އެމްޕީއެލް ނޯތް ހާބަރުން ސަޕޯޓް ސާވިސް ދިނުމަށް ތައްޔާރުވަމުން އަންނަ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ އެސިސްޓަންޓް ޖެނެރަލް މެނޭޖަރ ހަމްދުﷲ ރަޝީދު ވިދާޅުވެއްޖެއެވެ.
އެމްޕީއެލްގެ ފަރާތުން މިގޮތަށް މަޢުލޫމާތުދީފައިވަނީ ރޭ ދައުލަތުގެ މީޑިއާގެ ޕްރޮގްރާމަކަށް ދިން ހާއްސަ އިންޓަވިއުއެއްގައެވެ.
އެމްޕީއެލް އިން ތެލާއި އައިސް ހިމެނޭ ގޮތަށް އުޅަނދުތަކަށް ސަޕޯޓް ސާވިސް ދިނުމަށް ތައްޔާރުވަމުން އަންނަނީ މިދިޔަ މަހުގައި މާލޭގެ ނޯތު ހާބަރު ހިންގުން އެމްޕީއެލްއާއި ހަވާލުކުރި ފަހުންނެވެ. މީގެ ކުރިން މާލޭގެ ނޯތު ހާބަރު ހިންގަމުންދިޔައީ މާލެ ސިޓީ ކައުންސިލުންނެވެ. މި ބަދަލާއެކު ވިޔަފާރި ބަނދަރާއި އުތުރު ބަނދަރު ވެސް މިހާރު ވަނީ އެމްޕީއެލްގެ އިހުތިސާސްގެ ދަށަށް ގޮސްފައެވެ.
ޕްރޮގްރާމްގައި ވާހަކަ ދައްކަވަމުން އެމްޕީއެލްގެ އެސިސްޓެންޓް ޖެނެރަލް މެނޭޖަރު ހަމްދުﷲ ރަޝީދު ވިދާޅުވީ ނޯތު ހާބަރު ސަރަހައްދުގެ މަސްވެރިންނާއި ދޯނިފަހަރަށް ތެލާއި އައިސް ހިމެނޭ ގޮތަށް ސަޕޯޓް ސާވިސް ދިނުމަށް އެ ކުންފުނިން ތައްޔާރުވަމުން އަންނަ ކަމަށެވެ. މަސްވެރިންނަށް އަގުހެޔޮކޮށް އައިސް ފޯރުކޮށްދިނުމަށް އެ ސަރަހައްދުގައި އައިސް ޕްލާންޓެއް ގާއިމްކުރުމަށް އެމްޕީއެލް އިން ނިންމާފައިވާ ކަމަށް އޭނާ މައުލޫމާތު ދިނެވެ. ހަމައެގޮތަށް އެންމެ ހެޔޮ އަގުގައި އެމްޕީއެލް އިން މަސްވެރިންނަށް ތެޔޮ ފޯރުކޮށްދޭނެ ކަމަށް އޭނާ މައުލޫމާތު ދެއްވިއެވެ. މި ހިދުމަތް މީގެ ކުރިން އަމިއްލަ ފަރާތްތަކުން ބޮޑު އަގުގައި ދެމުންދާތީ އެމްޕީއެލް އިން މަސްވެރިންނަށް ލުއިފަސޭހަ ކުރުމަށް ނިންމި ކަމަށް އެމްޕީއެލް އިން އޮޅުންފިލުވާފައިވެ އެވެ.
ބަނދަރުގައި ހުރި ކީވޯލްގައި ކުރިން 32 އާއި 34 އާއި ދެމެދުގެ އަދަދަކަށް އުޅަނދު ޖައްސާފައިވީ ނަމަވެސް ރިކޮންފިގްރޭޓް ކޮށްފައިވާ ބެސިންގައި ގާތްގަނޑަކަށް 99 އުޅަނދު އެއްފަހަރާ ޙަވާލުކުރެވޭނެ ކަމަށް އެމްޕީއެލް އިން ބުނެފައިވެ އެވެ.
. އެމްޕީއެލް އިން ވަނީ ވެއިޓިން އަށް 25 ބަރތް، ކާގޯ އަދި ޕެސެންޖަރ ޓްރެފިކް އަށް 54 ބަރތް، އަދި މަސްވެރި އުޅަނދުތަކަށް 20 ބަރތް ކަނޑައަޅާފައެވެ. އަދި ފުރުމުގެ ކުރިން މަސް އޮފްލޯޑް ކުރުން ފަސޭހަ ކުރުމަށްޓަކައި ކްރޮސް ޖެޓީ ވެސް ތަރައްޤީކުރުމަށް ހަމަޖެހިފައިވެ އެވެ.
އޮޕަރޭޝަނަލް ޝިފްޓުގެ ސަބަބުން ދިގުދެމިގެންދާ ތޮއްޖެހުން ކުޑަވާނެ ކަމަށް ބެލެވޭއިރު، އެމްޕީއެލް އިން ދައްކާ ގޮތުގައި ކުރިން ކުއީވޯލް އަށް ވަނުމަށް ފަސް ދުވަހަށް މަޑުކުރަން ޖެހިފައިވާ އުޅަނދުތަކަށް މިހާރު އިސްލާހުކޮށްފައިވާ ނިޒާމުގެ ދަށުން އެއް ދުވަހުގެ ތެރޭގައި ބަނދަރު ކުރެވޭނެ އެވެ.
މީގެ އިތުރުންވެސް ފެނާއި ކަރަންޓްގެ ޚިދުމަތްވެސް ދޭން އެމްޕީއެލް އިން ރާވާފައިވެ އެވެ.
ކެޕޭސިޓީ ފުޅާކުރުމާއެކު އެމްޕީއެލް އިން ދަނީ ހިދުމަތް ފޯރުކޮށްދިނުމާއި ކަނޑުގެ ރައްކާތެރިކަން އިތުރުކުރުމުގެ މަގުސަދުގައި އިންފްރާސްޓްރަކްޗަރަލް އަޕްގްރޭޑްތަކެއް ތައާރަފް ކުރަމުންނެވެ. 14 އަހަރުވީ ބަނދަރަށް ދިމާވެފައިވާ މައްސަލަތައް ހައްލުކުރުމުގެ މަސައްކަތް މިހާރުވެސް ކުރެވެމުންދާ ކަމަށް އެމްޕީއެލް އިން މައުލޫމާތުދިނެވެ.