ގައުމީ އެއާލައިން މޯލްޑިވިއަންއިން ޗައިނާގެ ޝެންޒެން ސިޓީއަށް ކުރާ ފުރަތަމަ ދަތުރު މިރޭ ބާއްވަން އުޅޭ ކަމަށް އެކުންފުނިން އިއުލާންކޮށްފިއެވެ.
މިރޭގެ ފްލައިޓަކީ މާލެއިން ޝެންޒެންއަށް ދަތުރު ކުރާ ފްލައިޓެއް ކަމަށާއި ޝެންޒެން އިން މާލެއަށް ފްލައިޓް އެނބުރި އައުމަށް ހަމަޖެހިފައި ވަނީ ބުދަ ދުވަހު ކަމަށް މޯލްޑިވިއަނުން ބުނެފައި ވެއެވެ.
އޮގަސްޓް މަހުގެ 21 ވަނަ ދުވަހުގެ ނިޔަލަށް ތާވަލުކޮށްފައިވާ ސީޒަނަލް ފްލައިޓްތަކުގެ ތެރޭގައި ކޮންމެ ހަފްތާއަކު އެއްފަހަރު ދަތުރުތައް ކުރިއަށް ގެންދާއިރު މި ފްލައިޓް ތައާރަފްކޮށްފައިވަނީ މާލެއިން ޑިމާންޑް ބޮޑުވުމުގެ ސަބަބުންކަން މޯލްޑިވިއަން އިން ފާހަގަކުރިއެވެ.
މި ދަތުރުތަކަށް މޯލްޑިވިއަން އިން ބޭނުންކުރާނީ އޭ320 މަރުކާގެ ބޯޓެކެވެ.
ޗައިނާގެ އެހެން މަންޒިލްތައް ކަމަށްވާ ޗެންގްޑޫ، ބެއިޖިން އަދި ޝަންހާއީއަށްވެސް މޯލްޑިވިއަން އިން ދަނީ ދަތުރުތައް ކުރަމުންނެވެ. މި ތިން ސިޓީއަށް ދަތުރުތައް ކުރަނީ މޯލްޑިވިއަންގެ ފުރަތަމަ ވައިޑް ބޮޑީ އެއާކްރާފްޓް އޭ330 އިންނެވެ.
މޯލްޑިވިއަންގެ ފްލީޓުގައި މިހާރު 25 ބޯޓު އެބަހުއްޓެވެ. އެ އެއާލައިނުން މިހާރު ދަތުރުކުރަނީ 29 މަންޒިލަކަށެވެ.