2025 ވަނަ އަހަރުގެ އޭޝިއާ ޕެސިފިކް ސްޓީވީ އެވޯޑްސްގައި ޓެލެކޮމިއުނިކޭޝަންސްގެ ދާއިރާގައި ހޮވާ އަހަރުގެ އެންމެ މޮޅު ވަޒީފާދޭ ފަރާތަށް ދޭ ސްޓީވީ އެވޯޑްގެ ތެރެއިން ބްރޯންޒް އެވޯޑެއް އުރީދޫއަށް ލިބިއްޖެއެވެ.
އުރީދޫ އިން މިކަން ހާމަކުރީ އިއްޔެ އެކުންފުނީގެ އެކްސް ޕްލެޓްފޯމްގައި ކުރި ޓްވީޓެއްގައެވެ.
މި އެވޯޑަކީ ރަނގަޅު މަސައްކަތުގެ މާހައުލެއް ފާހަގަކޮށް، މުވައްޒަފުން ބާރުވެރިކުރުމާއި މުވައްޒަފުންނަށް ހިތްވަރުދޭ މާހައުލެއް ފަހިކޮށްދީފައިވާ ވަޒީފާ ދޭ ފަރާތްތަކަށް ދޭ އެވޯޑެކެވެ.
އުރީދޫން ވަނީ އެ ކުންފުނީގެ ކާމިޔާބީގެ ސިއްރަކީ އެ ކުންފުނީގެ މުވައްޒަފުން ކަމަށް ބުނެފަ އެވެ. މި އެވޯޑުގެ ސަބަބުން މުވައްޒަފުން އިތުރަށް ބާރުވެރިވެ، އޮފީހުގައި އެކަކު އަނެކަކާ ޕްރޮފެޝަނަލް ގުޅުން ގާއިމްކުރުމުގެ މައްޗަށް ބިނާކޮށް މަސައްކަތުގެ ސަގާފަތެއް ބިނާކުރުމަށް ކުރަމުންދާ މަސައްކަތްތައް އިތުރަށް ހަރުދަނާވާނެ ކަމަށެވެ.
އޭޝިއާ ޕެސިފިކް ސްޓީވީ އެވޯޑަކީ މި ސަރަހައްދުގައި ދޭ ޕްރީމިއަމް އެވޯޑްތަކުގެ ތެރެއިން އެވޯޑެކެވެ. އުރީދޫއަށް އަހަރުގެ އެންމެ މޮޅު ވަޒީފާދޭ ފަރާތް – ޓެލެކޮމިއުނިކޭޝަންސްގެ ބްރޯންޒް އެވޯޑެއް ލިބުނީ ވަޒީފާދޭ ފަރާތްތަކުގެ އަގުވަޒަންކުރުމާއި ވަޒީފާދޭ ފަރާތްތަކުގެ ކުރިއެރުމަށްޓަކައި ކުންފުނިން ކުރާ މަސައްކަތުގެ ސަބަބުން ކަމަށް އުރީދޫން ބުނެއެވެ.
އުރީދޫ އަކީ މަސައްކަތަށް ބޭނުންވާ ހުނަރު ތަރައްގީކުރުވުމަށްޓަކައި އިތުރަށް ކިޔަވަން ބޭނުންވާ މުވައްޒަފުންނަށް އެހީތެރިކަން ފޯރުކޮށްދޭ ކުންފުންޏެކެވެ. އަދި މުވައްޒަފުންގެ ސިއްހަތާއި ތަރައްގީއަށްވެސް ބަަލައިގެން މަސައްކަތް ކުރާ ކުންފުންޏެކެވެ.