ބަނޑުލުމަކީ ގިނަ ބަޔަކަށް ދިމާވާ އާންމު މައްސަލައެކެވެ. މިއީ ހަޖަމު ނިޒާމުގައި ވައި ޖަމާވުމުގެ ސަބަބުން ދިމާވާ ކަމެކެވެ. ބަނޑުލުމުގެ ސަބަބުން އެތައް ބަޔަކު ދުވަހުން ދުވަހަށް ދަތި އުނދަގޫތަކާ ކުރިމަތިލާން ޖެހެއެވެ.
ބަނޑުލުމަށް މެދުވެރިވާ އެންމެ މައިގަނޑު ސަބަބުތަކުގެ ތެރޭގައި ކެއުމުގެ އާދަތަކާއި، ދިރިއުޅުމުގެ ވައްޓަފާޅި ހިމެނެއެވެ. އަވަސް އަވަހަށް ކެއުމާއި، ވައި ގިނަ ކާނާ ބޭނުންކުރުމާއި، ދަޅުގައި ބަންދުކޮށްފައި ހުންނަ ކާނާ ގިނައިން ބޭނުންކުރުމަކީ ބަނޑުލުމަށް މެދުވެރިވާ ސަބަބުތަކެވެ. މީގެ އިތުރުން ހަރަކާތްތެރިކަން ކުޑަވުމާއި، ނިދުމުގެ އާދަތައް ރަނގަޅު ނުވުމަކީވެސް މިކަމަށް މެދުވެރިވާ ސަބަބުތަކެވެ.
ބަނޑުލުމުގެ ސަބަބުން އެތައް ބަޔަކު ޖިސްމާނީ އަދި ނަފްސާނީ ގޮތުން ދަތިތަކާ ކުރިމަތިލާން ޖެހެއެވެ. ބަނޑުގައި ރިހުމާއި، ނުރަހަތު ކަމާއި، ހަޖަމު ނުވުމުގެ މައްސަލަތަކާއި، ނިދުމުގެ ދަތިތަކާ ކުރިމަތިލާން ޖެހެއެވެ.
ބަނޑުލުން ކޮންޓްރޯލް ކުރެވޭނެ ގޮތްތައް
ކާނާގެ އާދަތައް ބަދަލުކުރުމަކީ ބަނޑުލުން ކޮންޓްރޯލް ކުރުމަށް އެޅޭނެ އެންމެ މުހިންމު ފިޔަވަޅެވެ. ކެއުމުގެ ވަގުތު ތާވަލެއް ހެދުމާއި، ކާ އެއްޗެހި ރަނގަޅަށް ހަފައިގެން ކެއުމާއި، ފެން ގިނައިން ބުއިމަކީ މުހިންމު ކަންކަމެވެ. އަދި ވައި ގިނަ ކާނާއާއި ހަކުރު ހިމެނޭ ކާނާ މަދުކުރުމާއި، ފައިބަރ ގިނަ ކާނާ ބޭނުންކުރުން މުހިންމެވެ. ފޮނިކާއެއްޗެއް ބޭނުންވާނަމަ ޑާކް ޗޮކްލެޓާއި ފްރުޓް ކެއުން މާ ރަނގަޅުވާނެއެވެ.
ގަވާއިދުން ކަސްރަތުކުރުމާއި، ހަށިގަނޑަށް ބޭނުންވާ މިންވަރަށް ނިދުން މުހިންމެވެ. މީގެ އިތުރުން ނޭވާލާ ނިޒާމަށް ހާއްސަ މެޑިޓޭޝަން ކަސްރަތުތައް ކުރުމުންވެސް ބަނޑު ހިންދަން މަގުފަހި ވެއެވެ.
ބަނޑުލުމުގެ މައްސަލަ ހައްލުކުރުމަށް ބޭރުގެ ފިލްމީ ތަރިންނާއި އާންމުން ލިޕޯސަކްޝަންއޭ ކިޔާ ނުރައްކާތެރި ސާޖަރީއެއް ހަދައިގެން ބަނޑު ހިންދައެވެ. އެހެން ނަމަވެސް، ޤުދުރަތީ ގޮތުން ބަނޑުލުން ކޮންޓްރޯލް ކުރުމަށް ބޭނުންކުރެވިދާނެ އެތައް ހައްލުތަކެއް ވެއެވެ. ބަޓަފްލައި ޕީ ޓީއާއި ގްރީން ޓީއާއި އިނގުރު ފަދަ ބޭސްވެރިކަމުގައި ބޭނުންކުރާ ތަކެތި ބޭނުންކުރުމުން ހަޖަމްކުރުން އަވަސްވެ، ބަނޑު ސާފުކޮށްދޭނެއެވެ. ހަކުރުނާޅާ މިފަދަ ސައި ބުއިމުން ހަށިގަނޑުގައި ހުންނަ ވިހަތައް ސާފުކޮށް، ގިނައިން ކާނާ ކާހިތްވުމުގެ މައްސަލަ ހައްލުކޮށްދެއެވެ. ފޮނިތޮށްޓާއި ދިރި ސައި ބުއިމުން މެޓަބޮލިޒަމްގެ މަރުހަލާ އަވަސްވެ، ހަށިގަނޑުގައި ހަކުރު ހުންނަ މިންވަރު ދަށްކޮށްދެއެވެ.
މީގެ އިތުރުން، ޕްރޯބަޔޮޓިކްސްވެސް ބޭނުންކުރެވިދާނެއެވެ. ރޭގަނޑު ކެއުމުގެ ފަހުން ޕްރޯބަޔޮޓިކް ޔޯގަޓް ފަދަ ތަކެތި ބޭނުންކުރުމުން ބަނޑުގައި ރަނގަޅު ބެކްޓީރިއާ އުފައްދާ، އޭގެއިން ހަޖަަމްކުރުމުގެ ނިޒާމްގެ މަސައްކަތް ފުރިހަމަކޮށްދޭނެއެވެ. ކޮންމެ ކާނާއެއް ކެއުމުގެ ފަހުން ދަވިއްގަނދުކޮޅެއް ހެފުމުންވެސް ގޭސް ނުހެދޭނެއެވެ. ނަތީޖާއެއްގެ ގޮތުން ބަނޑުލުމުން ކޮންމެވެސް ވަރަކަށް ދުރުހެލިވެވޭނެ އެވެ.
ކެއުމުގެ ފަހުން 10-15 މިނެޓް ވަންދެން ހިނގާލުމުން ކާނާ ހަޖަމްކުރަން ފަސޭހަވެ، ހަށިގަނޑުގައި އުފެދޭ ކެލޮރީ ދަށްކޮށްދޭނެއެވެ. މީގެ އިތުރުންވެސް، ކައިގެން 2-3 ގަޑިއިރުވަންދެން ނުއޮށޯންނަން ސަމާލުކަން ދޭށެވެ. އެހެން ނޫނީ، ކާނާ ހަޖަމްވުން ލަސްވާނެއެވެ.
ބަނޑުލުމަކީ ފަސޭހައިން ހައްލުކުރެވިދާނެ މައްސަލައެކެވެ. ކާނާގެ އާދަތަކަށް ސަމާލުކަން ދިނުމާއި، ދިރިއުޅުމުގެ ވައްޓަފާޅި ބަދަލުކުރުމާއި، ޤުދުރަތީ ހައްލުތައް ބޭނުންކުރުމުން މިކަމުން ސަލާމަތްވެވިދާނެއެވެ. އަދި މިފަދަ މައްސަލަތައް ދިގު މުއްދަތަކަށް ދެމިގެން ދާނަމަ، ޞިއްޙީ ފަރުވާ ހޯދުމަކީ މުހިންމު ކަމެކެވެ.