ފަލަސްޠީނުގެ ޙާލަތު ދަށަށް ނުދާ މިންވަރަށް ދަށަށް ހިނގައްޖެއެވެ. ޣައްޒާއަށް އެހީ ހިފައިގެން ދިޔަ ލޮރީތަކުގައާއި ބޯޑަރ ކައިރީގައި ހުރި ގުދަންތަކުގައި ކާބޯތަކެތި އެބަހުއްޓެވެ. ނަމަވެސް، އެތަކެތި ޣައްޒާއަށް އެތެރެ ވިޔަ ނުދީ ބޯޑަރ ބަންދުކޮށްގެން ތިބި ޖައްބާރު އިސްރާއިލުގެ ސިފައިންނާހުރެ ޣައްޒާގައި އެތައްހާސް ބަޔަކު ބަނޑުހައިހޫނުކަމާ ހަނގުރާމަކުރަނީއެވެ. ކާނެ އެއްޗެއް، ބޯނެ ފެންފޮދެއް ނުލިބި، ބަނޑަށް މަރުވަނީއެވެ.
އިއްޔެ ފަލަސްޠީނުގެ ޞިއްޙީ ވުޒާރާއާއި ހަވާލާދީ އަލްޖަޒީރާއިން ރިޕޯޓުކުރި ގޮތުގައި އިއްޔެ އެކަނިވެސް 81 މީހަކުވަނީ ޝަހީދުކޮށްލާފައެވެ. އޭގެ ތެރޭގައި އެހީ ހޯދުމުގައި ހަރަކާތްތެރިވި 31 މީހަކު ހިމެނެއެވެ. މިއީ ކާބޯތަކެތި އެތެރެކުރުމުގައި އިސްރާއިލް ސިފައިން ގެންގުޅޭ ހަރުކަށި ގޮތްތަކާމެދު ނުރުހުން ފާޅުކުރުމުގެ ގޮތުން އެހީ ފޯރުކޮށްދިނުމުގައި ހަރަކާތްތެރިވާ މީހުންނާއި ނޫސްވެރިން ކުރަމުން އަންނަ ބަނޑުހައިހޫނުކަމުގެ ހަޅުތާލުމާ ދެކޮޅަށް ހިންގި ހަރަކާތެކެވެ.
ޣައްޒާގެ ހާލަތާމެދު ޔޫ.އެންގެ ސެކްރެޓަރީ ޖެނެރަލް އެންޓޯނިއޯ ގުޓެރެސް ބުނެފައިވަނީ މިފަދައިންނެވެ. " ޣައްޒާ، ފަހުގެ ތާރީޚެއްގައި ހައްދެއްނެތި މީހުން މަރުވުމާއި، ލިބޭ ގެއްލުންތަކަށް ބަލާއިރު ބިރުވެރި ފިލްމެއް ނުވަތަ ޝޯއެއް" ކަމަށެވެ.
އަލްޖަޒީރާއިން އާންމުކޮށްފައިވާ ތަފާސްހިސާބުތަކަށް ބަލާއިރު، އޮކްޓޯބަރ 2023 އިން ފެށިގެން މިހާތަނަށް 59،106 މީހުންވަނީ އިސްރާއިލުގެ ޢުދުވާނީ ހަމަލާތަކުގައި ޝަހީދުކޮށްލާފައެވެ. އެއީ ޔަޤީންކުރެވޭ އަދަދުކަމަށްވާއިރު، ހަލާކުވެފައިވާ އިމާރާތްތަކުގެ ދަށުގައި އަދިވެސް ނުނެގި ބައިވަރު ހަށިތައް ވާކަމަށްވަނީ ރިޕޯޓުކޮށްފައެވެ. މިހާތަނަށް 101 މީހަކު ބަނޑުހައިހޫނުކަމުގައި މި ދުނިޔެ ދޫކޮށްފައިވާއިރު، އޭގެ ތެރޭގައި 80 ކުޑަކުދިން ހިމެނެއެވެ.
މި ދައްކަނީ އަހަރުމެން ކަހަލަ މުސްލިމުންގެ ވާހަކައެވެ. މި އުންމަތުގެ ވާހަކައެކެވެ. ލިޔެފައިވާ ވާހަކައެއް ނުވަތަ ކުޅެފައިވާ ފިލްމެއްގެ ވާހަކައެއް ނޫނެވެ. ކޮންމެ ދުވަހަކު އެތައް ބަޔަކު ޝަހީދުވަނީއެވެ. މުޅި ޣައްޒާއޮތީ ތަޅާ ސުންނާފަތި ކޮށްލާފައެވެ. ކުޑަކުދިން އެހެރަ މަރުވެގެން ބިންމައްޗަށް ވެއްޓެނީ ކާނެ އެތިކޮޅެއް ނުލިބިގެންނެވެ. މައިން އެކަނިވެ، ދަރިންތައް ޔަތީމުވެ، ބަނޑަށް މަރުވަމުންދާއިރު، މުޅި އިސްލާމީ އުންމަތް މިއޮތީ ގަދަ ނިދިން ނިދާފައެވެ. އާރާއި ބާރު މުސްލިމުންގެ ނެތީ ހެއްޔެވެ؟ ފައިސާއާއި ކާނާ ނެތީ ހެއްޔެވެ؟