ރެސިޕީ: ޖަޕަނީޒް ބީފް ކަރީ
ޖަޕާނު މީހުން ކުކުޅާއި ގެރިމަހު ރިހަ ކައްކަން ފެށީ އިންޑިޔާއިން ތައާރަފްކުރި މީރު ރިހަތަކުގެ ރަހަ ބެލުމަށްފަހުއެވެ. ރިހައަކީ އެއީ ޖަޕާނު މީހުންނަށް ވަރަށް އައު އެއްޗެކެވެ. ތަފާތު މޮޅު ބާވަތުގެ ކެއުން ދުނިޔެއަށް ތައާރަފްކުރި ޖަޕާނުން އިންޑިޔާގެ ރިހަތަކުގެ ރަހަ މުޅިން އެފުށްމިފުށަށް ޖަހާފައި ޖަޕާނުގެ ސަގާފަތާއި ގޮންޖަހާވަރުގެ ރިހަގަނޑުތައް ތައްޔާރުކުރަން ފެށިއެވެ. އޭގެ ތެރޭގައި ކަޓްސޫ ކަރީއާއި ޖަޕާނުގެ ބީފް ކަރޭތައް ހިމެނެއެވެ. ޖަޕާނު ރިހަތަކުގައި ކުޅިކަމާއި ހިތިކަން އަދި ފޮނިކަން ގެނެސްދޭ ހުރިހާ އިންގްރީޑިއެންޓްތައް ހިމެނެއެވެ. އޭގެ ތެރޭގައި ޑާކް ޗޮކްލެޓް ނުވަތަ މިލްކް ޗޮކްލެޓް، ކޮފީ، ރެޑް ބީން ޕޭސްޓް، ޗީޒް، އާފަލު، މާމުއި ހިމެނެއެވެ. އަދި ޖަޕާނު މީހުން އާންމުކޮށް ބޭނުންކުރާ ވޯސެސްޓާޝަޔާ ސޯސްއާއި ސޯޔާ ސޯސްވެސް ބައެއްފަހަރު އަޅައެވެ. އެކަމަކު އެއްވެސް ޑިޝްއަކަށް މި ހުރިހާ އެއްޗެހި އެއްފަހަރާއި ނާޅާކަން ފާހަގަކޮށްލަންޖެހެއެވެ.
ބޭނުންވާ ތަކެތި
2 އެލްބީ ގެރިމަސް (1 1/2 އިންޗީގެ ކިއުބް ސައިޒަށް ކޮށާފައި)
1 ސައިސަމްސާ ލޮނާއި މުގުރި އަސޭމިރުސް
2 މޭޒުމަތީ ސަމްސާ ހަވާދު ޕައުޑަރ
2 މޭޒުމަތީ ސަމްސާ ކުކިން އޮއިލް
3 ފިޔާ (ކޮށާފައި)
ބޮޑު 2 އަލުވި (ކިއުބްކޮށް ކޮށާފައި)
1 ކެރެޓް (ކިއުބްކޮށް ކޮށާފައި)
6-8 ޖޯޑު ފެން
1.5 ޖޯޑު ބޯކިރު
ފޮނިނުކުރާ ޑާކް ޗޮކްލެޓްގެ 2 ޕީސް
1/4 އާފަލު (ހިމުންކޮށް ގާނާފައި)
115 ގ ކަރީ ކިއުބްސް
ތައްޔާރުކުރާނެ ގޮތް
ކޮށާފައިވާ ގެރިމަސްކޮޅު ލޮނާއި އަސޭމިރުހާއި ހަވާދު ޕައުޑަރުން މެރިނޭޓްކުރާށެވެ. ތަވައަކަށް ތެޔޮ އަޅާފައި ފިޔާ މީރުކުރާށެވެ. އުނދުނުގެ ހުޅު މެދުގިނީގައި ބަހައްޓައިގެން 5-6 މިނެޓް ވަންދެން ފިޔާގެ ކުލަ ބަދަލުވަންދެން ރަތްކުރާށެވެ. ރަތްކުރި ފިޔާކޮޅު ތަވައިން ނަގާފައި ބޯތަށްޓަކަށް އަޅާށެވެ. ދެން ބޮޑު ތެއްޔެއްގައި ތެޔޮފޮދެއް ހޫނުކުރުމަށްފަހު ގެރިމަސްކޮޅު އޭގެ ތެރެއަށް އަޅާށެވެ. މަސްކޮޅުގެ ކުލަ މުށި ކުލައަށް ބަދަލުވަންދެން 3-4 މިނެޓް ވަންދެން މަޑު ގިނީގައި ކައްކާފައި އޭގެ ތެރެއަށް ރަތްކޮށްފައިވާ ފިޔާކޮޅު އިތުރުކޮށްލާށެވެ. މަސްކޮޅު ތެރެއަށް 6 ވަރަކަށް ޖޯޑު ފެން އަޅައިގެން 30 މިނެޓް ވަންދެން ކައްކާށެވެ. ދޭތެރެ ދޭތެރެއިން މަސްކޮޅު، ދޭފަތަކުން ހަލުވާށެވެ. ދެން އޭގެ ތެރެއަށް ކެރެޓާއި އަލުވި މަޑުކުރަން އަޅާށެވެ. ކެރެޓާއި އަލުވި މަޑުވުމުން ގާނާފައިވާ އާފަލާއި ޑާކް ޗޮކްލެޓާއި ކަރީ ކިއުބްތަކާއި ބޯކިރުފޮދު އަޅާފައި 10 މިނެޓް ވަންދެން ރިހަ ކައްކާށެވެ. މިހާހިސާބުން ބަތާއި މޮޑެގެން ކާން މި ރިހަ ހުންނާނީ އެންމެ ފުރިހަމައަށެވެ.