ގދ.ތިނަދޫގައި ގާއިމް ކުރަމުން އަންނަ މަސް ގަންނަ މަރުކަޒު، އަންނަ އަހަރު ތެރޭގައި ހުޅުވައިގެން ހިދުމަތް ދޭން ފަށާނެ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ އިން (މިފްކޯ) ބުނެފިއެވެ.
ތިނަދޫގައި ޤާއިމުކުރާ މަސް ގަންނަ މަރުކަޒު އަންނަ އަހަރުގެ ފަހުކޮޅު ހުޅުވައި އޮޕަރޭޝަންތައް ފެށުމަށް ވާންޖެހޭ ތައްޔާރީތައް މިހާރު މިފްކޯއިން އަންނަނީ ވަމުންނެވެ.
"އުތުރާއި ދެކުނުގައި" ބާނާ ބޮޑު ކަންނެލި، މިފްކޯ އިން ގަތުމުގެ މަސައްކަތް ފެށުމުގެ ތައްޔާރީތައް މި އަހަރު ތެރޭ ފެށުމަށް މިފްކޯއިން ވަނީ ރާވާފައެވެ.
ތިނަދޫގެ ކޯލްޑް ސްޓޯރޭޖްގެ މަސައްކަތް އަންނަ އަހަރަށް ނިންމައި މަސް ގަންނަން ފެށުމަކީ ސަރުކާރުގެ އަމާޒެއް ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމްވެސް މީގެ ކުރިން ވަނީ ވިދާޅުވެފައެވެ.
ޕްރޮސެސިންގެ ޤާބިލުކަން އިތުރުކުރުމުގެ މަސައްކަތްތަކާއެކު، މަސްވެރިކަން ދަށްވެފައިވާ މި ދުވަސްވަރުގައި ކޫއްޑޫގެ މަސްގަތުމުގެ ޙާލަތު ރަނގަޅުކުރުމަށް ގިނަ ފިޔަވަޅުތަކެއްވެސް މިފްކޯއިން ވަނީ އަޅާފައެވެ. އެގޮތުން ބަނދަރުމަތީގެ މަގުތައް މަރާމާތުކުރުމާއި ކޫއްޑޫގެ ލޯކަލް ޕްރޮޑަކްޝަން ފެކްޓަރީ އަޕްގްރޭޑްކުރުމާއި އަދި ފެލިވަރު ކޭނަރީގެ މަރާމާތާއި މެއިންޓަނަންސްގެ މަސައްކަތްތައް މި އޮގަސްޓް މަހު ފެށުމަށް ވަނީ ހަމަޖެހިފައެވެ. މި މަސައްކަތްތަކަކީ މިވަގުތަށް ކޮންމެހެން ކުރަންޖެހޭ މުހިންމު މަސައްކަތްތަކެކެވެ.
މިފްކޯގެ އަމާޒަކީ މަސްވެރި ސިނާއަތާއި މަސްވެރިން ކުރަމުންދާ މަސައްކަތްތައް ފައިދާހުރި ދެމެހެއްޓެނިވި މަސައްކަތްތަކަކަށް ހެދުމެވެ.