ހއ. މުރައިދޫ މިސްކިތް ތަރައްޤީކުރުމުގެ މަޝްރޫއު ސަރުކާރުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ ލިމިޓެޑް (އެމްޓީސީސީ)އާ ހަވާލުކޮށްފިއެވެ.
މި މަޝްރޫއު ހަވާލުކުރުމަށް މިއަދު ބޭއްވި ރަސްމިއްޔާތުގައި އެމްޓީސީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރ ޑެޕިއުޓީ ކޮމިޝަނަރ އޮފް ޕޮލިސް (ރިޓަޔަރޑް) އަޙުމަދު ސަޢުދީއެވެ. އިސްލާމިކް މިނިސްޓްރީގެ ފަރާތުން ސޮއެކުރެއްވީ މިނިސްޓަރ އޮފް އިސްލާމިކް އެފެއާޒްގެ ނައިބު އަލްފާޟިލް އިބްރާހިމް އާސިމްއެވެ.
އެމްޓީސީސީ އިން ބުނީ 924 މީހުންގެ އާބާދީއެއް ދިރިއުޅޭ މުރައިދޫ ރައްޔިތުންނަށް މިއަދު ސޮއެކުރެވުނު މަޝްރޫއުގެ މަސައްކަތް ފުރިހަމަކުރެވުމާއެކު އިޖުތިމާޢީ ގޮތުން ގިނަގުނަ މަންފާތަކަކާއި ފަސޭހަތަކެއް ލިބިގެންދާނެ ކަމަށެވެ. މި މަޝްރޫޢުގެ ދަށުން 3650 އަކަފޫޓުގެ ސަރަޙައްދެއްގައި 300 މީހުންނަށް ނަމާދު ކުރެވޭގޮތަށް މިސްކިތެއް ބިނާކުރެވިގެން ދާނެއެވެ. އަދި ނަމާދުކުރާ ކޮޓަރިއެއް ޤާއިމުކުރުމާއި ފިރިހެނުންނާއި އަންހެނުންނަށް ވުޟޫ ކުރާތަން ހެދުމާއި މިސްކިތުގެ ގޯތިތެރެ ސާފުކުރާނެ ސާމާނު ބަހައްޓާނެ ތަނެއް ހެދުމާއި މުންނާރެއް ހެދުމާއި މިޙުރާބް ގެއެއް ހެދުމާއި ސައުންޑް ރޫމެއް ހެދުމާއި އިމާމުންނަށް ޙާއްސަ ކޮޓަރިއެއް ހެދުން ހިމެނެއެވެ. މިއީ 7.21 މިލިއަން ރުފިޔާއަށް 365 ދުވަސްތެރޭ ނިންމަން މިކުންފުންޏާ ހަވާލުކޮށްފައިވާ މަޝްރޫއެކެވެ.
ވޭތުވެދިޔަ 44 އަހަރުތެރޭ އެމްޓީސީސީން ވާނީ ރާއްޖޭގެ އެކި ކަންކޮޅުތަކުގައި އުމްރާނީ ތަރައްޤީގެ ގިނަ މަޝްރޫއުތަކެއް ހިންގައި ކާމިޔާބުކަމާއިއެކު ނިންމާފައެވެ. 1980 ވަނަ އަހަރު އެމްޓީސީސީ އުފެދުނީ ރާއްޖޭގެ ތަރައްޤީގެ ދަތުރުގެ މުހިންމު މަރުހަލާއެއްގައެވެ. ކުންފުނި އުފެދުނީއްސުރެ ރާއްޖޭގެ އުމްރާނީ ތަރައްޤީ އާއި އިޖުތިމާއީ ވަސީލަތްތައް ބިނާކުރުމުގައި އެމްޓީސީސީން ވާނީ މުހިންމު ދައުރެއް އަދާކޮށްފައެވެ.