ދިރާގު މޯލްޑިވްސް ރޯޑް ރޭސް 2025 ގައި ބައިވެރިވުމަށް ރަޖިސްޓްރީވުމުގެ ފުރުސަތު ހުޅުވާލައިފިއެވެ.
ދިރާގު ހެޑް އޮފީހުގައި ނިމިދިޔަ ހަފްތާގައި ބޭއްވި ހާއްސަ ނޫސްވެރިންގެ ބައްދަލުވުމެއްގައި ވަނީ ހާފް މެރެތަން، 10 ކިލޯމީޓަރު، 5 ކިލޯމީޓަރު އޯޕަން، ނުވަތަ 5 ކިލޯމީޓަރުގެ ކޯޕަރޭޓް ޓީމް ކެޓަގަރީތަކަށް މިހާރު dmrr.dhiraagu.com.mv މެދުވެރިކޮށް ރަޖިސްޓްރީ ކުރެވޭނެ ކަމަށް އިއުލާންކޮށްފަ އެވެ.
24 އޮކްޓޫބަރު ވާ ހުކުރު ދުވަހު ހުޅުމާލޭ ސެންޓްރަލް ޕާކުގައި ބޭއްވުމަށް ހަމަޖެހިފައިވަނީ މި އިވެންޓުގެ 16 ވަނަ އެޑިޝަން އެވެ. ރޭސް ކެޓަގަރީގެ ހުރިހާ ކެޓަގަރީއަކުން ވަނަވަނައަށް އަންނަ ފަރާތްތަކަށް މުޅި ޖުމްލަ 280،000 ރުފިޔާގެ ފައިސާގެ އިނާމު ދިނުމަށް ވަނީ ހަމަޖެހިފައެވެ.
ޑީއެމްއާރުއަކީ ރާއްޖޭގައި ބާއްވާ ފުރަތަމަ އަދި ހަމައެކަނި ބައިނަލްއަގްވާމީ ދުވުމުގެ ހަރަކާތެވެ. އެގޮތުން، މި އިވެންޓަކީ އެސޯސިއޭޝަން އޮފް އިންޓަނޭޝަނަލް މެރަތަންސް އެންޑް ޑިސްޓެންސް ރޭސަސް (އެއިމްސް)ގައި ލިސްޓު ކުރެވިފައިވާ ހަރަކާތެއް ކަމަށް ދިރާގުން މައުލޫމާތު ދެއެވެ. ރާއްޖޭގައި ބާއްވާ އެންމެ ބޮޑު އަހަރީ ދުވުމުގެ ގޮތުގައި ޑީއެމްއާރުއާރުގައި މުޅި ރާއްޖެއާއި ރާއްޖެއިން ބޭރުގެ މީހުންނާއި ޖަމާޢަތްތައް އެއްތަނަކަށް އެއްކުރެއެވެ.
ޑީއެމްއާރު 2025 ޚާއްޞަކޮށްފައިވަނީ ދިރާގުގެ އިޖްތިމާޢީ ޒިންމާގެ ޕްރޮގްރާމްގައި ހިމެނޭ ކުޑަކުދިންގެ ރައްކާތެރިކަމުގެ މަޤްޞަދަށެވެ. މި އިވެންޓްގެ ސަބަބުން އެންޖީއޯތަކުން ކުޑަކުދިންގެ ހައްގުތަކަށް ވަކާލާތުކޮށް އެމީހުންގެ މަސައްކަތަށް ފައިސާ ހޯދުމަށް ޕްލެޓްފޯމެއް އުފެދިގެންދާނެ އެވެ.
ރަޖިސްޓްރޭޝަންގެ ތެރޭގައި ބައިވެރިން ނޮމިނޭޓް ކުރާ ގަދަ ފަސް އެންޑޯސްޑް އެންޖީއޯއަށް ދިރާގުން 200،000 ރުފިޔާ ހަދިޔާކޮށް، އެ ކުންފުނިތަކުން ރާވާފައިވާ ދަރުމަވެރި ކަންކަމުގައި އެހީތެރިވެދޭނެ އެވެ. މީގެ އިތުރުން ދިރާގުން ކޮންމެ ބައިވެރިއެއްގެ ރަޖިސްޓްރޭޝަނަށް ނަގާ 100 ރުފިޔާ އާއި އެކު ސްޕެޝަލް ބިބް ނަމްބަރު ވިއްކައިގެން ލިބޭ ހުރިހާ ފައިސާއެއް އެންޑޯސްޑް ޕާޓްނަރ އެންޖީއޯތަކުގެ މެދުގައި ހަމަހަމަ ގޮތެއްގައި ހަދިޔާ ކުރާނެ އެވެ.
ޑީއެމްއާރު 2025 އަށް ރަޖިސްޓްރީ ކުރުމުގެ ފުރުސަތު މިހާރު ހުޅުވާލާފައިވާއިރު، 4،000 ބައިވެރިންގެ ލިމިޓް ހަމަވުމުން އެ ރަޖިސްޓްރޭޝަން ބަންދުވާނެ އެވެ.
މިއީ 2007 ވަނަ އަހަރުން ފެށިގެން ދިރާގުން ކޮންމެ އަހަރަކުވެސް ބާއްވާ ހަރަކާތެކެވެ.