ދުންފަތުގެ އިސްތިޢުމާލުކުރާ މީހުންގެ ނިސްބަތް އެނގޭނޭ ޔަޤީން ތަފާސްހިސާބުތަކެއް ފެންނަން ނެތެއްކަމަކު، އާބާދީއާ ބަލާފައި ދުންފަތުގެ އިސްތިޢުމާލުކުރާ މީހުންގެ އަދަދު ގިނަ ގައުމަކަށް މި ކުޑަކުޑަ ދިވެހިރާއްޖެ ވާނެކަން ޔަޤީނެވެ. އެކަމުގައި ވަކި އުމުރެއް، ވަކި ފަންތިއެއް، ވަކި ގިންތިއެއް، ވަކި ޖިންސެއް ތަފާތުކުރުމެއްނެތި، އެކަމަށް ދެވިހިފާފައިވާ މީހުންގެ އަދަދު މި ގައުމުގައި އިންތިހާއަށްވަނީ އިތުރުވެފައެވެ. ސިގިރޭޓުގެ އަގަށް އައި ބަދަލުތަކާއި، ދުންފަތާ ބެހޭ ޤާނޫނަށް އައި ބަދަލުތަކާއި ގުޅިގެން މިހާރު ގިނަ މީހުން ކުރާކަމަކީ ބިޑި އޮޅުމެވެ. ދުންފަތާއި، ފިލްޓަރާއި އޭގެ ކަރުދާސް ވަކިން ގަނެ، އަމިއްލައަށް އޮޅައިގެން އޭގެ ބޭނުންކުރަނީއެވެ. މަގެއްމަތިން ދިޔަސް، ހޮޓަލަކަށްވަނަސް، ފެންނަނީ ޒުވާނުން ބިޑިއޮޅަން ތިބޭ މަންޒަރެވެ. ހީވާނީ މުބާރާތަކަށް ތައްޔާރުވާހެނެވެ.
ސުވާލެއްނެތެވެ. ދުންފަތަކީ އޭގެ ނުރައްކާ ބޮޑު އެއްޗެކެވެ. އެތައް ގޮތަކުން އެކަމުގެ ގެއްލުން ލިބޭކަމެކެވެ. ނަމަވެސް، ފެކްޓަރީތަކުގައި ތައްޔާރުކޮށްގެން ވަކި އުޞޫލެއްގެ މަތިން ތައްޔާރުކޮށްފައިވާ ސިގިރޭޓަށްވުރެ، އަމިއްލައަށް އޮޅައިގެން އޭގެ އިސްތިޢުމާލުކުރުމުން ލިބޭ ގެއްލުން އަދި މާބޮޑެވެ.
ނުރައްކާތެރި ވިހަ ކެމިކަލްތަކުގެ އަސަރު މާބޮޑަށް ކުރުން
ކުރިންވެސް ދެންނެވިގޮތަށް ކޮންމެ ގޮތަކަށް ދުންފަތުގެ އިސްތިޢުމާލު ކުރިނަމަވެސް، އެކަމަކީ ގެއްލުން ހުރިކަމެކެވެ. ވިހަ ކެމިކަލް ހަށިގަނޑުތެރެއަށް ފޯރާކަމެކެވެ. ނަމަވެސް، ބިޑި އޮޅުމުގައި މިކަމުގެ ނުރައްކާ އަދި މާބޮޑެވެ. ބިޑި އޮޅާއިރު ދުންފަތް އެޅުމުގައި ވަކި މިންގަނޑެއް ނުގެންގުޅެވޭތީއާއި ބޭނުންކުރާ ފިލްޓަރުގެ ފެންވަރު ދަށްވުމުގެ ސަބަބުން، ހަށިގަނޑުތެރެއަށް އެތެރެވާ ނިކޮޓިންއާއި، ޓާ އަދި ކާބޮންމޮނޮކްސައިޑްގެ ނުބައި އަސަރު މާބޮޑަށްކުރާކަމަށް ކަމުގެ މާހިރުންބުނެއެވެ. އަދި އޮޅުމުގެ ފެންވަރު ދަށްވުމުގެ ސަބަބުން ބިޑި ބޯއިރު، މާބޮޑަށް ފުންކޮށް ދެމުމުގެ ސަބަބުން ފުއްޕާމެއަށް ކުރާ އަސަރު މާބޮޑެވެ.
ކޮންމެ އެއްޗެއްވެސް ފިލްޓަރަކަށް ވަރިހަމަ
ބައެއް ޒުވާނުން މިހާރު ފިހާރަތަކުން ފިލްޓަރ ގަތުމުގެ ބަދަލުގައި އަމިއްލަ އުފެއްދުންތައްވެސް ބޭނުންކުރާ މަންޒަރު ފެނެއެވެ. އެތަކެތީގެ ތަފްޞީލަށް ނުދިޔަނަމަވެސް، މިހާރު ފިލްޓަރެއްގެ ގޮތުގައި ކޮންމެފަދަ އެއްޗެއްވެސް ބޭނުންކޮށްފާނެކަން އެނގޭނެއެވެ. މިއީ އަދި އިންތިހާއަށް ނުރައްކާތެރިކަމެކެވެ. އޭގެ ސަބަބުން އެ ބޭނުންކުރާ އެއްޗެއްގެ ހުންނަ އިތުރު ކެމިކަލްތައްވެސް ދުންފަތުގެ ދުމާއެކު ހަށިގަނޑަށްދަނީއެވެ.
ސިގިރޭޓަށްވުރެ ރައްކާތެރިކަމަށް ވިސްނުން
ބައެއް ޒުވާނުންގެ ނަޒަރުގައި އަތުން އަނބުރައިގެން އެ ބޯ ބިޑި، ފިހާރަތަކުން ގަންނަ ސިގިރޭޓަށްވުރެ ރައްކާތެރިއެވެ. މި ވިސްނުމުގެ ސަބަބުން ދުންފަތުގެ އިސްތިޢުމާލުކުރެވޭ ވަރު އިތުރުވެއެވެ. އޮޅައިލަން ވަގުތު ދިޔަނަމަވެސް، ދުވަހެއްގެ ނިސްބަތަށް ބަލާއިރު، ކުރިން ސިގިރޭޓު ބުއިވަރަށްވުރެ އިތުރަށް ބިޑި ބޮވޭގޮތްވެއެވެ.
ބަލިތަކަށް ހުށަހެޅޭވަރު އިތުރު
އަމިއްލައަށް ސިގިރޭޓު/ބިޑި އޮޅައިގެން ބުއިމުން ދުންފަތުގެ އިސްތިޢުމާލުކުރުމުން ޖެހޭ ބަލިތައް ޖެހުމުގެ ފުރުޞަތު މާބޮޑުކަމަށް ޞިއްޙީ މާހިރުންދަނީ ބުނަމުންނެވެ. އެގޮތުން ފުއްޕާމޭގެ ކެންސަރާއި، ކްރޯނިކް އޮބްސްޓްރަކްޓިވް ޕަލްމޮނަރީ ޑިސީޒް ކަހަލަ ފުއްޕާމެއާ ގުޅުންހުރި ނުރައްކާތެރި އެހެން ބަލިތަކާއި، ހިތުގެ ބަލިތަކާއި، އަނގައިގެ ކެންސަރާއި، ފުއްޕާމޭގެ މަސައްކަތްކުރުން ދަށްކޮށްލުމުގެ ޞިއްޙީ މައްސަލަތައް އަވަހަށް ޖެހެއެވެ.
މީގެ އިތުރުން ދުންފަތުގެ އިސްތިޢުމާލުކުރާ މީހުންގެ ސަބަބުން އެ ޢަމަލު ނުކުރާ މީހުންނަށް ކުރާ އަސަރުވެސް ބޮޑެވެ. މިކަމުގެ ސަބަބުން އޭގެ އަސަރު ކައިރީގައި ތިބޭ މީހުންނަށާއި، ދަރިންނާއި މައިންބަފައިންނާ އާއިލާ އެހެން މީހުންނަށްކުރަނީ އިންތިހާއަށެވެ. ދުންފަތުގެ އިސްތިޢުމާލުކުރާ މީހުންގެ ސަބަބުން ކުށެއްނެތް ބަޔަކު ޞިއްޙީ ބޮޑު އަނދަވަޅަކަށް ވައްޓައިލެވެނީއެވެ.
ދުންފަތާ ދުރުހެލިވާން ބޭނުންވާ ފަރާތްތަކަށް ކުރެވިދާނެ ވަރަށް ގިނަ ކަންކަން ޞިއްޙީ މާހިރުން ލަފާދެއެވެ. އެގޮތުން، ނިކޮޓިން ރިޕްލޭސްމެންޓް ތެރަޕީ އަކަށް ދެވިދާނެއެވެ. އެކަމަށް ޚާއްޞަ ޕެޗެއް ޖަހައިގެންނާއި، ޗުވިންގަމް ބޭނުންކުރެވިދާނެއެވެ. އަދި ކަމުގެ މާހިރުންގެ ލަފައާއި އިރުޝާދާއެކު ބިހޭވިއަރަލް ތެރަޕީ ނަގަންފެށިދާނެއެވެ. އޭގެ ސަބަބުން ތިމާގެ އުޅުން ހުންނަގޮތް ދެނެގަނެ، ގެންނަން ޖެހޭ ބަދަލުތައް ގެނައުމަށް އިރުޝާދު ދެވޭނެއެވެ. އަދި ދުންފަތުގެ އިސްތިޢުމާލުކުރުމުން ދުރުހެލިކުރުމަށް އެހީވެދޭ މޮބައިލް އެޕްލިކޭޝަންތަކާއި އެކަމަށް ޚާއްޞަ ކްލިނިކްތަކާއި އެކަމަށް މަސައްކަތްކުރާ ފަރާތްތަކުގެ އެހީތެރިކަން ހޯދިދާނެއެވެ.