ކަންފަތަށް ފެން އެޅުމަކީ ދިވެހިންގެ ތެރޭގައި ވަރަށް އާންމު ކަމެކެވެ. އެހެންކަމުން ކަންފަތަށް ފެން އެޅި ކަންފަތުގައި ރިހޭ ނަމަ، ގޭގައި ކުރެވިދާނެ ބައެއް ކަންކަން އަޅުގަނޑުމެން އެންމެނަށް އެނގިފާއޮތުން ކިތަންމެހާވެސް މުހިންމެވެ.

އެގޮތުން: 

.ކަންފަތަށް ފެން އެޅިއްޖެނަމަ ކަންފަތުގެ ފޫޅުގަ ހިފާލާ ތިރިއަށް ދަމާލާށެވެ. މިގޮތަށް ހަދާލުމުން ބައެއް ހާލަތްތަކުގައި ކަންފަތުގައި ހުރި ފެން ބޭރަށް އައުމަށް މަގުފަހިވެއެވެ.

.ފެންއެޅިފައިވާ ކަންފަތް ތިރިއަށް ޖެއްސުމަށްފަހު ބޮލަށް ކުދިކުދި ލަކިތަކެއް ޖައްސާލާށެވެ. އޭރަށް ކަންފަތުގައި ހުރި ފެންތަށް ފައިބައިގެން ހިނގައިދާނެއެވެ.

.ކަންފަތުގައި އަތްތިލަ އަލާ އޮބާލާށެވެ. މިގޮތައް އޮބާލެވޭ އިރު ކަންފަތުގެ އެތެރެއަށް ވައި ނުވަންނަ ގޮތަށް (ވެކިއުމްވާ ގޮތަށް) ހިފަހައްޓާލަންވާއެވެ. އެއަށްފަހު ކަންފަތުން އަތް ނައްޓާލާށެވެ. އޭރުން ކަންފަތުގައި ހަރުލާފައި ހުރި ފެންތަށް ބޭރަށް އައުމަށް އެހީވެދޭނެއެވެ. މި ނިޒާމު ތަރުތީބު ވާނީ ގުންބާއެއްގެ ނިޒާމާ ދާދިއެއްގޮތަށެވެ.

.ކަންފަތަށް ކުޑަ ޒައިތޫނި ތެޔޮފޮދެއް އެޅުމަކީވެސް ކަންފަތުގައި ހުންނަ ފެން ބޭރަށް ނުކުރުމަށް އެހީވެދޭ ކަމެކެވެ. މީގެ އިތުރުން ޒައިތޫނި ތެލަކީ ކަންފަތުގައި ޖަރާސީމު އަށަގަތުމުން ސަލާމަތްކޮއްދޭނެ އެއްޗެކެވެ. ކަންފަތުގައި ރިހޭނަމަ އެކަމުގެ އެއް ސަބަބު ކަމުގައި ޖަރާސީމު އަށަގަތުން ހިމެނޭނެއެވެ.

.އެކި ގޮތްގިތަށް ދަތްދޮޅި ހަރަކާރް ކުރުމަކީ ކަންފަތުގެ އެތެރޭގެ ގުނަވަންތަކަށް ކުދިކުދި ހަރަކާތްތަކެއް ގެނުވާނޭ ކަމެކެވެ. އެހެންކަމުން އެ ހަރަކާތްތަކުގެ ސަބަބުން ކަންފަތުގެ އެތެރޭގައި ހުރި ފެންތައް ބޭރަށް ނުކުތުމަށް އެހީވެދެއެވެ.

.ހިންދިރުވުމަކީވެސް ކަންފަތަށް އޭގެ އަސަރު ކުރުވާނޭ ކަމެކެވެ. އެހެނީ ހިންދިރުވާލުމުން ކަންފަތާއި ނޭފަތުގެ "ޖާގައިގެ" ތެރޭގައި ވައިގެ ޕުރެސަރު މަތިވެއެވެ. އޭގެ ސަބަބުން ކަންފަތާއި - ނޭފަތާއި އަދި އަނގަ އާއި ގުޅުވައިދޭ ހިމަ ހޮޅިން ކަންފަތަށް ކުޑަ ޕުރެސަރެއް ދޭނެއެވެ. އޭގެ ސަބަބުން ކަންފަތުން ފެން ސާފުވުމަށް އެހީވެދެއެވެ.

.ހިންދުރުވުމުން ކަންފަތަށް ކުރާ އަސަރު ބޮޑުކޮށްލުމުގެ ގޮތުން ކުރެވިދާނެ ކަމެއް އެބައޮތެވެ. އެއީ އަނގަ ލެއްޕުމާއި އެކު ނޭފަތުގައި ހިފެހެއްޓުމަށްފަހު، ނޭފަތުން ވައި ބޭރުކޮއްލަން މަސައްކަތް ކުރާށެވެ. އެގޮތަށް ކަންތަން ކުރުމުން ކަންފަތާއި - ނޭފަތާއި އަދި އަނގަ ގުޅުވައިދޭ ހިމަ ހޮޅިން ކަންފަތަށް ބާރު ޕުރެސަރެއް ދޭނެއެވެ. އޭގެ ސަބަބުން ކަންފަތުގައި ހަރުލާފައި ހުންނަ ފެން ބޭރުވުމަށް އެހީވެދެއެވެ. ނަމަވެސް މިކަން ކުރާއިރު މާ ގަދަ ބާރެއް ލެވޭނަމަ، އޭގެ ސަބަބުން ކަންފަތަށް އޭގެ ގެއްލުން ވެދާނެއެވެ. އެހެންކަމުން މިކަން ކުރުމުގައި ފަރުވާތެރިވުން ވަރަށްވެސް މުހިންމެވެ.

.ފެން އެޅިފައިވާ ކަންފަތް ހޫނުކުރުމަކީ ކަންފަތުން ފެން ހިކުމަށް އެހީވެދޭނެ ކަމެކެވެ. އެގޮތުން ކޮންމެވެސް ގޮތަކަށް ކަންފަތް ހޫނުކުރެވިދާނެއެވެ. މުހިންމު ކަމަކީ މިހެން ހޫނު ކުރާއިރު މާގަދައަށް ހޫނު ނުކުރުމާއި، ކަންފަތުގެ އެތެރެއަށް ހޫނު ފޯރާނޭހެން ހޫނު ކުރުމެވެ.

.ކަންފަތަށް އެޅިފައިވާ ފެން ބޭރުކުރުމަށް އިތުރަށް އެ ކަންފަތަށް ފެން އެޅިދާނެއެވެ. މިއީ ފަހަރުގައި ކޮއްލި ޖެއްސުމެއް ކަމަށް ހީވެދާނެއެވެ. ނަމަވެސް ކަންފަތުގެ އތެރޭގައި ތާށިވެފައިވާ ފެން، ބޭރުކުރުމަށް މިއީ ވެސް މޮޅު އުކުޅެކެވެ. ފެން އެޅިފައިވާ ކަންފަތް މައްޗަށް ބޭއްވުމަށްފަހު ކަންފަތުގެ ތެރެއަށް މަޑުމަޑުން ފެން އަޅާލާށެވެ. މިގޮތަށް އަޅަން ވާނީ ވަރަށް ސާފު ފެނެކެވެ. ފެން އަޅާނީ ކަންފަތް ފުރެންދެނެވެ. އެއަށްފަހު އެ ކަންފަތް ތިރިއަަށް ޖަހާށެވެ. އޭރުން ކަންފަތުގައި ހުރި ހުރިހާ ފެނެއްފައިބައިގެން ދާނެއެވެ. މިކަމުގެ ހިކުމަތަކީ ފެނާއި ކަންފަތުގެ އެތެރޭގެ ޕުރެސަރާއި ގުޅިފައިވާ ހިކުމަތެކެވެ. ނަމަވެސް މިއީ ކޮންމެފަހަރަކު ކާމިޔާބުވާނޭ ކަމެއްވެސް ނޫނެވެ.

.ހައިޑްރޮޖެން ޕެރޮކްސައިޑް ނަމަކަށް ކިޔާ މާއްދާއެއް އެކުލެވޭ ކަންފަތަށް އަޅާ ފެނެއް ބޭނުން ކުރެވިދާނެއެވެ. މިއީ ބޭސްފިހާރަތަކުން އާންމުކޮށް ލިބެން ހުންނަ ބޭހެކެވެ. ނަމަވެސް މިގޮތަށް ބޭހެއް ބޭނުން ކުރާނަމަ އެންމެ ރަނގަޅުގޮތަކީ ސިއްހީ އެހީތެރިއެއްގެ ލަފާ މިކަމުގައި ހޯދުމެވެ.

ކަންފަތަކީ އެ ގުނަވަނަކާއި މެދު އަހަރެމެން އެންމެންވެސް ވަރަށް ބޮޑު ސަމާލުކަމެއް ދޭންޖެހޭނޭ ގުނަވަނެކެވެ. އެހެނީ އެ ގުނަވަނާއި ގުޅިފައިވާ ހިއްސަކީ އެ ހިއްސަކާއި ނުލާ އުޅެން ދަތި ހިއްސެކެވެ.