ނާރިނގު(ސައިންޓިފިކް ނަން: Citrus sinensis)ނުވަތަ (އިނގިރޭސި ބަހުން: Orange)އަކީ ހުތް މޭވާ އެކެވެ. ދިވެހި ބަހުން އޮރެންޖް، އަދި ފޮނި ލުނބޯ ވެސް ކިޔަނީ ހަމަ ނާރިނގުއަށް ނިސްބަތް ކޮށެވެ. ނާރިނގު ފުރަތަމަ ފެނިފައިވަނީ ދެކުނު އޭޝިޔާގެ ގައުމުތަކުންނެވެ. ދުނިޔޭގައި މިހާރު އެންމެ ގިނައިން ނާރިނގު ހައްދަނީ ބްރެޒިލްގައެވެ. އެގޮތުން ދުނިޔޭގެ ބާޒާރަށް ނެރޭ އޮރެންޖުގެ 29 އިންސައްތަ ނެރެނީ ބުރެޒިލް އިންނެވެ. އަދި 17 އިންސައްތަ އުފައްދަނީ ޗައިނާގައެވެ. އެހެނަސް، މިއީ ރާއްޖޭގެ ބާޒާރުން ދުވަހަކުވެސް ހުސްނުވާ މޭވާއެކެވެ. އޮރެންޖަކީ ރާއްޖޭގައިވެސް ހެއްދިދާނެ މޭވާއެކެވެ. މިހާރުވެސް ރާއްޖޭގެ ބައެއް ރަށްރަށުގައި އޮރެންޖު ގަސް ހައްދާފައި ހުރެއެވެ. ނަމަވެސް ދަނޑުވެރިކަމުގައި އޮރެންޖު ގަސް ހައްދާތަނެއް އަދި ނުފެނެއެވެ.
އޮރެންޖަކީ ގިނައަދަދަކަށް ވިޓަމިން ސީ އެކުލެވިގެންވާ ހަށިގަނޑަށް ފައިދާ ހުރި މޭވާއެކެވެ. އޮރެންޖްގައި ހިމެނޭ މި މުހިންމު މާއްދާގެ ސަބަބުން އޭގައި އެކުލެވޭ ފައިދާތައް ގިނަގުނައެވެ.
ދިފާއީ ނިޒާމް ވަރުގަދަކުރުން
އޮރެންޖްގައި އެކުލެވޭ ވިޓަމިން ސީގެ ސަބަބުން ހަށިގަނޑުގެ ދިފާއީ ނިޒާމު ވަރުގަދަވެއެވެ. އާންމުގޮތެއްގައި ހުންއައިސް ގަދައަށް ރޯގާޖެހުމުންވެސް އޮރެންޖް ދިޔަ ހޫނުކޮށްފައި ބުއިމުން ކަރުތެރޭގެ ދަވަތައް ސާފުކޮށްދިނުމަށްވެސް ކޮންމެވެސް ވަރަކަށް އެހީތެރިވެ އެވެ.
ހަންގަނޑު ރީތިކުރުން
އޮރެންޖްގައި އެކުލެވޭ އެންޓި އޮކްސިޑެންޓްސްގެ ސަބަބުން ހަމުގެ ދުޅަހެޔޮކަން އިތުރުވެއެވެ. ވިޓަމިން ސީއަކީ ވަރަށް ގިނަ ރީތިވާ އެއްޗެއްސަށް އަޅާ އެއްޗެއްކަމުން މިއީ ހަންގަނޑަށް ކިހާ ފައިދާހުރިކަން އެއްޗެެއްކަން މުޖައްރިބެވެ.
ހަޖަމުކުރުމަށް އެހީތެރިވުން
އޮރެންޖްގައި އެކުލެވޭ ފައިބަރގެ ސަބަބުން ހަޖަމުކުރުމުގެ ނިޒާމު ރަނގަޅުވެ އެވެ. މީގެ އިތުރުން ބަނޑުހިއްކުމުގެ މައްސަލަ ހައްލުކުރުމަށްވެސް އެހީތެރިވެދެއެވެ. ފައިދާހުރި ކެއުމާއިއެކު އާދަވެގެން އޮރެންޖް ބޭނުންކުރާ މީހުންގެ މެޓަބޮލިޒަމް ދައުރު ވަރަށް ފުޅާވާ ކަމަށް ބައެއް ނިއުޓްރިޝަނިސްޓުން ގަބޫލުކުރެއެވެ.
ލޭގެ ޕްރެޝަރ ބެލެހެއްޓުން
އޮރެންޖްގައި އެކުލެވޭ ޕޮޓޭސިއަމްގެ ސަބަބުން ލޭގެ ޕްރެޝަރ ބެލެހެއްޓުމަށް އެހީތެރިވެދެއެވެ. ލޭގެ ޕްރެޝަރަކީ ދުޅަހެޔޮ ހިތެއް ދެމެހެއްޓުމަށް ވަރަށް މުހިންމު އެއްޗެކެވެ.
ޒަމާނުއްސުރެ އޮރެންޖު އަހަރެމެން ތެރޭގައި ބޭނުންކުރަނީ ޖޫސްގެ ގޮތުގައެވެ. އެހެންނަމަވެސް މިހާރަކަށް އައިސް އޮރެންޖު އެކި ގޮތްގޮތަށް ބޭނުންކުރެއެވެ. މިގޮތުން އޮރެންޖު ތޮށި، ފޮނިކާތަަކެތި ތައްޔާރުކުރުމުގަޔާއި، ސައި ތައްޔާރުކުރުމުގައި ބޭނުންކުރެއެވެ. އަދި އޮރެންޖު ތޮށި ފެނު ކައްކައިގެން ނުވަތަ ބައެއް ބާވަތުގެ ހިއުމިޑިފަޔާ ތެރެއަށް އަޅައިގެން ގޭތެރޭގައި މީރުވަސް ހިފެހެއްޓުމަށްވެސް ބޭނުންކޮށް އުޅެއެވެ.