ޖޭމަކީ މަދުން ނަމަވެސް ކެއުމަށް ބޭނުންކުރާ މޭވާ އެކެވެ. މިއީ ކުރީގައި ރާއްޖޭގައި ވަރަށް ތިޔާގިކޮށް ލިބެން ހުންނަ މޭވާއެކެވެ. ދުނިޔޭގެ ބައެއް ހިސާބުތަކުގައި ފަނި ގިރައިންނާއި، ސަރުބަތު ތައްޔާރުކޮށްގެން، އަދި ޖޭމް ހަދައިގެންނާއި އެހެނިހެން ފޮނި ކާތަކެތި ތައްޔާރުކޮށްގެން ވެސް ޖޭމު މޭވާ ބޭނުންކުރެއެވެ. ޖޭމަށް އިނގިރޭސި ބަހުން ކިޔަނީ Aratilis އެވެ.
ދިރާސާތަކުން ދައްކާގޮތުގައި ޖޭމަކީ އޭގައި ސިއްޚީ އެތައް ފައިދާތައް އެކުލެވޭ މޭވާއެކެވެ. އެގޮތުން ބަނޑުގައި އުފެދޭ ތަދު ނުވަތަ ރިހުން ލުއިކޮށް ކުޑަކޮށްދޭ އެއްޗެކެވެ. އެއީ ތަނދުކެނޑުވުމުގެ ބާރު ޖޭމުގައި އެކުލެވޭތީ އެވެ. އަދި ހަންގަނޑު އޮމާންކޮށްދިނުމަށްވެސް އެހީވެދެއެވެ. ޖޭމުގައި ބެކްޓީރިޔާ ފަދަ ޖަރާސީމުތަކާ ދެކޮޅަށް މަސައްކަތް ކުރުމުގެ ބާރުވެސް ހުރެއެވެ.
މީގެ އިތުރުން ޖޭމުގައި ހަށިގަނޑަށް ބޭނުންވާ ފްލޭވޮނޮއިޑް ފަދަ އެންޓިއޮކްސިޑެންޓްތައް ހުރެއެވެ. ފްލޭވޮނޮއިޑަކީ ކެންސަރާއި ދެކޮޅަށް މަސައްކަތްކުރުމުގެ ބާރު ލިބިފައިވާ އެންޓިއޮކްސިޑެންޓެކެވެ. އަދި ޖޭމުގައި ހަކުރުގެ ބާވަތެއް ކަމުގައިވާ ފުރަކްޓޯސް ހުރުމަކީ އެ ބޭނުންކުރުމުން ހަށިގަނޑުގައި ވަރުޖައްސައިދޭނެ ކަމެކެވެ.
ޖޭމުން ލިއްބައިދޭ އިތުރު ފައިދާތަކަށް ބަލައިލާއިރު، ޖޭމު މަލުގެ ދިޔައިން ބަނޑުގެ ރިހުން ލުއިކުރުމަށް އިހު ޒަމާނުގައި ބޭނުންކޮށްފައިވެ އެވެ.
ޖޭމު މަލުގެ ދިޔަ، ހަންގަނޑު އޮމާންކޮށް މަޑުކުރުމަށް ބޭނުންކޮށްފައި ވެއެވެ. ޖޭމު މާ، ޖަރާސީމް މަރައި ނައްތާލާ އެއްޗެއްގެ ގޮތުގައި ބޭނުންކޮށްފައި ވެއެވެ. އޭގެ އިތުރުން ބޮލުގައި ރިހުމާއި، އަރިދަފުސް ރޯގާގެ އުނދަގޫ ކުޑަކުރުމަށްވެސް ބޭނުންކޮށްފައި ވެއެވެ.
ހޯދުންތަކުން އެނގެން އޮތްގޮތުގައި އިންޑޮނޭޝިޔާގައި ޔޫރިކް އެސިޑް މަތިވުމުން ކުރިމަތިވާ ހުޅުގެ ބަލިތަކަށް ފަރުވާ ކުރުމަށް ޖޭމު ބޭނުންކޮށްފައި ވެއެވެ. އެހެންކަމުން ޖޭމަކީ ހަށިގަނޑުން ޔޫރިކް އެސިޑް ދަށްކޮށްދީފާނެ އެއްޗެއްކަމަށް ބެލެވެ އެވެ.