އިންސާނީ ދިރިއުޅުމަކީ ގުޅުންތަކާއި މުޢާމަލާތްތަކުން ފުރިގެންވާ ދިރިއުޅުމެކެވެ. މިގުޅުންތަކުގެ ތެރެއިން ބައެއް ގުޅުންތައް އުފެއްދުންތެރިވެ، އުފާވެރިކަން ގެނެސްދޭއިރު، އަނެއް ބައި ގުޅުންތައް ވެގެންދަނީ އެހެން މީހުންގެ ހިތްތަކުގައި ވޭން އުފައްދާ، ނަފްސާނީ ގޮތުންނާއި ޖިސްމާނީ ގޮތުންވެސް ގެއްލުންދޭ ކަންކަމަށެވެ. މިފަދަ އެއް ކަމަކީ ޖެއްސުންކުރުމެވެ. ބައެއް މީހުންނަށް ޖެއްސުންކުރުމަކީ އާދައަކަށް ވެފައި އޮންނަ ކަމެކެވެ. އެކަމަކު މި ކަމުގެ ސަބަބުން އެހެން މީހުންނަށް ކުރިމަތިލާން ޖެހޭ ދަތިތަކާއި ވޭންތަކަށް ސަމާލުކަންދީ ފަރުވާތެރިވުން މުހިންމެވެ.
ބައެއް ފަހަރު ޖެއްސުންކުރަނީ ހަމައެކަނި ސަމާސާ ކުރުމުގެ ނިޔަތުގައެވެ. މިފަދަ މީހުން ދެކޭ ގޮތުގައި އެމީހުން ކުރާ ކަންތައްތަކަކީ ހަމައެކަނި މޫނުމައްޗަށް ހިނިތުންވުން ގެނެސްދީ، މަޖާކުރުމަށް ކުރާ ކަންތައްތަކެކެވެ. އެކަމަކު މިފަދަ ޖެއްސުންތަކުގެ ސަބަބުންވެސް، ޖެއްސުންކުރެވޭ މީހާއަށް ނަފްސާނީ ގޮތުން ބުރަ ބޮޑުވެ، ހިތްހަމަނުޖެހުން އުފެދި، އަމިއްލަ ނަފްސަށް ކުރާ އިތުބާރު ކުޑަވެދާނެއެވެ. ސަމާސާގެ ގޮތުގައި ކުރެވޭ ޖެއްސުންތަކުގައި، ޖެއްސުންކުރާ މީހާގެ ހިތުގައި ނުބައި ގަސްތެއް ނެތަސް، އެކަމުގެ ސަބަބުން ލިބޭ އަނިޔާ އާއި ވޭނަކީ ހަޤީޤަތެކެވެ. ޖެއްސުން ކުރެވޭ ފަރާތް ބަލިކޮށްލާކަށް ނުވަތަ އެއްވެސް ގެއްލުމެއް ދޭކަށް ގަސްތުނުކުރި ނަމަވެސް، އެކަމުގެ ނޭދެވޭ އަސަރު ހަދާންތަކުގައި ދެމިހުންނަކަމީ ހަގީގަތެކެވެ.
އަނެއް ބަޔަކު ޖެއްސުންކުރަނީ ގަސްތުގައި، އެހެން މީހުންނަށް ގެއްލުންދީ އަނިޔާކުރުމުގެ ނިޔަތުގައެވެ. މިފަދަ ޖެއްސުންތަކަކީ ނަފްސާނީ އަނިޔާގެ އެންމެ ނުރައްކާތެރި އެއް ބާވަތެވެ. މީގެ ތެރޭގައި އެހެން މީހުންގެ ސިފައަށް ފުރައްސާރަކުރުމާއި، އެމީހުންގެ އިޙްސާސާތްތަކާ ކުޅެލައި، އަމިއްލަ ނަފްސަށް ކުރާ އިތުބާރު ހީނަރުކުރުވުން ހިމެނެއެވެ. މިފަދަ މީހުން ޖެއްސުންކުރަނީ އަމިއްލަ ނަފްސަށް ހިތްހަމަޖެހުމެއް ހޯދުމުގެ ގޮތުންނެވެ. ނުވަތަ އެހެން މީހުންނަށްވުރެ މަތިވެރިކަމުގެ އިޙްސާސެއް ކުރުމުގެ ބޭނުމުގައެވެ. މިކަމުގެ ސަބަބުން ޖެއްސުން ކުރެވޭ މީހާގެ ދިރިއުޅުމަށް ކުރާ އަސަރު ބޮޑުވެ، އެކަމުގެ ސަބަބުން ނަފްސާނީ ބަލިތަކަށް މަގުފަހިވެ، އުފާވެރިކަން ގެއްލިދެއެވެ. ބައެއް ފަހަރު މިކަމުގެ ސަބަބުން މީހުން އެކަހެރިވެ، މުޖުތަމަޢުން ބާކީވެ، ބޮޑެތި މައްސަލަތަކާ ކުރިމަތިލާން ޖެހެއެވެ.
މީގެ އިތުރުން، ބައެއް ފަހަރު ޖެއްސުންކުރެވެނީ ގަސްތަކާއި ނުލައެވެ. ނަމަވެސް، ކުރާ އެހެން ކަންކަމުގެ ސަބަބުން ނުސީދާ ގޮތެއްގައި ޖެއްސުންކުރުމަށް މަގުފަހިވެއެވެ. މިސާލަކަށް، އެއްވެސް މީހެއްގެ ނަމުން ނުވަތަ ސިފައަކުން ތިމާގެ ނިޔަތުގައި ނެތް ނަމަވެސް، އެނޫން ކަމަކާ ގުޅުވައިގެން ސަމާސާ ކުރުމުގެ ތެރެއިން ނުސީދާ ގޮތެއްގައި ޖެއްސުންކުރުމަށް މަގުފަހިވެއެވެ. ނުވަތަ އެއްވެސް މީހަކާ ބެހޭ ގޮތުން ދައްކާ ވާހަކަތައް، އެމީހާއަށް ނޭނގި ނަމަވެސް، އެހެން މީހުންގެ ސަމާސާ އާއި ޖެއްސުމުގެ އަމާޒަކަށް ވެގެންދެއެވެ. މިފަދަ ކަންކަމުގެ ސަބަބުންވެސް ޖެއްސުން ކުރެވޭ މީހާއަށް ބުރަބޮޑުވެ، ހިތްދަތިކަން ލިބެއެވެ. މިކަހަލަ ޖެއްސުންތަކަކީ ގަސްތުގައި ކުރާ ޖެއްސުންތަކެއް ކަމުގައި ނުވި ނަމަވެސް، އެކަމުގެ ނޭދެވޭ އަސަރު ޖެއްސުންކުރެވޭ ފަރާތަށް ވަރަށް ބޮޑަށް ކުރެއެވެ.
މި އެންމެންނަށްވެސް، ކޮންމެވެސް ސިފައެއްގައި އެމީހުން ޖެއްސުން ކުރާކަން އެނގެއެވެ. ސަމާސާއަށް ނުވަތަ ގަސްތުގައި ނުވަތަ ނުސީދާ ގޮތެއްގައި ޖެއްސުން ކުރެވޭކަންވެސް އެނގެއެވެ. އެހެން ނަމަވެސް، އެކަމަށް މަޑުޖެހުމެއް، ހުއްޓުމެއް ނެތި ޖެއްސުންކުރުން ކުރިއަށްގެންދެއެވެ. މިކަމުގެ އަސްލަކީ، ޖެއްސުން ކުރާ މީހުންނަށް ޖެއްސުން ކުރެވޭ ފަރާތުގެ އިޙްސާސާތްތައް ނުވިސްނި، ނުވަތަ އެކަމާ މެދު ފަރުވާކުޑަކުރުމެވެ. ބައެއް ފަހަރު ޖެއްސުންކުރާ މީހުންނަށް ޖެއްސުންކުރުމުގެ ސަބަބުން އެހެން މީހުންނަށް ލިބޭ ގެއްލުންތަކުގެ ހަޤީޤީ ބޮޑުކަން އިޙްސާސް ނުކުރެވެއެވެ. ނުވަތަ، އެނގިހުރެވެސް އެކަމާ މެދު ފަރުވާކުޑަކޮށްލައެވެ.
ކުރުގޮތަކަށް ދަންނަވާނަމަ، ޖެއްސުންކުރުމަކީ ކޮންމެ ސިފައެއްގައި ނަމަވެސް، އެހެން މީހުންނަށް ގެއްލުންދޭ، އޭގެ ސަބަބުން މުޖުތަމަޢުގައި ހަމަނުޖެހުން އުފައްދައި، ގުޅުންތައް ގޯސްކުރާ ކަމެކެވެ. މިކަމުގެ ނޭދެވޭ އަސަރުތަކުން ސަލާމަތްވެ، އަނެކުންނަށް އިޙްތިރާމްކޮށް، އެހެން މީހުންގެ އިޙްސާސްތަކަށް އިސްކަންދޭ ބަޔަކަށް ވުމަކީ ކޮންމެ މީހެއްގެ ވެސް ޒިންމާއެކެވެ. ޖެއްސުންކުރުމަކީ އުފަލެއް ނޫން ކަމުގައި ދެކި، އެކަން ހުއްޓުވައި، ދިރިއުޅުމުގައި އޯގާތެރިކަމާއި އެކުވެރިކަން ކުރިއެރުވުމަށް މަސައްކަތްކުރަމާތޯއެވެ! ނަމަވެސް ބައެއްމީހުންގެ އަމަލުތައް ހުންނަގޮތުން، އެބައިމީހުން ކުރާހިތުން ކުރާ ކަމެއް ކަމުގައި ޖެއްސުންކުރުން، ހީވާ ކަހަލައެވެ!