ސަރުކާރުން ރައްޔިތުންނަށްޓަކައި ކޮށްދޭ ކަންކަމަކީ، އެއްވެސް ޝައްކެއްނެތް ގޮތުގައި، ގައުމުގެ ތަރައްގީއާއި ރައްޔިތުންގެ ހާލަތު ރަނގަޅުކުރުމަށްޓަކައި ކުރެވޭ މުހިންމު މަސައްކަތްތަކެކެވެ. ނަމަވެސް، މިފަދަ ކަންކަން ކުރެވޭ ފައިސާގެ މަސްދަރާމެދު ގިނަ ބަޔަކު ސަމާލުކަމެއް ނުދެއެވެ. ބައެއް ފަހަރު މިފަދަ މަސައްކަތްތަކުގެ ކްރެޑިޓު ވަކި ފަރުދަކަށް ނުވަތަ ވަކި ޕާޓީއަކަށް ނިސްބަތްކުރާ ކުރުމަކީ އާދަވެފައިވާ ކަމެކެވެ. އެހެންކަމުން، މި ލިޔުމުގައި އަލިވާލާނީ، ސަރުކާރުން ކުރާ މި މަސައްކަތްތަކުގެ ފަހަތުގައިވާ ހަގީގަތް، އެބަހީ، އެ ފައިސާގެ މަސްދަރާއި އެކަންކަމުގެ ހަގީގީ ކްރެޑިޓް ލިބެންޖެހޭ ފަރާތާ ބެހޭގޮތުންނެވެ.
ސަރުކާރުން ރައްޔިތުންނަށްޓަކައި ކޮށްދޭ ހަމަ ކޮންމެ ކަމަކީ ސީދާ ރައްޔިތުންނާއި ގުޅުންހުރި ކަންކަން ކަމުގައި ދެކެމެވެ. މި ހުރިހާ މަސައްކަތްތަކެއް ހިންގުމަށް ބޭނުންވާ ފައިސާއަކީ ހަމަ ރައްޔިތުންގެ ފައިސާއެވެ. ދައުލަތަށް އާމްދަނީ ލިބޭ އެތައް ގޮތެއް އެބަ އޮތެވެ. އޭގެ ތެރޭގައި އެންމެ ބޮޑު ބައެއް ހިއްސާކުރަނީ ޓެކްސްގެ ގޮތުގައި ރައްޔިތުން ދައްކާ ފައިސާއެވެ؛ އެއީ ޖީ.އެސް.ޓީ، ޓީ.ޖީ.އެސް.ޓީ، ގްރީން ޓެކްސް، އަދި އެހެނިހެން ޓެކްސްތަކެވެ. މީގެ އިތުރުން، އެކިއެކި ހިދުމަތްތަކުންނާއި، ހުއްދަތަކުންނާއި، ލައިސަންސްތަކުން ދައްކާ ފީތަކާއި، ގާނޫނާ ހިލާފުވާ ފަރާތްތަކުން ދައްކަންޖެހޭ ޖޫރިމަނާތަކާއި، ދައުލަތުގެ ކުންފުނިތަކުން ލިބޭ ފައިދާއާއި، ބިން ކުއްޔަށް ދިނުމުން ލިބޭ އާމްދަނީ ފަދަ ތަފާތު ގޮތްގޮތުން ދައުލަތަށް ފައިސާ ލިބެއެވެ. މި ހުރިހާ ފައިސާއަކީވެސް ސީދާކޮށް ނުވަތަ ނުސީދާކޮށް ރައްޔިތުންގެ އަތުން ދައުލަތަށް ލިބޭ ފައިސާއެވެ. ދައުލަތަކީ ރައްޔިތުންގެ މަސްލަހަތު ހިމާޔަތްކުރުމަށްޓަކައި ގާއިމުކުރެވިފައިވާ ނިޒާމެކެވެ. އެހެންކަމުން، މި ފައިސާ ބޭނުންކޮށްގެން ކުރާ ކޮންމެ ކަމެއްގެ ކްރެޑިޓްވެސް ލިބެންޖެހޭނީ ހަމަ ރައްޔިތުންނަށެވެ.
ދައުލަތުން ތަރައްގީގެ ބޮޑެތި މަޝްރޫއުތައް ހިންގުމަށްޓަކައި ބޭރުގެ ފަރާތްތަކުން ނުވަތަ ބައިނަލްއަގްވާމީ މާލީ އިދާރާތަކުން ލޯނު ނަގައެވެ. މި ލޯނުތައް ނަގަނީ ވެރިކަމުގައި ހުންނަ ފަރާތެއްގެ ނުވަތަ ވެރިކަން ކުރާ ޕާޓީއެއްގެ ނަންމަތީގައެއް ނޫނެވެ. އެ ލޯނުތައް ނެގެނީ ދައުލަތުގެ ނަންމަތީގައެވެ. ދައުލަތުގެ ނަންމަތީގައި ނެގޭ ލޯނުތަކުގެ ދަރަންޏަކީ ވެރިކަން ބަދަލުވިޔަސް ދެމިހުންނަ ދަރަންޏެކެވެ. އެ ދަރަނި އަދާކުރުމުގެ ބުރަ އުފުލަންޖެހެނީވެސް ރައްޔިތުންނަށެވެ؛ ޓެކްސްގެ ގޮތުގައި ނުވަތަ އެހެނިހެން ގޮތްގޮތުން ދައުލަތަށް ލިބޭ އާމްދަނީންނެވެ. މިއީ ވެރިކަން ކުރާ ފަރާތުން ނުވަތަ ވެރިކަން ކުރާ ޕާޓީއިން އެކަނި ޒިންމާވާންޖެހޭ އެއްޗެއް ނޫނެވެ. އެހެންކަމުން، މިފަދަ ލޯނުތައް ނަގައިގެން ކުރާ ކަންކަމުގެ ކްރެޑިޓު ވެރިކަންކުރާ ފަރާތަކަށް ނުވަތަ ޕާޓީއަކަށް ދިނުމަކީ ރައްޔިތުންގެ ހައްގެއް ނިގުޅައިގަތުމާ އެއްވަރު ކަމެކެވެ. މިފަދަ ތަރައްގީގެ މަޝްރޫއުތަކުގެ ފައިދާ ލިބެނީ ރައްޔިތުންނަށެވެ. އަދި އެކަމުގެ ބުރަވެސް އުފުލަނީ ހަމަ ރައްޔިތުންނެވެ. ވުމާއެކު، ކްރެޑިޓު ލިބެންޖެހޭ ފަރާތަކީ ހަމަ ރައްޔިތުންނެވެ.
ކުރުގޮތަކަށް ދަންނަވާނަމަ، ސަރުކާރުން ރައްޔިތުންނަށްޓަކައި ކުރާ ކޮންމެ ކަމަކީ، އެއްވެސް ޝައްކެއްނެތް ގޮތުގައި، ރައްޔިތުންގެ ފައިސާއިން ރައްޔިތުންނަށްޓަކައި ކުރެވޭ ކަންކަމެވެ. ޓެކްސްގެ ގޮތުގައި ދައްކާ ފައިސާއާއި، ފީތަކާއި، ޖޫރިމަނާތަކާއި، ދައުލަތުގެ ނަންމަތީގައި ނަގާ ލޯނުތަކުގެ ބުރައާއި، އެނޫންވެސް އެތައް ގޮތަކުން ރައްޔިތުން ދައުލަތުގެ އާމްދަނީއަށް ހިއްސާކުރެއެވެ. މި ހިއްސާތަކުގެ ސަބަބުންނާއި، ދަރަނިތަކުގެ ބުރަ އުފުލުމުގެ ސަބަބުން ލިބޭ ތަރައްގީގެ ކްރެޑިޓަކީ އެއްވެސް މީހަކަށް ނުވަތަ ސިޔާސީ ފަރާތަކަށް ނިސްބަތްކުރެވިގެންވާނެ އެއްޗެއް ނޫނެވެ. ކްރެޑިޓް ލިބެންޖެހޭ ހަގީގީ ފަރާތަކީ، މި ހުރިހާ ބުރައެއް އުފުލައި، ގައުމުގެ ތަރައްގީއަށް ސީދާކޮށް ނުވަތަ ނުސީދާކޮށް މަސައްކަތްކުރާ ހަމަ އެ ރައްޔިތުންނެވެ.