ތިމާ މީހަކުދެކެ ލޯބިވާނަމަ އެމީހެއްގެ ހުރިހާ ކަމެއް ދެނެގަންނަން ބޭނުންވެއެވެ. ތިމާގެ ބައިވެރިޔާއާއެކު ހުންނައިރު ދަގަތްފާނު ފަދަ ބާރުގަދަ ދަމާ ބާރެއް ހުރެފައި އެނޫން އެއްވެސް ކަމަކާއިމެދު ނުވިސްނޭނަމަ އެއީ ވަރުގަދަ ލޯތްބެކެވެ. ނަމަވެސް ދެމީހުންގެ މެދުގައި ދުރުކަން އުފެދި ބައިވެރިޔާ އެހެން މީހަކުދެކެ ލޯބިވާތަން އާދެއެވެ. ބައިވެރިޔާ ތިމާއާއި ދުރުވާނަމަ އޭނާގެ އުޅުމަށް ބަލާށެވެ. މި ކިޔައިދެނީ ތިމާގެ ބައިވެރިޔާ އެހެން މީހަކުދެކެ ލޯބިވެ ގުޅުމެއް ބާއްވާކަން ދެނެގަންނާނެ 4 ގޮތެކެވެ.

* ނަފުސާނީ ގޮތުން އޭނަގެ ސަޕޯޓެއް ނުލިބޭނެ

  ތިމާގެ ބައިވެރިޔާ އެހެން މީހަކާ ލޯބީގެ ގުޅުމެއް ބާއްވާނަމަ ތިމާއާއި ބައިވެރިޔާއާއި ދެމެދު ވާހަކައެއް ނުދެކެވޭނެއެވެ. ކުރީގައި ވާހަކަދައްކައި އުޅުނު ގޮތް ބަދަލުވެ، އޭނާގެ އިހުސާސްތަކެއް ހިއްސާއެއް ނުކުރާނެއެވެ. އެމީހުންގެ އަޅާލުމެއް ނުލިބޭ ތާނގައި ނަފުސާނީ ގޮތުން ތިމާ ބަލިކަށިވާ ވަގުތުތަކުގައި އޭނާގެ އެހީތެރިކަމެއްވެސް ނުލިބޭނެއެވެ.

* ތިމާ ބާކީކޮށްލާނެ

  ތިމާގެ ބައިވެރިޔާ އެހެން މީހަކާ ގަޔާވާނަމަ ތިމާއާއި ދުރުގައި ހުންނަން ކުރެވުނުހާ މަސައްކަތެއް ކުރާނެއެވެ. އާއިލާއާއި ރައްޓެހިން ފަދަ އެހެނިހެން ހުރިހާ ބަހަނާތަކެއް ދެމީހުންގެ ދޭތެރެއަށް ވެއްދުމުގެ އިތުރުން ދެމީހުންގެ މުސްތަޤުބަލާއިމެދު ކުރާ ސުވާލުތަކަށް ޖަވާބެއް ނުދޭނެއެވެ.

* ތިމާގެ ކަންކަން ފާހަގައެއް ނުކުރާނެ

  ތިމާ ބޭރަށް ގޮސް އުޅޭއުޅުމުގައި ހެދުން އެޅުމާއި ކަންކަން ހުންނަ ގޮތަށް ކުރީގައި ތަޢުރީފުކޮށް ހެދިޔަސް، ތިމާގެ ބައިވެރިޔާ އެހެން މީހަކާ ގުޅުމެއް ބާއްވަން ފަށާ ހިސާބުން އެކަންކަން ފާހަގަކޮށް ތަޢުރީފެއް ނުކުރާނެއެވެ. ކުރީގައި އުޅުނު ލޯބިވެތި ގޮތް ނެތިގެން ގޮސް، ތިމާ ކިތަންމެ މަސައްކަތެއް ކުރިޔަސް އޭނާގެ ސަމާލުކަމެއް ނުހޯދޭނެއެވެ.

* ދެމެދުގައި ލޯތްބެއް ނޯންނާނެ

  ކުރީގައި ދެމެދުގައި އޮތް ގާތް ގުޅުން ނެތެމުން ދާނެއެވެ. ކުރީގައި ދެމެދުގައި އޮންނަ އަންޑަސްޓޭންޑިންގ ނެތި، ދެމީހުންގެ މެދުގައި ނުތަނަސްކަން އުފެދެން ފަށާނެއެވެ. ދެމީހުންގެ މެދުގައި "ރޮމޭންސް" ނެތި، ދެމީހުންގެ މެދުގައި ސުލްޙަވެރިކަން ގެއްލިގެން ދިޔުމަކީވެސް ތިމާގެ ބައިވެރިޔާ އެހެން މީހަކާއެކު ލޯބީގެ ގުޅުމެއް ބާއްވާކަމުގެ އަލާމާތެކެވެ.

މި ކިޔައިދިނީ ތިމާގެ ބައިވެރިޔާ އެހެން މީހަކާ ލޯބީގެ ގުޅުމެއް ބާއްވާކަން ދެނެގަންނާނެ 4 ގޮތެކެވެ. މިނޫންވެސް އެތައް ގޮތަކުން އެކަން ބެލިދާނެއެވެ. ނަމަވެސް ލޯބީގެ މާހިރުން ބުނާގޮތުގައި މި 4 ކަންތައް މީ މުޖައްރިބު 4 ގޮތެކެވެ.