ކުޑަކަޅުވާ މަސްގަނޑު އެކުލެވިގެންވަނީ ޖުމްލަ ދެ މަސްގަނޑުގެ މައްޗަށެވެ. އެއީ ބޮޑު މަސްގަނޑަކާއި ކުޑަ މަސްގަނޑެކެވެ. ކުޑަކަޅުވާ އާއި ދިމާލުން ފެންނަން މިހުންނަނީ ބޮޑު މަސްގަނޑެވެ. ކުޑަ މަސްގަނޑު ހުންނާނީ މި ބޮޑު މަސްގަނޑާއި ފައިގެ ކަށިގަނޑާ ދޭތެރޭގައެވެ.

މި ދެ މަސްގަނޑުވެސް ފައިގެ ފުންނާބުގެ ފަތިނާރާއި (ޓެންޑަން) ވަނީ ގުޅިފައެވެ. އެހެންކަމުން ފުންނާބުގެ ހަރަކާތްތަކުގައި މި މަސްތަކަކީ ވަރަށްވެސް ބޮޑު ދައުރެއް އަދާކުރާ މަސްތަކެކެވެ. ހަމަ އެއާއިއެކު މި މަސްތަކުގެ ތެރެއިން ވަރަށްގިނަ ލޭހޮޅިތަށް ދަތުރުކޮއްފައި ހުންނާނެއެވެ. އެހެންކަމުން ލޭ ދައުރުކުރުމަށްވެސް، ކުޑަކަޅުވާއިން ވަރަށްބޮޑު އެހީތެރިކަމެއް ވެދެއެވެ.

ދުޅަހެޔޮ ކުޑަކަޅުވާމަސްގަނޑަކީ އިސްވެ ދެންނެވުނު މަސައްކަތްތަކަށް ވަރަށްވެސް މުހިންމު އެއްޗެކެވެ. އެހެންކަމުން ދުޅަހެޔޮ ކުޑަކަޅުވާއެއްގެ މުހިންމުކަމަށް ވަކިވަކިން އަލިއަޅުވާލާނަމެވެ. އެގޮތުން:

. ކުޑަހުޅުގެ ބާރު ގަދަވުން: ކުޑަކަޅުވާ މަސްގަނޑުގެ ބާރު ގަދަ ކަމުގައިވަނީނަމަ، ކުޑަހުޅުގެ ހަރާތްތައް ފުރިހަމާނެއެވެ. ހަމަ އެއާއި އެކު މީހާގެ ހަށިގަނޑު ބެލެންސް ކުރުމަށްވެސް ވަރަށްބޮޑު ބާރަކަށްވާނެއެވެ. މީގެ އިތުރުން ކުޑަހުޅުން އުފުލޭ ބުރަ، އުފުލުމުގެ ގާބިލުކަން އިތުރުކޮށްދެއެވެ.

. ދުވެލިބާރުވުމަށް އެހީވުން: ބާރަށް ދުވުމަކީ ކޮންމެ އިންސާނަކުވެސް ހިތް އެދޭނޭ ކަމެކެވެ. ކުޑަކަޅުވާގެ މަސްތަކާއި ފުންނާބުގެ ފަތިނާރާއި ގުޅިފައިވުމުން، ފުންނާބު ގެ ހަރަކާތްތައް ކޮންޓްރޯލް ކުރުމަށް ކުޑަކަޅުވާގެ މަސައްކަތް ބޭނުންވެއެވެ. އެހެންކަމުން ކުޑަކަޅުވާ އަކީ ދުޅަހެޔޮ މަސްގަނޑެއްނަމަ، ފުންނާބުގެ ހަރަކާތްތައް ހަލުއި ވުމަށް އެހީވެދޭނެއެވެ. މީގެ އިތުރުން އަކުނިވަޔަށް ދެމުމުން ރައްކާތެރިކޮށްދޭނެއެވެ. އެހެންކަމަށްވާނަމަ، ބާރަށް ދުވުމުގައި ޖެހިލުން ވުމެއް ނެތެވެ.

. ކުޑަހުޅުގެ އަނިޔާތަކުން ރައްކާތެރިވުން: ފުންނާބާއި ކުޑަހުޅުގެ ހަރަކާތްތައް ކުޑަކަޅުވާއިން ކޮންޓްރޯލް ކުރާއިރު، ފައި ފުރޮޅުން ފަދަ އަނިޔާތަކުން ސަލާމަތް ވުމުގައި ކުޑަކަޅުވާގެ ދައުރުވަރަށްބޮޑެވެ. އެހެނީ ފައި ފުރޮޅިގެންދާ ވަގުތު، ފުންނާބުގެ ފަތިނާރަށް ބާރު ލައިދެނީ ކުޑަކަޅުވާއިންނެވެ. އޭގެ ސަބަބުން ފުންނާބަށް ހަރުދަނާކަމާއި ސާބިތުކަން ލިބިގެން ދާނެއެވެ. އޭރުން ފައި ފުރޮޅުނަނުދީ ސާބިތުކޮއްދޭނެއެވެ.

. ލޭދައުރުކުރުމަށް އެހީވުން: ކުޑަކަޅުވާގެ ތެރެއިން ދަތުރުކޮއްފައި ހުންނަ ލޭހޮޅިތަކުގެ ތެރެއިން، ހިތާ ދިމާލަށް ލޭ ފޮނުވުމުގައި ކުޑަކަޅުވާ އަދާކުރަނީ ވަރަށްވެސް މުހިންމު ދައުރެކެވެ. ބިމަށްދަމާ ބާރާއި (ގްރެވިޓީ) ދެކޮޅަށް ތިރިން މައްޗަށް ލޭތަށް ފޮނުވައި ދެނީ ކުޑަކަޅުވާ މަސްކަނޑުގެ އެހީގައެވެ. އެހެނީ އެ މަސްގަނޑު ހަރުވެ "ކުރުގެޅޭ" ކޮންމެ ފަހަރަކު އެ ލޭހޮޅިތަކުން ހިތާ ދިމާލަށް ލޭ ފޮނުވުމުގައި ބާރު ޕުރެސަރެއް ލެވޭނެއެވެ. މި ނިޒާމުން މިކަން ތަރުތީބުވެފައިވާތީ ބައެއް ސިއްހީ ޠަބީބުން، ކުޑަކަޅުވާ އެއީ އިންސާނާގެ ދެވަނަ ހިތްކަމަށްވެސް ބުނެފައިވެއެވެ.

މިހުރިހާ ކަމެއް މިމޭރުމުން ހުރުމުން، ކުޑަކަޅުވާގެ މަސްތައް ދުޅަހެޔޮކަންމަތީ ބެހެއްޓުމަކީ ކޮންމެހެން ކުރަންޖޭހޭ ވަރަށްމުހިންމު ކަމެކެވެ.