތެރެއިން ހަސަދަވެރިން ދެނެގަންނާނީ ކިހިނަކުންހެއްޔެވެ؟ 

މިއީ އެސުވާލަކަަށް ސީދާ ޖަވާބު ހޯދަން ވަރަށް އުނދަގޫވެސް ސުވާލެކެވެ. އެއީ އެކި މީހުންގެ ޢަމަލުތަކާއި ވިސްނުން ތަފާތުވާނެތީއެވެ. ކަންކުރާނެ ގޮތްވެސް ތަފާތުވާނެތީއެވެ. 

ނަމަވެސް މިކަމުގައި ބޭނުންކުރެވިދާނެ ބައެއް ހުނަރު އެބަހުއްޓެވެ. އެގޮތުން ފުރަތަމަ ކަމެއްގެ ގޮތުން އެމީހަކު އެދޭ ކަންކަން ކޮށްނުދީ ލަސްކޮށްލާށެވެ! ދެވަނަ ކަމަކަށް އޭނާ ރުޅިއަންނާނެ ކޮންމެވެސް ކަމެއްކޮށްލާށެވެ! މީހުންގެ ޙަޤީޤީ ސިފަ ހާމަވެގެންދާނެ ވަގުތަކީ އެމީހަކު ރުޅިއަންނަ ވަގުތެވެ. 

ހިތުގައި ހަސަދަލައިގެން ތިބޭ މީހުންގެ ޙަޤީޤީ ކުލަ އެންމެ ފަސޭހައިން ފެނިގެންދާނެ ދެގޮތަކީ މިއީއެވެ. މި ދެކަމުން ކުރެ ކަމެއް މެދުވެރިވުމުން ކޮންޓްރޯލެއް ނުކުރެވޭނެއެވެ. ވަގުތުން "ފަޅައިގެން" ނުދިއަ ނަމަވެސް އިސާހިތަކު ފަޅައިގެންދާނެއެވެ. ތިބާ އާއިމެދު ތަފާތު ވާހަކަތައް ދައްކަން ފަށާނެއެވެ. އަދި ބައެއް މީހުން ތިބާގެ ކުރިމަތީގައިވެސް ފަޅައިގެންދާނެއެވެ. 

އެމިހަކީ ޙަޤީޤީ އެކުވެރިއެއްނަމަ އެހާ ފަސޭހައިން ފަޅައިގެނެއް ނުދާނެއެވެ. އަދި ރުޅި އައިނަމަވެސް އަނެކާ ފަޟީޙަތްކޮށް ބަދުނާމުކުރަމަކުން ނުހިނގާނެއެވެ! މަސައްކަތްކުރާނީ ވީހާ އަވަހަކަށް އެކަމެއް ޙައްލުކުރުމަށެވެ. 

އަނެކުން ރުޅި އަންނާނެ ކަންކަން ކުރުމަކީ ކުރަން ރަނގަޅުކަމެއް ނޫނެވެ. ނަމަވެސް އެމީހެއްގެ ހަސަދަވެރިކަމާއިމެދު ތިބާގެ ހިތުގައި ޝައްކުތަކެއްވާނަމަ އެކަން ބަލައިލުމަށް މަސައްކަތްކޮށްލަން އެބަޖެހެއެވެ. އެއީ އޭނާގެ ކިބައިން ސަލާމަތްވެހުރުމަށެވެ. އެކުވެރިއެއްގެ ގޮތުގައި ހުރެގެން ދީފާނެ ބޮޑު ގެއްލުމަކުން ސަލާމަތްވުމަށެވެ. 

އެފަދަ ކަމެއް ކުރަންޖެހިގެން ކުރިނަމަވެސް ތިބާ އެނގެން ބޭނުން ކަންކަން އެނގުމުން ކުރެވުނު ކަންތަކަށް މާފަށް އެދޭށެވެ! އަދި ކުރިމަތީގައި ބުނެލާށެވެ. "އެކަން ކުރީ ރުޅިއަކުން ނޫނެވެ. ތިބާ އާއިމެދު ހަސަދަވެރިކަމެއް އޮވެގެނެއްވެސް ނޫނެވެ. ހަމައެކަނި ތިބާގެ ޙަޤީޤަތް އެނގުމަށެވެ." 

ޝައްކުގެ މަތީގައި ހުރުމަކީ ފާފައެކެވެ. އަދި އެއްވެސް މީހަކަށް ހަސަދަލުމަކީވެސް ފާފައެކެވެ. ވީމާ މިފަދަ ގޮތަކުން އަނެކާއަކީ ހަސަދަވެރިއެއްކަން އެނގުނު ނަމަވެސް އެމީހަކާއިމެދު ހަސަދަވެރިނުވާށެވެ! އެހިސާބުން އެކަން ހިތުން ފުހެލާށެވެ! މުޅިން އައުފެށުމަކުން ފަށާށެވެ!