ތަލަވުމަކީ، ގިނަ ފިރިހެނުންގެ ކަންބޮޑުވުމެކެވެ. ތަލަވެދާނެތީ އެކަމާ ބިރުން އެކި ފާޑުފާޑުގެ އުފެއްދުންތައް ބޭނުންކުރާ މީހުންވެސް މަދެއްނޫނެވެ. އުމުރުގެ ހަގުކަމާއެކީ މި މައްސަލަ ދިމާވެދާނެތީ އުޅޭ ޒުވާނުން މިކަމާ ކަންބޮޑުވާލެއް އަދި މާބޮޑެވެ. ބޮލުން އިސްތަށިފައިބާ ޒުވާންކަމުގެ އުމުރުގައި ބޯ އެއްކޮށް ތަލަވެދާނެތީ ޑަކްޓަރުންގެ އެހީ ހޯދާ މީހުންވެސް މަދެއް ނޫނެވެ.

މިފަހަރު މިއުޅެނީ ތަލަވުމުން ސަލާމަތްވާނެ ގޮތެއް ކިޔައިދޭކަށެއްނޫނެވެ. ތަލަވުމުން އެކަމުގެ ފައިދާ ހޯދާ މީހެއްގެ ވާހަކަ ކިޔައިދޭށެވެ. މިއީ އުމުރުން 36 އަހަރުގެ ޝަފީކް ހާޝިމްގެ ވާހަކައެވެ. އިންޑިޔާގެ ކެރެލާ ސްޓޭޓްގެ އަވަށެއްކަމަށްވާ ކަރޫރަށް ނިސްބަތްވާ މި ޒުވާނާއަކީ ތަލަވުމުގެ ފައިދާ ނަގަމުން އަންނަ މީހެކެވެ. އޭނާއަކީ ޔޫޓިއުބްގައި ޓްރެވެލަރ ވްލޮގަރއެކެވެ. އެކިއެކި ތަންތަނަށް ޒިޔާރަތްކޮށް ވީޑިއޯ ހަދައި އެކަމުގައި އުޅޭ ޒުވާނެކެވެ. އޭނާގެ ޔޫޓިއުބް ޗެނަލް "70 އެމް.އެމް ވްލޮގްސް" މިހާރުވެސް އަށާވީސް ހާހަށްވުރެ ގިނަ މީހުން ސަބްސްކްރައިބް ކޮށްފައިވެއެވެ. 

ޝަފީކް ބޯ ތަލަވުމުން ވިސްނީ ބޮލުގައި އިސްތަށި އިންދާކަށް ނޫނެވެ. ނުވަތަ ބޭސްވެރިކަމުގެ ތެރެއިން އެކަމަށް ފަރުވާއެއް ހޯދާކަށްނޫނެވެ. އޭނާގެ ތަލަ ބަދަލުކޮށްލީ އިޝްތިހާރު ބޯޑަކަށެވެ. އޭނާގެ ހުށަހެޅުމަކީ، ތިންމަސްދުވަސް ވަންދެން ވަގުތީ ޓެޓޫއެއް އޭނާގެ ތަލައިގައި ޖެހުމެވެ. ހެއަރ ޓްރާންސްޕްލާންޓް ކޮމްޕެނީއެއްގެ އިޝްތިހާރު މިގޮތަށް އޭނާ ތަލައިގައި ޖަހައިދޭ އަގަކީ 50،000 ރުޕީސްއެވެ. އޭރުން ތިންމަސް ދުވަސް ވަންދެން އެ އިޝްތިހާރު ޖަހައިގެން އޭނާ ވީޑިއޯ ހަދައި ސޯޝަލް މީޑިއާގައި ދައުރުކުރެއެވެ. މިގޮތަށް އޭނާ ހޯދި ފުރަތަމަ އެއްބަސްވުމަކީ، ކޮޗިންއަށް ނިސްބަތްވާ ކުންފުންޏެއްކަމަށްވާ 'ލަ ޑެންސިޓޭ"އާއެކުވީ އެއްބަސްވުމެވެ. އޭނާގެ މި އާދަޔާ ޚިލާފުކަންތަކަށް މީހުންގެ ސަމާލުކަން އައީ އޭނާގެ ޔޫޓިއުބް ޗެނެލް މެދުވެރިކޮށް ކުރި އިޝްތިހާރަކާއެކު ނޫސްތަކަށް އެރި ހިސާބުންނެވެ.

"ވަރަށް ގިނަ ވިސްނުން ވިސްނުމަށްފަހު ކުރަން ފެށިކަމެއް މިއީ. އަހަރެން ދެކޭ ގޮތުގައި ތަލަވުމަކީ ޤުދުރަތީކަމެއް. އެހެންވީމަ އެކަމާ ލަދުގަންނާކަށް ނުޖެހޭ. އަހަރެން ޤަބޫލުކުރާ ގޮތުގައި ތަލަވުމުން މާ ރީތި. އެހެންވީމަ، ތަލަވުމަކީ މައްސަލައެއް ނޫންކަން އެހެންމީހުންނަށް ޤަބޫލުކުރެވޭތޯ ބެލުން މަޤުޞަދަކީ." ޝަފީކް އާ ހަވާލާދީ، ދަ އިންޑިއަން އެކްސްޕްރެސްގައި ލިޔެފައިވެއެވެ.