މިދުވަސްވަރަކީ ހުޅަނގު މޫސުމުގެ ވިއްސާރައިގެ ދުވަސްވަރެވެ. މިހާރު ކުރިޔަށްދަނީ އަހުލިހަ ނަކަތުގެ ދުވަސްތަކެވެ. މިއީ ހުޅަނގު މޫސުމުގެ 9 ވަނަ ނަކަތެވެ. 29 ޖުލައި އިން 10 އޯގަސްޓުގެ ނިޔަލަށް ދެމިގެންދާ މި ނަކަތުގައި ވައި ޖެހޭނީ ސީދާ ހުޅަނގުންނެވެ. އާންމުގޮތެއްގައި އުޑުމަތި ސާފުވެފައި ވައި މަޑު މިނަކަތުގައި ކަނޑުތައްވެސް މަޑުވާނެއެވެ. އެހެންނަމަވެސް، ވިލާގަނޑުގައި މިހާރު އާދަޔާ ޚިލާފަށް ކަނޑުގަދަވެފައި ވައިބާރެވެ. މޫސުމާ ބެހޭ އިދާރާއިންނާއި ކަމާބެހޭ ވުޒާރާތަކުން އަބަދުމެ ދަތުރަށް ސަމާލުވުމަށްދަނީ ހަނދާންކޮށްދެމުންނެވެ.
ކޮންމެހެން ކުރަންޖެހޭ ދަތުރުތައް ނޫނީ ނުކުރުން
ދިވެހިރާއްޖެއަކީ 99 އިންސައްތަ މޫދު ހިމެނޭ ޖަޒީރާ ގައުމަކަށްވާއިރު، ދަތުރުފަތުރުގެ ބޮޑުބައެއް ހިއްސާކުރަނީވެސް ކަނޑެވެ. ކޮންމެ ރަށެއްގައި އެރަށަކަށް ބޭނުންވާ ހުރިހާ ވަޞީލަތްތައް ޤާއިމުވެފައި ނުހުންނާތީ، އެއްރަށުން އަނެއްރަށަށް ދަތުރުކުރަންޖެހެއެވެ. މިހެން މިކަން އޮތް ނަމަވެސް، މޫސުމަށްބަލާފައި ކޮންމެހެން ކުރަންޖެހޭ ދަތުރެއް ނޫނީ މިދުވަސްވަރު ނުކުރުމަކީ މުހިންމުކަމެކެވެ. ދަތުރުދިޔުމާއި، މަސްބާނަން ދިޔުމާއި، ސަކަރާތްޖެހުމަށް މިދުވަސްވަރު ގަދައިގައި ކަނޑަށް ނުކުތުން ރައްކާތެރިއެއްނޫނެވެ.
ދަތުރުކުރާ އުޅަނދުގެ ސަލާމަތީކަންކަމަށް ބެލުން
ދަތުރަކަށް ފުރާއިރު، ކިތަންމެ ކުރު އަދި ކައިރި ދަތުރަކަށް ވިޔަސް، ދަތުރަށް ބޭނުންވާ ހުރިހާ އެއްޗެއް އެ އުޅަނދެއްގައި ހުރިތޯ ޔަގީންކުރަންވާނެއެވެ. އުޅަނދަށް އެރުމަށް ހުއްދަ ދެވިފައިވާ މިންވަރަށް މީހުން އެރުމާއި، ދަތުރުކުރާ އެންމެންނަށް ހަމަވާވަރަށް ލައިފް ޖެކެޓް ހުރިތޯ ޔަގީންކުރުމާއި، މުވާޞަލާތީ ގުޅުމަށް ބޭނުންކުރާ އާލާތްތައް ރަނގަޅަށް މަސައްކަތްކުރޭތޯ ކަށަވަރުކުރުމާއި، ދަތުރަށް ބޭނުންވާ ފެނާއި ކޮއްތު ހަމައަށްހުރިތޯ ޔަގީންކުރަންވާނެއެވެ. ދުއްވާ ފަރާތުން، މޫސުމަށް ބަލައިގެން ދުއްވުމާއި، މުއްދަތު ހަމަނުވާ ލައިސަންސް އޮތްތޯ ޔަގީންކުރުމާއި، އުޅަނދުގެ ސަލާމަތީ ލިޔެކިޔުންތައް އަދާހަމަވެފައި ހުރިތޯ ބަލަންވާނެއެވެ. އަދި އެކަށީގެންވާ ވަރަށް ފަޅުވެރިން ލައިގެންނޫނީ ދަތުރު ކޮށްގެން ނުވާނެއެވެ. މިއީ އާންމު ގޮތެއްގައި ދިވެހިންގެ މެދުގައި ފަރުވާ ކުޑަކޮށްލެވޭ ކަންކަން ނަމަވެސް، އެންމެ ކުޑަމިނުން މިފަދަ މޫސުމެއްގައި މިކަންކަމަށް ބަލައިލުން މުހިންމެވެ.
އެކަނި ދަތުރަށް ނުފުރުން
މިއީ އަބަދުވެސް ދިވެހިންގެ ތެރޭގައި އޮންނަ ވަރަށް ވިޔާނުދާ އާދައެކެވެ. އޮޑިދޯނިފަހަރުގައާއި ލޯންޗު އަދި ޑިންގީތަކުގައި އެކި ބޭނުންތަކަށް އެކަނި ފުރައިގެންދިޔުމެވެ. މިއީ ދަތުރުފަތުރާބެހޭ ޤާނޫނުގައިވެސް މަނާކޮށްފައިވާ ކަމަކަށްވީނަމަވެސް، ރަށްފުށުގައި އާންމުކަމެކެވެ. މިކަމުގައި ވަކި އުމުރެއްނެތެވެ. އޮންނަ ޔަގީންކަމެއްގެ ސަބަބުން ނުވަތަ އެހެން ކޮންމެވެސް ސަބަބަކާހުރެ އެކަނި ދަތުރުކުރާއިރު، ތިމާ މި ހުށަހެޅެނީ ކިހާބޮޑު ނުރައްކަލަކަށްކަން ވިސްނައެއްނުލައެވެ. މިފަދަ މޫސުމެއްގައިވެސް އަދި ކިތަންމެ މޫސުން ރަނގަޅު ދުވަސްވަރެއްގައިވެސް، އެކަނި ދަތުރުކުރުމަކީ ކޮށްގެން ވާނޭ ކަމެއް ނޫނެވެ.
މޫސުމާބެހޭ ޚަބަރުތައް ބެލުން
ދަތުރެއް ފެށުމުގެ ކުރިން މޫސުމާބެހޭ އެންމެފަހުގެ ޚަބަރުތައް ހޯދުމަކީ މުހިންމުކަމެކެވެ. ޒަމާނުގެ ގޮތުން އެކަން މިއަދު މިވަނީ ފަސޭހަވެފައެވެ. އަތުގައި އޮންނަ ފޯނުން މަދު ސިކުންތުކޮޅެއްގެ ތެރޭގައި، މޫސުމާބެހޭ އިދާރާއަށް ގުޅައިގެން، ސޯޝަލްމީޑިއާ މަންސަތަކުން ބަލައިގެން ނުވަތަ އެފަދަ އެޕްލިކޭޝަންތަކުގެ އެހީގައި ފަސޭހައިން މޫސުން ބަލައިލެވެއެވެ. ކުރިއަށް އޮތް ދުވަސްތަކުގައި ލަފާކުރާ މޫސުންވެސް ބަލައިލެވެއެވެ.
ކަންކަން ކިތަންމެ ފަސޭހަވެފައި ހުއްޓެއްކަމަކު، ފަރުވާކުޑަވުމާއި، ހާލަތުގެ ގޮތުން ގަދައިގައި މީހުން ދަތުރުކުރެއެވެ. އަދި ހިތާމަވެރި ހާދިސާތައްދަނީ ހިނގަމުންނެވެ. ނަމަވެސް، މި ދެންނެވި ކަންކަމަށް ބަލައިގެން ދަތުރުތައް ކުރާނަމަ، ހިތާމަވެރި ހާދިސާތައް މަދުކުރެވިދާނެއެވެ.