ދިވެހި ތާރީހުގެ ތެރެއަށް ފީނާލުމުން އެނގި ހާމަވަނީ، އިހު ޒަމާނުގައި ދިވެހިންގެ ތެރެއަށް ފާވަމުން ދިޔަ ކޮންމެ ބަލިމަޑުކަމަކުން ފިޔެވުމަށް (ސަލާމަތްވުމަށް) ދިވެހިން ވަނީ އެތަކެއް ގުރުބާނީއެއް ވެފައެވެ. މިގޮތަށް ކޮންމެ ހާލެއްގައިވެސް ކަންކުރަންވީ ގޮތާއި ދިވެހިންގެ އަމަލުތައް ބަހައްޓަންވީ ގޮތުގެ ފަހު ބަސް އިއްވަނީ ރަސްގެފާނުގެ ގަނޑުވަރުންނެވެ. އެ އަންގަވާ އަމުރަކައިގެން ރައްޔިތުން ލައްވާ އެކަންތައް ކުރުވަނީ ފަނޑިޔާރު ބޭކަލަކު އިސްވެ ހުންނަވައިގެންނެވެ.

މި މޭރުމުން ވެރިރަށް މާލެ އާއި ރާއްޖެތެރޭ ރަށްތަކަށް ފަތްކޮޅު ފޮނުއްވާ، އަމުރުމައުރޫފުން ދިވެހި އެންމެހާ ރައްޔިތުން ހޭހަން ކުރައްވައެވެ. އެގޮތުން އެއްކައުވަންތަ ގަދަ ކީރިތިވަންތަ އިލާހުގެ ކިބަފުޅަށް އަޅުކަން އަދާކޮށް، ބަލާ މުސީބާތުން މިންޖުކޮއްދެށްވުމަށް، ދުޢާ ދެންނެވުމަށް ރަސްގެފާނުގެ ދޫފުޅުން އަމުރު ކުރައްވައެވެ. ތަކުބީރުގެ ވަރުގަދަ އަޑު، މުޅި ރަށުގައި ގުގުމާލުމަށާއި ތަކުބީރާއެކު ރަށުގެ ބޮޑެތި މަގުތަކުގައްޔާއި ހޭޅީގައި ހިނގުމަށްވެސް އަމުރުކުރެތެވެ. ދިވެހި ކޮންމެ އަފުރާދަކު ރަސްގެފާނުގެ ދޫފުޅުން އިއްވާ މި އަމުރުމައުރޫފަށް ހިތުގައި އެއްވެސް ނުރުހުމެއްނެތި ކިޔަމަންވެއެވެ.

މީގެ އިތުރުން ރަސްގެފާނުގެ ބައެއް އަމުރުތަކުގައި، ދިވެހި ރައްޔިތުން ތުރުކުރަން ގެންނުޅޭ އެންމެހާ އަންނައުނުތައް ދޮއެ ސާފު ކުރުމަށާއި ވަޅުތަކާއި ވެވުތަކާއި އަދި އެނޫންވެސް ފެންހުރިއްޔާ ހުރިތަނަކު، ހުރި ފެނެއްވިއްޔާ ހިއްކުމަށާއި ސާފުކުރުމަށްވެސް އަންގަތެވެ. ހަމައެއާއެކު ރަށްރަށުގެ ހޭޅި ތަކާއި ގޮނޑުތައް އަންދާ ހުޅު ޖެހުމަށާއި ބިންތައް ސާފުކުރުމަށް ރަސްގެފާނުގެ އަމުރުތަކުގައި ވެއެވެ. އަދި ކޮންމެ ރަށެއްގެ ކަތީބުމީހަކާއި އެދުރުބެއަކާއި މުދިންބެއެއް އިސްވެ ހުރެ ކަލޭފާނެއްގެ އިރުށާދަކާއި އެކީ ރައްޔިތުން ލައްވާ މިކަން ކަން އެ މޭރުމުން ކުރެތެވެ. ދެބަސްވެ ބޮޑާހާކާ އަހުލަކު އަދި އާލަކު އުޅެފައެއް ނުވެއެވެ.

އިސްވެ ދިޔަ އެ ޒަމާނުގައި ވެސް ދިވެހިންނާއި ބޮޑެތި ބަލާތައް ކުރިމެތިވެފައި ހުރީތާއެވެ. ނަމަވެސް އަދާ އިއްޔެގެ ތަފާތު ތަސްވީރު ކޮށް ތަމްސީލުކުރައްވާށެވެ.

ބަލިމަޑުކަމުގެ ވަގުތުގާ އެންމެން ގުޅިލާމެހި އެކަތިގަނޑަކަށްވެގެން ނޫޅުމާއި، ހާކިމާގެ ބަހުގައި ހިފާނޭ އަހުލުން މަދުކަމާއި، ބަލާ މުސީބާތުގެ ބަލާ އިހުސާސް ނުވުމާ މިހެން ގޮސް ކިތަންމެ ކަމެކެވެ. މިއީ އަހަރެމެން ކާބައިންގެ ތާހިރު ދިރިއުޅުން ހުރިގޮތް ނޫންކަން ސާފުކޮަށް ދޭހަވާން އެބައޮތެވެ. ވީއިރު އަދުގެ ދިވެހި އަހުލުން، މިފަދަ ކޮންމެ ބަލާވެރިކަމަކުން ފިޔެވުމަށް އަމުރުވެރީންގެ އަމުރުތަކަށް ބޯލަނބާ ކިޔަމަންވުން ހުއްޓެވެ. ދިވެހި ކާބަފައިން ދެއްކި ރިވެތި މާތް ނަމޫނާއިން އިބުރަތާއި ދަރުސް ލިބިގަންނަ އަހުލުން ތަކަކަށް އަހަރެމެން އެންމެން ވަމާތޯއެވެ. މިއީ ހަމަ އެބައިމީހުންގެ ދަރިފަސްކޮޅުން އައި އެބައިމީހުންގެ ޠާހިރު ދަރިންތާއެވެ.