އުރީދޫ މޯލްޑިވްސްއާ ސްޓްރީމް ފައުންޑޭޝަނުން މޯލްޑިވްސް ކޮރަލް އިންސްޓިޓިއުޓާ ގުޅިގެން ބ. ފުޅަދޫ ކައިރީގައި މިހާރު ކުރިއަށްދާ މުރަކަ މޮނިޓަރިން މަޝްރޫއުގައި ބޮޑެތި ކުރިއެރުންތަކެއް ހޯދައިފި އެވެ.
2023 ވަނަ އަހަރުގެ ކުރީކޮޅު ލޯންޗުކުރި މި މަޝްރޫޢުގެ ފަހުން، އުރީދޫގެ ނެޓްވޯކުން ކަރަންޓް ދޭ ހައިޓެކް އަންޑަވޯޓާ ކެމެރާތައް ބޭނުންކޮށްގެން ރީފް އިކޯސިސްޓަމްތައް ގާތްގަނޑަކަށް ރިއަލް ޓައިމްގައި މޮނިޓަރ ކުރުމުގެ ފުރުސަތު ވަނީ ލިބިފައެވެ.
މޮނިޓަރިންގ ސިސްޓަމްގެ ޒަރީޔާއިން ރީފް ރެސިލިއެންސް އާއި މޫސުމަށް އަންނަ ބަދަލުތަކުގެ އަސަރުތައް ދެނެގަތުމަށް މުހިންމު ތަފްސީލީ މައުލޫމާތުތައް ލިބެއެވެ. މުރަކަތަކުގެ ސިއްހަތާއި، މަހުގެ އާބާދީއާއި، ބަޔޯޑައިވަރސިޓީއާ ބެހޭ މައުލޫމާތުވެސް މީގެ ތެރޭގައި ހިމެނެއެވެ. އުރީދޫ މޯލްޑިވްސްގެ ތަފާސް ހިސާބުތަކަށް ބަލާއިރު، 2024 ވަނަ އަހަރު އެކަނިވެސް ކެމެރާތަކުން 15،728 ވަކިވަކި މަސް ރެކޯޑްކޮށްފައިވާއިރު، އެވްރެޖްކޮށް ދުވާލަކަށް 43 މަސް ފެނިފައިވެ އެވެ. ދުވާލަކު އެންމެ ގިނައިން ގުނާފައިވަނީ 20 އޭޕްރީލް 2024 ގަ އެވެ. އެ ދުވަހު 402 މަސް މި ސިސްޓަމުން ފެނިފައިވެ އެވެ.
މަހުގެ ހަރަކާތްތައް ޓްރެކްކުރުމުގެ އިތުރުން މުރަކަ ބްލީޗްވުމާއި ރަނގަޅުވުމުގެ އަލާމާތްތަކާއި ތިމާވެށީގެ ގޮންޖެހުންތައް ދެނެގަތުމުގެ ފުރުސަތު މި ނިޒާމުން ފަހިކޮށްދެ އެވެ. އޭރުން އަވަސް ފިޔަވަޅުތައް އެޅުމަށް ފަސޭހަވެގެންދާނެކަން އުރީދޫއިން ފާހަގަކޮށްފައިވެ އެވެ.
"ސްޓްރީމް ފައުންޑޭޝަނާއި މޯލްޑިވްސް ކޮރަލް އިންސްޓިޓިއުޓާ އެކު ގާއިމްކުރި ޕާޓްނަޝިޕްގެ ހެޔޮ އަސަރު ފެނުމަކީ އަޅުގަނޑުމެންނަށް ލިބޭ ވަރަށް ބޮޑު އުފަލެއް. މި އިސްނެގުމަކީ ލޯކަލް ކޮމިއުނިޓީތަކަށާއި ގައުމުގެ ފަތުރުވެރިކަމުގެ ސިނާއަތަށް މުހިންމު ހެޔޮ ބަދަލެއް ގެނައުމަށާއި ކަނޑުގެ ބަޔޯޑައިވަރސިޓީ ހިމާޔަތްކުރުމަށް ޓެކްނޮލޮޖީ ބޭނުންކޮށްގެން ދެމެހެއްޓެނިވި ތިމާވެށްޓެއް ބެލެހެއްޓުމަށް އުރީދޫއިން ކަނޑައެޅި އަމާޒުގެ ތެރެއިން ކުރެވޭ ކަމެއް. އަޅުގަނޑުމެންގެ ނެޓްވޯކް ކެޕޭސިޓީތަކުން މިފަދަ މުހިންމު މަސައްކަތެއްގައި ޙިއްޞާވާ ގޮތް ފެނުމުން، ޓެކްނޮލޮޖީގެ ސަބަބުން ދެމެހެއްޓެނިވި ގޮތެއްގައި ކަންކަން ބާރުވެރިކުރެވޭނެ ކަން ފެނުމަކީ އަޅުގަނޑުމެން ފަޚުރުވެރިވާ ކަމެއް" އުރީދޫ މޯލްޑިވްސްގެ ސީއީއޯ ޚާލިދު އަލް ހަމަދީ ވިދާޅުވި އެވެ.
ކަނޑުގެ ދުރު ސަރަހައްދުތަކުގައި ވެސް އުރީދޫ މޯލްޑިވްސްގެ އިތުބާރު ހުރި ހައިސްޕީޑް ކަނެކްޓިވިޓީގެ ސަބަބުން މި މަޝްރޫއު ކާމިޔާބު ކުރުމުގައި މުހިއްމު ދައުރެއް އަދާކޮށްފައިވެ އެވެ. ރިއަލް ޓައިމް ޑޭޓާ ޓްރާންސްމިޝަންގެ ސަބަބުން ދިރާސާވެރިންނާއި ކަމާއި ގުޅުންހުރި އިދާރާތަކަށް ކަނޑުގެ މައުލޫމާތު ވަގުތުން ލިބި، އަވަސް ހައްލުތައް ހޯދުމަށް ފަސޭހަވެގެންދެ އެވެ.
ރާއްޖޭގެ އިތުރު ރީފް ސައިޓްތަކަށް މި މޮނިޓަރިން ސިސްޓަމް ތައާރަފްކުރުމަށް އުރީދޫއާއި ސްޓްރީމް ފައުންޑޭޝަނުން ރާވަމުން އެބަގެންދެއެވެ.