ޗުއްޓީއެއް ލިބުމުން ގިނަ ބަޔަކު މީގެ ކުރިން ވިސްނުން ހުންނަނީ ރާއްޖެއިން ބޭރު ގައުމުތަކަށް ޒިޔާރަތްކޮށް މަޖާކޮށް ސަކަރާތް ޖަހައިލުމަށެވެ. ނުދެވޭ ގައުމުތަކަށް ޒިޔާރަތްކޮށް ތަންތަން ބަލައިލާ ހިތްއުފާ ކޮށްލުމަށެވެ. ނަމަވެސް، މިހާރު ދިވެހި ޒުވާނުންގެ ތެރޭގައި އެންމެ މަޤުބޫލު އެއް މަންޒިލަކީ މި ދުނިޔެމަތީގައިވެސްވާ އެންމެ މާތްބިމެވެ. ޢުމްރާއަށްދާ ޒުވާނުންގެ އަދަދު އެއްދުވަހުން އަނެއް ދުވަހަށް އަންނަނީ އިތުރުވަމުންނެވެ. މިއީ ޔަގީނުންވެސް ހެޔޮފާލެކެވެ. އަހަރުދުވަހު ލިބޭ ފައިސާއިން ބައެއް އެއްކުރަމުން އައިސް އާއިލާއާއެކު ނުވަތަ ރައްޓެހިންނާއެކު ޢުމްރާއަށްދާ މީހުންގެ ނިސްބަތް މިހާރުގިނައެވެ.
ހޭލުންތެރިކަން އިތުރުވުން
ގިނަ ޒުވާނުން ޢުމްރާގެ އަޅުކަމަށްދަނީ އެކަމަށް އެ އަޅުކަމުގެ މާތްކަމާއި މުހިންމުކަން އެނގިގެންނެވެ. ދީނީ ގޮތުން ހޭލުންތެރިކަން އިތުރުވެގެންނެވެ. އެކަމުގައި ހުރި ދަރުމައާއި ޘަވާބު އެކިއެކި ގޮތްގޮތުން ހޯދައިގެންނާއި ލިބިގެންނެވެ.
ދަތުރު ފަސޭހަވުމާއި ފައިސާ ދެއްކޭނޭ ފަހިގޮތްތައް ހުރުން
މިހާރު ޢުމްރާދަތުރެއް ދިޔުމަށްޓަކައި މާބޮޑު ތަކުލީފެއް އުފުލާކަށް ނުޖެހެއެވެ. ޢުމްރާ ދަތުރުތައް އިންތިޒާމްކުރާ ވަރަށް ގިނަ ގުރޫޕްތައް މިހާރު ހަރަކާތްތެރިވެއެވެ. ސަރުކާރުން ކޮންމެ އަހަރަކުވެސް އެކަމަށް ހުއްދަ ދެވިފައިވާ ގުރޫޕްތައް ހުންނައިރު، ސަރުކާރުގެ ކުންފުނި މޯލްޑިވްސް ހައްޖު ކޯޕަރޭޝަން މެދުވެރިކޮށްވެސް ޢުމްރާގެ އަޅުކަމަށް ދެވެއެވެ. އޮންލައިންކޮށް ފައިސާ ދެއްކެއެވެ. ބައެއް ގުރޫޕްތަކުން އިންސްޓޯލްމަންޓަށް ބަހާލައިގެންވެސް ދެއްކޭނޭ އިންތިޒާމްވަނީ ހަމަޖެހިފައެވެ. އަދި ވަކި މުއްދަތެއްކުރިން ފައިސާ ދައްކައިފިނަމަ، ބޮޑެތި ޑިސްކައުންޓްތައްވެސް ދެއެވެ.
މިއީ ޓްރެންޑެއްތަ؟ ނުވަތަ ހެޔޮ ބަދަލެއްތަ؟
މިހާރަކަށް އައިސް ގިނަ ކަންކަން މީހުންގެ ތެރޭގައި ފެތުރެނީ މީސްމީޑިއާ މެދުވެރިކޮށެވެ. ކޮށްލާ ކަމެއް ދުނިޔޭގެ އެއްބިތުން އަނެއްބިތަށް ފަސޭހަކަމާއެކު މަދު ސިކުންތުކޮޅެއްގެ ތެރޭގައި ފެތުރެއެވެ. އަދި އެކަން ވައިގައި ހިފައެވެ. އެއަށް އަހަރުމެން 'ޓްރެންޑެކޭ' ކިޔަމުއެވެ. ޓްރެންޑެއްނަމަ، ދުވަސްކޮޅެއްވީމާ އެކަން ހިނދެއެވެ. އަނެއްކާވެސް އެހެންކަމެއް އާދެއެވެ. ޢުމްރާގެ ކަންކަމަށްދާ މީހުން އަދި ހާއްސަކޮށް ޒުވާނުން އިތުރުވަމުން އަންނަކަމަކީ ޓްރެންޑެކޭ ބުނުމަށްވުރެ ބުނާ ހިތް އޮތީ ހެޔޮ ބަދަލެއްކަމެވެ. އެ ބަދަލު އަންނަން ފެށިތާ މިހާރު ދުވަސްކޮޅެއް ވެއްޖެއެވެ. އެއީ ޒަމާނާ އެއްގޮތަށް މީހުން ހޭލުންތެރިކަން އިތުރުކުރުމަށް ދިވެހި ޢުމްރާ ގުރޫޕްތައް ބޭނުންކުރަންފެށި އުކުޅުތަކުގެ ސަބަބުންނެވެ.
ސަމާލުވާންޖެހޭ!
މިއީ ދީނީ އަޅުކަމެވެ. ލިބޭ ޗުއްޓީގައި އާއިލާއާއެކު އެ މާތް ބިމަށް ދަތުރެއްކޮށްފައި ދާއިރު، އިންތިހާއަށް އުފާވެސްވާނެއެވެ. އަދި އެ ތަޖުރިބާ ރައްޓެހިންނާ އާއިލާއާ ހިއްސާކުރަންވެސް ބޭނުންވާނެއެވެ. ނަމަވެސް، އެކަންކަން ވަކި ޙުދޫދެއްގެ ތެރެއިން ކުރަން ސަމާލުކަންދޭންޖެހޭނެއެވެ. އަޅުކަމުގެ ރޫޚު ނުގެއްލޭގޮތަށް، އެހެން މީހުން ތިމާއާ ދެކޭގޮތް ނުބައި ނުވާ ގޮތަށް ޢަމަލުތައް ބެހެއްޓުމަކީ މުހިންމުކަމެކެވެ. ކޮންމެ ދަންނަ މީހަކީ އެކުވެރިވެރިއެއް ނޫނެވެ. ހިތްހެޔޮ މީހެއްނޫނެވެ.
އެހެންކަމުން، މީސްމީޑިއާގައި އެކަމާ ގުޅުންހުރި މަންޒަރުތައް ހިއްސާ ކުރާއިރު މިކަންކަމަށް ވިސްނާލައިގެން އެކަން ކުރުމަކީ މުހިންމުކަމެވެ. ނަމަވެސް، ތިމާ މީސްމީޑިއާގައި ހިއްސާކުރާ އެންމެ ޕޯސްޓެއްގެ ސަބަބުން އެހެން މީހަކު އެ އަޅުކަން ކުރަން ނިޔަތްގަނެ އެކަން ހާސިލުވެއްޖެނަމަ، ތިބާއަށް ހުރީ ހެޔޮ ދަރުމައެވެ.