މަޝްރޫމްއަށް ދިވެހިން ކިޔާ އުޅެނީ ހަންޑިކުޑައެވެ. ހަންޑިކުޑައަކީ ޕާސްޓާއާއި ޕިއްޒާފަދަ ތަކެތި ހެދުމަށް ދިވެހިން އާންމުކޮށް ހައްދާ ބާވަތެކެވެ. ކީހު ކުނޑި، ރުކުކުނޑީގެ އިތުރުން ދަނޑުވެރިކަމުގައި އުކާލާ ތަކެތީގައި ވަރަށް ކާމިޔާބުކަމާއެކު ހެއްދިދާނެ އެއްޗެކެވެ. އެހެންނަމަވެސް ހަންޑިކުޑަ ހެއްދުމަށް އެންމެ ރަނގަޅީ ހަނޑުލުހުޔެވެ. ވިޔަފާރި އުޞޫލުން ހެއްދުމަށް ހަންޑިކުޑައިގެ ދެބާވަތެއް ގެންގުޅެއެވެ. އެއީ Oyster mushroom އާއި Milky mushroom އެވެ. މަޝްރޫމަކީ ކާއެއްޗެހީގެ ރަހަމީރުކޮށްދޭ އުމާމީ ފްލޭވަރ ހިމެނޭ ބާވަތެއް ކަމުން މިއީ ރާއްޖެއިން ބޭރުގައި ވަރަށް ގިނަ އެއްޗެއްސަށް އަޅާ އެއްޗެކެވެ. އެމީހުން މަޝްރޫމް ބޭނުންކޮށް އުޅެނީ އޭގައި ގިނަގުނަ ފައިދާތައް އެކުލެވިގެންވާތީއެވެ.
މީގައި އެކުލެވޭ ޕްރޮޓީންސްގެ ފެންވަރު، ޖަނަވާރުގެ އަޞްލުން އުފެދިފައިވާ ޕްރޮޓީންސްގެ ފެންވަރާ ގާތްގަނޑަކަށް އެއްވަރެވެ. އަދި ކާބޯހައިޑްރޭޓްސް، ފައިބަރ، ވިޓަމިންސްގެ އިތުރުން އިތުރު މަޢުދަންތައް މަޝްރޫމްގައި އެކުލެވިފައި ވެއެވެ. ޚާއްޞަކޮށް ދަނގަޑުގެ ބައެވެ. މިއީ ތަފާތު ބަލިތަކުން ކުރާ އަސަރު ކުޑަކުރުމަށްވެސް ރަނގަޅު ކާނާއެކެވެ. މަތިކޮށް ހުންނަ ލޭގެ ޕްރެޝަރާއި، ކޮލޮސްޓްރޯލް ދަށްކޮށްދިނުމާއި ގުރުދާގެ ބަލިތަކާއި، ހަކުރުބަލި ، ހިތުގެ ބަލިތަކާއި، ގޮހޮރުގެ ކެންސަރުގެ މައްސަލަތައް ކުޑަކޮށްދިނުމުގައި އެހީތެރިވާ މައުދަންތައް މީގައި ހިމެނޭ ކަމަށް ބައެއް ސިއްހީ މާހިރުން ލަފާކުރެއެވެ.
ހަންޑިކުޑައިގައި ވިޓަމިން ސީ އާއި، ޕޮޓޭސިއަމް، އަދި މެގްނީސިއަމް ފަދަ މުހިންމު މާއްދާތައް އެކުލެވިގެންވެއެވެ. މީގެ އިތުރުން، ހަންޑިކުޑައިގައި އެންޓި-އޮކްސިޑެންޓްސް އެކުލެވިގެންވާތީ، ހަށިގަނޑުގެ ދިފާއީ ނިޒާމު ވަރުގަދަ ކުރުމަށް އެހީތެރިވެދެއެވެ.
ހަންޑިކުޑައަކީ ހަޖަމުކުރަން ފަސޭހަ އަދި ހަށިގަނޑަށް އަވަހަށް ހަކަތަ ގެނުވައިދޭ ކާނާއެކެވެ. ޚާއްސަކޮށް ބަލިވެ އޮންނަ މީހުންނަށް އަދި ކުޑަކުދިންނަށް ވެސް ވަރަށް ރަނގަޅު ކާނާއެކެވެ. މީގެ އިތުރުން ހަންޑިކުޑައިން ހަށިގަނޑުގެ ބުންވަރު ހިފެހެއްޓުމަށް އެހީތެރިވެދެއެވެ.