އިންސާނާ ދުނިޔެއަށް ފޮނުވިފައިވަނީ އިމްތިޙާނަކަށެވެ. އުޚުރަވީ ހަޔާތަށް ދިޔުމަށް ބޭނުންވާ ކޮއްތު ހޯދުމަށްޓަކައެވެ. މިއީ އަހަރުމެންގެ ދީން އަހަރުމެންނަށް އުނގަންނައިދޭ ގޮތެވެ. ކުށެއްނެތް ތުއްތު ކުއްޖެއްގެ ގޮތުގައި މި ދުނިޔެއަށް އައިސް، ދުނިޔޭގެ ހަޔާތް ހޭދަކުރަމުން ދާ ދިޔުމުގައި އެކި މީހުންނަށް ދިމާވަނީ އެކި ކަންކަމެވެ. އުފާވެރިކަމާ ހިތްހަމަޖެހުމުގައި ހޭދަކުރާ ދުވަސްތަކެވެ. ހިތްދަތިކަމާ ވޭނުގައި ހޭދަކުރަން ޖެހޭ ދުވަސްތަކެވެ. ތިމާގެ ޙާލަތު އެކިފަހަރު ނިޔާކުރަނީ އެކި ގޮތަށެވެ.
ޤަބޫލުކުރަންޖެހޭ ފުރަތަމަ ހަޤީޤަތަކީ، އެއްވެސް ޙާލަތަކީ ދާޢިމީ ޙާލަތެއް ނޫންކަމެވެ. އެއީ އަބަދު ތިބާ އުޅެން ޖެހޭނޭ ގޮތެއް ނޫނެވެ. ހިތްދަތިކަމުގައި ދުވަސްތައް ހޭދަކުރާ މީހުން ބުނެއެވެ. މިއީ އަހަރެންނަށް ހުރިގޮތެވެ. އުފަލުގައި އަރާމާއި ލައްޒަތުގައި ކަންކަން ފަހިވެފައިވާ މީހުން ބޮޑާވެފައި ބުނެއެވެ. މިކަން އެހެން ގޮތަކަށް ބަދަލުވުމެއްނެތެވެ. ނަމަވެސް، ވިސްނާލާށެވެ. ތިބާގެ ހާލަތު ބަދަލުވާން ނަގަނީ މަދު ސިކުންތުކޮޅެކެވެ.
ފުޓްބޯޅައިގެ ދުނިޔޭގައި ގިނަ ބައެއްގެ މަޝްހޫރުކަން ހޯދި ޑިއެގޯ ޖޮޓާގެ މަރުގެ ހާދިސާމަތިން ހަނދާން ނެތޭހާ ދުވަހެއްނުވެއެވެ. އިނގިރޭސި ލީގުގެ ޗެމްޕިއަންކަން ލިވަރޕޫލުން ހޯދިއިރު މުހިންމު ދަޢުރެއް ޖޮޓާ އަދާކުރިއެވެ. ޖޮޓާގެ މިލްކިއްޔާތުގައި އެތައް ފައިސާއަކާއި، މުދަލެއް ހުއްޓެވެ. އުޅެމުންއައީ މުއްސަނދި ދިރިއުޅުމެކެވެ. ލީގު މެޗެއްގައި ޗެލްސީއާއެކު ކުޅެމުންދަނިކޮށް ލިބުނު އަނިޔާއެއްގައި ލީގު ނިންމާފައި ފުރަމޭގެ އޮޕަރޭޝަނެއް ކުރަން ޖެހުނެވެ. އެ އޮޕަރޭޝަނަށްފަހު ޑަކްޓަރުންވަނީ އުދުހުން މަނާކޮށްފައެވެ. އޭގެފަހުން ޖޮޓާގެ ކައިވެނިކުރެވުނެވެ. ކައިވެންޏަށް ހަފްތާއެއްފަހުން، މަތިން ދަތުރުކުރުން މަނާކޮށްފައިވާތީ، ލަންޑަނަށް ދިޔުމަށްޓަކައި ޖޮޓާއާއި އޭނާގެ ކޮއްކޮ އެއްގަމު މަގުން، އަގުބޮޑު ކާރެއްގައި ފެށި ދަތުރުވީ އެ ކުޅުންތެރިޔާގެ އެންމެފަހު ދަތުރަށެވެ. އެކްސިޑެންޓެއްގައި އެދެމީހުންވެސް މަރުވީއެވެ. އާއިލާއަށާއި މުޅި ފުޓުބޯޅަ އާއިލާއަށް ސިހުމެއް ގެނުވާފައެވެ.
ރާއްޖެއިން މިސާލެކެވެ. ދާދިފަހުން އެކްސިޑެންޓެއްގައި ނިޔާވި ކުއްޖާއަކީ އެ އާއިލާގައި ހުރި ހަމައެކަނި ދަރިފުޅެވެ. އެ ކުއްޖާގެ މަންމައާއި ބައްޕަގެ ފުރާނައެވެ. ދިރިހުރުމުގެ އަސްލެވެ. ސަތާރަ އަހަރު އެކުގައި ހޭދަކުރަން ފުރުޞަތުލިބުނެވެ. ނަމަވެސް، ހާލަތު ބަދަލުވީ މަދު ވަގުތުކޮޅެއްގެ ތެރޭގައެވެ. ބާރު ދުވެލީގައި ދުއްވާފައިދިޔަ ސައިކަލުގެ ފަހަތުގައި އެވަގުތު ކަންދިމާވި ގޮތުން އިނދެވުނީ މި ދެންނެވި ކުއްޖާއަށެވެ.
މިއީ އެންމެ ދެ ހާދިސާއެވެ. މިފަދަ ކިތަންމެ ހާދިސާއެއް ލިޔެވިދާނެއެވެ. މިފަދަ ކަންކަމުން ލިބިގަންނަންވީ އެންމެ މުހިންމު އިބުރަތަކީ، ހާލަތާމެދު މާޔޫސްނުވުމަށެވެ. މިއަދު ކިތަންމެ ހިތްދަތި ދިރިއުޅުމެއް އުޅެންޖެހިފައި އޮތަސް، މާދަމާ އޮތީ މާ އުފާވެރިކޮށް ކަމަށް ވެދާނެއެވެ. މިއަދު މުއްސަނދިކަމުގައި އުޅެން ފުރުޞަތު ލިބިފައިވާނަމަ، އެކަމަށް ޙަމްދުކުރާށެވެ. ނިޢުމަތަށް ޝުކުރުކުރާށެވެ. ވީވަރަކުން އެހެން މީހުންނަށް އެހީތެރިވާށެވެ. ހާލަތު ބަދަލުވުމުގެ ކުރީންނެވެ.