ވަޒީފާގެ މާހައުލުގައި އިވޭ އެންމެ ބޮޑު ޝަކުވާއަކީ މުވައްޒަފުން ހަރުނުލާ ވާހަކައެވެ. ކިތަންމެ ރަނގަޅު ޕްރޮސެސްއެއްގެ ތެރެއިން ރަނގަޅު މުވައްޒަފުން ނެގިޔަސް، ގިނަ ދުވަސްތަކެއްނުވެ، ވަކިވެގެންދާ ވާހަކައެވެ. ގިނަ ދުވަސްވީ މުވައްޒަފުން ހަމަ ކުއްލިއަކަށް އެ އޮފީސް ދޫކޮށްލާފައި އެހެން ދިމާއަކަށް މިސްރާބު ޖަހާތީ އެކަމުގެ ޝަކުވާއެވެ. އަލަށް ނަގާ މުވައްޒަފުން ޓްރެއިނިން ތެރެއިން ނުވަތަ ޓްރެއިނިން ނިންމާތަނުން ވަޒީފާއިން ކެނޑޭކަމުގެ ޝަކުވާއެވެ. މިކަން މިހެންވުމުގައި ސަބަބުތަކެއް އެބަހުއްޓެވެ.
އަޅުގަނޑުގެ އެކުވެރިއެކެވެ. ތަޢުލީމީ ދާއިރާގައި ފަނަރަ އަހަރަށްވުރެ ގިނަ ދުވަހު ޚިދުމަތްކުރި މުދައްރިސެކެވެ. ކުއްލިއަކަށް ފެނުނީ ކޮންސްޓްރަކްޝަން ދާއިރާއިންނެވެ. ވީ ކިހިނެއްތޯ ސުވާލުކޮށްލުމުން ބަންޑުންކޮށްލީ ޝަކުވާތަކެވެ. މައިގަނޑު ޝަކުވާއަކީ، އަގުވަޒަން ނުކުރުމެވެ. މިވީ ފަނަރަ އަހަރު ދުވަހު ތަޢުލީމީ ދާއިރާއަށް ކޮށްދިން އެއްވެސްކަމެއްގެ އަގުވަޒަން ނުކުރާތަނުގައި ރީތި ނަމެއްވެސް ސުކޫލުގެ މެނޭޖްމަންޓުންނާއި ބެލެނިވެރިންގެ ފަރާތުން ނުލިބޭތީކަމުގައެވެ. ނަތީޖާ ކިތަންމެ ރަނގަޅުވިޔަސް، ކުރާ މަސައްކަތް ބަލައި ނުގަންނާތީ ވަކިވީކަމުގައެވެ.
އަހަރުމެންނަށް އެއީ އެންމެ މުދައްރިސެކެވެ. އެގޮތަށް ކިތަންމެ މަސައްކަތްތެރީންނެއް އެމީހުން ޚާއްޞަވީ ދާއިރާ ދޫކޮށްލަމުން އެބަދެއެވެ. މިން ނުކުރެވުނަސް، އެ ގެއްލިގެންދާ ކޮންމެ މީހަކާއެކީ އެދަނީ އެ ދާއިރާގެ ހާދަހާ ބައިވަރު ޚިދުމަތެކެވެ. ތަޖުރިބާއެކެވެ. ފަންނީ ޚިޔާލުތަކެކެވެ. އެ ކަންކަމަކީ އެއް ދުވަހުން ދެދުވަހުން ގެނެވޭނޭ ކަންކަމެއްނޫނެވެ. މި ދެންނެވި މަސައްކަތްތެރީން މަސައްކަތަށް ނުކުމެފައިވާނީ އެންމެ ހާލުގައި އެ ދާއިރާތައް އޮއްވައެވެ. އެ ދާއިރާތައް ކޮޅަށްޖެހީ އެ އަތްތަކުންނެވެ. ކުރިޔަށް ވިސްނާފައި އެޅި ފިޔަވަޅުތަކާއި އުފުލި ބުރަ އުފުލާފައިވަނީ އެފަރާތްތަކެވެ. އެހެންވީމާ، އަގުވަޒަން ނުކުރުމުގެ ސަބަބުން ވަކިވާ މުވައްޒަފުގެ ވަކިވުމަކީ މުޅި ޤައުމަށް އެކަމުގެ ސަބަބުން އަސަރު ކުރާނޭ ކަމެކެވެ.
ރަނގަޅު މުވައްޒަފުން ވަކިވުމުގައި ދެންހުރި އެހެންކަންކަމުގެ ތެރޭގައި، ވަޒީފާ އަދާކުރެވޭނޭ މާހައުލެއް ނެތުމާއި، ތަނުގެ އިސްވެރީންގެ ދޯހަޅި ސިޔާސަތުގެ ސަބަބުންނާއި، ތަނުގައި ނަޒާހާތްތެރިކަން ނެތުމާއި، ކުރިޔަށް ދެވޭނޭ މަގު ފަހިވެފައި ނެތުމާއި، ތަޢުލީމާއި ތަޖުރިބާގެ ފުރުޞަތުތައް ނެތުމާއި، އެދެވޭ މުސާރައެއް ނުލިބުމާއި ދާއިރާގެ އޮނިގަނޑަށް ގެނެވޭ ބަދަލުގެ ސަބަބުން މަސައްކަތްކުރުމުގެ ރޫޚު ނެތިގެން ދިޔުން ހިމެނެއެވެ.